Isaiah 32 - Hawaii Pidgin Bible

Da King Do Da Right Kine Stuff

¹ Look! Fo make shua eryting stay right, Goin get one king stay in charge. He goin get odda leada guys Dat goin judge da right way too.

² Da king goin be da kine guy Dat goin be jalike one place Fo da peopo hide From da strong wind o da rain, So no can wack um. He goin help da peopo fo res, Jalike one watta ditch inside one dry place, An jalike one big rock Dat make one big shadow In da place wea no mo watta.

³ Dat time, da peopo dat can see, Dea eyes no goin stay shut. An da peopo dat can hear, Dey goin lissen good.

⁴ Da guys dat talk befo dey tink, Dey goin know an undastan stuff. Da guys dat no can talk good, Dey no goin take long time fo talk, An goin come out good wat dey tell.

⁵ Dat time, da stupid kine guys Dat ack jalike God no matta, Nobody goin tell dey get one good heart Fo help peopo. Da guys dat bulai erybody, Nobody goin get respeck fo dem.

⁶ Cuz da stupid kine guys Dat ack jalike God no matta, Dey talk stupid kine stuff. Dey tink plenny bout how fo make trouble. Az why, wateva God like, dey no like um. Az why dey teach Da wrong kine stuff bout Da One In Charge. Az why dey make shua Da hungry guy no get notting fo eat, An dey no let da guy dat stay thirsty Get notting fo drink.

⁷ Da guys dat fool erybody, Eryting dey do, stay bad. Dey make one plan fo do real bad kine stuff. Az how come dey bulai Da peopo dat no mo notting Fo wipe dem out, No matta da peopo dat fo real kine need stuff Even wen dey get um right in front da judge.

⁸ But da guys dat get one good heart fo help peopo, Dey make one real kine plan fo help um. Dey stay solid, Cuz dey plan fo do good tings.

Da Wahines Inside Jerusalem Town

⁹ Eh, you wahines dat no stay worry bout notting! Stan up an lissen wat I stay tell you! You daughtahs stay shua notting goin hurt you, Lissen wat I get fo tell you.

¹⁰ In litto mo den one year, You guys dat stay shua notting goin hurt you, You goin shake an come sked. Cuz no goin get no mo grapes fo harves, An no goin get fruit fo harves.

¹¹ Shake an come sked You wahines dat no give a rip bout notting. Shake an come sked You daughtahs dat stay shua notting goin hurt you. Take off yoa clotheses An put burmbag cloth aroun yoa wais Fo show you stay sad an crying.

¹² Pound yoa ches an cry, all you peopo, Cuz no mo da nice looking fields An da grape plants wit plenny fruit Dat you guys wen get befo time.

¹³ Cry fo my peopo land Dat ony get thorns an thorn bush stay growing! Cry fo all da house wea erybody Wen dance an sing An fo da town wea dey get plenny party befo time!

¹⁴ Erybody goin go way from da palace An leave da big town Dat wen get plenny noise befo time. Da hill wit da strong wall an da towas Goin get pukas an caves inside. Da wild donkeys goin like live dea Cuz no mo peopo, An da goats goin get food fo eat ova dea.

¹⁵ Eryting goin stay lidat Till da Spirit from da sky come An take charge us guys. Dat time, da place wea nobody live, Goin get fields wea plenny stuff grow. Da field wea peopo tink plenny stuff grow now, Dat time dey goin tink, Look jalike one fores.

¹⁶ Da places wea nobody live, Goin get peopo dea, An judges dat judge da right way. Da field wea plenny stuff grow, Goin get peopo dea, Dat do wass right erytime.

¹⁷ An cuz peopo stay do wass right, Dat goin make tings come good fo erybody. An wen dey stay do wass right Dey goin stay quiet an trus God all da time.

¹⁸ My peopo goin stay inside places Wea eryting come good fo dem. Dey goin live inside places Wea dey can stay shua notting bad goin happen, Places wea dey goin res An no need worry bout notting.

¹⁹ No matta get hail Dat make all da trees fall down, An all da buildings inside da big town fall down,

²⁰ Afta dat, you guys goin stay feel good inside, Wen you plant yoa seed nea ery stream An let yoa cows an donkey go all ova.