Isaiah 43 - Hawaii Pidgin Bible

Da Ony One Dat Can Get Da Israel Peopo Outa Trouble

¹ But now, dis da message from Da One In Charge Da One wen make you Jacob peopo, Dat make da Israel ohana how dey stay: “No sked! cuz I wen pay da price Fo all you guys So you no gotta be one slave. I call you by yoa name, An you mines.

² Weneva any one a you guys go thru da watta, I goin stay wit you. Weneva you go thru da rivas, Dey no goin go ova you. Weneva any a you guys walk thru da fire, No goin hurt you, No goin burn you up.

³ Cuz me Da One In Charge, Da God fo all you guys. I da Spesho One fo da Israel peopo Dat get you guys outa trouble. I wen give Egypt fo pay So you no gotta be one slave, An Sudan an Yemen too.

⁴ Az cuz weneva I tink bout you guys, I see dat you worth plenny to me. I show you respeck, Cuz I get love an aloha Fo all you guys. I goin give odda peopo fo pay fo you. I even goin let um mahke Fo you stay alive.

⁵ No sked cuz I stay wit you guys. I goin bring da ones dat goin come from you, from da east side, An bring all you guys togedda from da west side.

⁶ I goin tell da peopo from da north side, ‘Let my peopo come!’ An I goin tell da peopo from da south side, ‘No hold dem back!’ Bring all my boys from far places, An my girls from da mos far place inside da world.

⁷ Bring erybody dat get my name cuz dey my peopo. All da ones I wen make fo show erybody How awesome me.

⁸ “Bring out da peopo dat get eye But dey no can see, An da peopo dat get ear But dey no can hear.

⁹ Da peopo inside all da countries, Dey come togedda an get meeting. Who from dem can tell us guys Bout all dis stuff dat stay happen now, An all da stuff dat wen happen befo time? Good dey bring in plenny guys Fo show proof dat dey stay tell da right stuff. Den da odda peopo goin hear, An tell, ‘Az true!’ ”

¹⁰ Dis, wat Da One In Charge tell: “You guys goin tell Wat you know bout me. An I wen pick you guys fo work fo me, Fo you guys know who me, An trus me, an know dat I da One. Befo me, neva have anodda god. An no goin get no odda god afta me.

¹¹ Me, Da One In Charge. No mo odda gods dat can get peopo outa trouble, Ony me can!

¹² I wen tell da peopo wassup, An get um outa trouble, An make shua dey hear all dis. No was some odda god from anodda place Dat do all dat stuff. An you guys, you can tell dem ova an ova Wat you wen see me do, Dat I da God fo real kine.” Az wat Da One In Charge tell.

¹³ “An from long time befo time, I God. Wen I use my powa, No mo nobody can make me stop. Wen I do someting, No mo nobody can change um An make um jalike was befo time.”

Da One In Charge Goin Do Someting He Neva Do Befo

¹⁴ Dis, da message from Da One In Charge, Da One dat pay da price Fo get you guys outa trouble, Da Good An Spesho God fo da Israel peopo. He tell: “Fo help you guys, I goin sen army guys Babylon side. I goin make da Babylon peopo run away on top da boats Dat befo time dey make um look real nice. I goin make dem go down da Eufrates riva An run away.

¹⁵ Me, Da One In Charge, I da Good an Spesho God fo you Israel peopo. I wen make you Israel peopo. I yoa King!”

¹⁶ Dis one message from Da One In Charge, Da One wen make one road in da middo da Red Sea, One place fo da Israel peopo go Inside da danger watta.

¹⁷ Da One In Charge make da strong Egypt army guys go out, Wit dea war wagons an da horses, all togedda. Dey all fall down dea, an no get up one mo time. Dey all mahke, jalike wen you pio one candle. Da One In Charge da One dat tell dis:

¹⁸ “No tink bout ony da stuff dat wen happen befo time. No try fo undastan ony da tings from long time befo time.

¹⁹ Look! I stay do someting new! Stay happen awready! You no see um, o wat?! I stay make one road inside da boonies, An I stay put streams wea nobody stay!

²⁰ Da wild animals ova dea show respeck fo me, Da jackal kine dogs, an da ostrich bird, Cuz I give dem watta fo drink inside da boonies, An streams wea nobody live, Fo give watta fo drink to my peopo, Da ones I wen pick.

²¹ I wen make dose peopo fo me Fo dem talk story Bout da good tings I stay do.

²² “You Jacob ohana peopo! No was me you guys wen aks fo help you. You Israel peopo! You guys neva bus ass an come tired Fo do stuff fo me.

²³ Wen you guys bring sheeps Fo kill an burn up, No was fo me fo make sacrifice fo real kine! Wen you guys make some odda kine sacrifice, No was fo show respeck fo me! I neva presha you guys Fo bring me wheat fo one present. I neva make you guys come tired Wen I tell you fo burn incense fo me.

²⁴ You guys neva buy me Da cane kine perfume dat smell nice, An you guys neva give me Da bestes part a yoa sacrifice meat. Da ony ting you guys wen do fo me, You make pilikia fo me Wit all da bad tings you stay do, An you guys make me tired Wit all da bad tings you do.

²⁵ “Me, Da One In Charge. I da One dat let you go Fo show wat kine god me, No matta you go agains me. I no tink no mo bout all da bad tings you wen do.

²⁶ Tell me fo me know Someting good you guys wen do befoa. Den we can make argue togedda, An you can tell me bout um, Fo show you okay.

²⁷ Even yoa ancesta befo time wen do bad kine stuff. Even yoa guys dat talk fo me wen go agains me.

²⁸ Az why I put kahuna On top da main leada guys Fo da Temple Dat Stay Spesho Fo Me, So dey no can come inside fo pray. An I tell dem dat I wen put kahuna On top da Jacob ohana fo wipe dem out. Erybody goin talk bad Bout da Israel peopo.”