Isaiah 22 - Hawaii Pidgin Bible

Wat God Tell Bout Da Jerusalem Peopo

¹ Me Isaiah, I get heavy kine stuff fo tell bout wat I see goin happen to da Jerusalem peopo: Dis wat God tell bout da place Wit mountains all aroun, Wea can see wat goin come bumbye. “Wassup wit all you guys?! How come erybody go up on top yoa flat roof?!

² All ova Jerusalem town Some a you guys stay yell an moan, An odda guys make party! Same time get mahke guys bodies all ova da place. Nobody wen kill dem wit swords. Dey neva fight in da war, But still yet, dey mahke.

³ Da leada guys fo yoa army Dey all wen run away togedda. Da odda guys no even shoot arrow at dem. Dey jus grab um an tie um up. Da guys from da town come prisonas too, Even da guys dat run away Wen da army guys still yet stay far away from da town.”

⁴ Dass why I tell dis, “Go way! No look at me! Let me cry hard! No try make me feel good inside Cuz dey wipe out my peopo! My peopo, dey jalike one wahine, Gone awready, eryting dey get.

⁵ “Da One In Charge a me, Da God Ova All Da Armies, One day he goin come. Den, God goin jam up da Jerusalem peopo head Fo dem no tink an donno wat dey stay do. He goin make dem run all ova each odda, Right dea, inside da place wit mountain all aroun Wea can see wat goin come bumbye. Dat time, da army goin broke down da Jerusalem wall. All da way to da mountain goin hear da peopo stay yelling.

⁶ Da Elam guys goin shoot dea bow an arrow at da Jerusalem guys From inside da war wagon, Wit odda guys fo drive da horses fo da war wagon. Da guys from Kir goin put up da shield.

⁷ Yoa bestes kine valleys Get plenny war wagon. Da army guys dat ride horse Stay watch by da gate fo da town.

⁸ Da Judah peopo no can hide wat dey stay do. Dat time, dey ony goin trus da ol stuff fo fight wit Dat dey keep inside da palace dat dey call Da Fores House.

⁹ But you guys goin see dat get plenny place Wea da wall stay bus up awready All aroun Jerusalem, King David big town. You guys goin keep watta Inside da makai watta place.

¹⁰ You count da houses inside Jerusalem, Den you broke um down fo get wood an stone Fo make da wall mo strong.

¹¹ You guys goin build one new watta place Inside da town walls Fo nobody take da watta From da ol watta place. “But you guys neva even tink bout Da One In Charge, Da One dat wen make all dis happen, Cuz he wen plan um from long time befo time.

¹² My boss, Da One In Charge, Da God Ova All Da Armies, He goin call you dat time Fo cry an stay sad inside, Fo pull out yoa hair, An put on burmbag kine clotheses, Fo show you stay sad inside.

¹³ But you know wat?! You guys no stay sad inside. You guys dance an sing, An make party, You kill cows an sheeps, Eat da meat an drink da wine. You tell, ‘Eat an drink now, Cuz tomorra, we mahke!’

¹⁴ I hear Da One In Charge, Da God Ova All Da Armies, Tell dis bad kine ting you guys stay do, I no goin hemo yoa shame fo dat Fo all da days you stay live.” Dass wat my Boss tell, Da One In Charge, Da God Ova All Da Armies.

Wat God Tell Bout Da Guy Shebna

¹⁵ Dis da ting Da One In Charge a me, dass Da God Ova All Da Armies, tell: “Go see dis guy Shebna, dat take kea all da palace kine biznis. Tell um strait:

¹⁶ ‘Wassamatta you?! Dis not yoa kuleana, you know! How come you get yoa peopo hea?! Who give you da right Fo build one fancy kine tomb inside dis big stone Fo yoa ohana bury you ova hea wen you mahke, One tomb dass mo high inside Den da tomb fo da oddas inside da big rock?! Dass da place you goin stay afta you mahke!

¹⁷ “ ‘You betta watch out! Da One In Charge stay ready fo grab you An throw you away, you big moke!

¹⁸ He goin roll you up tight jalike one ball, An throw you inside one big land. Dass wea you goin mahke, An dass wea da war wagons goin stay, Dat wen make you look so awesome! But now, you da one Make shame fo yoa boss guys!

¹⁹ I goin take yoa kuleana away from you. I goin throw you outa yoa palace job!

²⁰ “ ‘Dat time, I goin call my worka guy, Eliakim, Hilkiah boy, fo come work fo me.

²¹ I goin put yoa robe an yoa alii sash on top him, An give him da powa Fo do da job you get right now. He goin come jalike da faddah guy Fo da peopo inside Jerusalem, An da Judah ohana peopo.

²² I goin give Eliakim da right Fo run da govmen fo da king, Jalike him da one carry da key fo King David palace An work fo da King David ohana. Wen Eliakim open someting, No mo nobody can shut um. Wen he shut someting, No mo nobody can open um.

²³ I goin make Eliakim come one strong guy, No mo notting can make him change, Jalike one strong stick Dat stick out from da wall fo hold stuff. Erybody goin get choke respeck fo his faddah ohana, Cuz Eliakim goin be jalike da throne dat hold da king.

²⁴ Him da one gotta carry da load Fo all his faddah guy ohana peopo Fo make shua dey all get respeck. Dey goin make Eliakim take kea eryting fo dem, Even da mos small kine stuff.’ ”

²⁵ Da One In Charge, Da God Ova All Da Armies, Dis wat he tell: “Bumbye, even Eliakim goin come jam up, Jalike wen somebody put one peg fo hang someting On top one solid place an da peg come loose. Somebody goin chop um off, Den da whole load goin fall down An eryting dat hang on top um goin come wipe out.” Da One In Charge, he da One tell all dat.