Isaiah 12 - Hawaii Pidgin Bible

We Sing Mahalo Fo Da One In Charge

¹ Dat time, you goin tell, “I goin sing fo tell Da One In Charge he da greates! I goin tell erybody dat you good, Da One In Charge. No matta you was huhu wit me, Now you no stay huhu wit me no moa, An you take away da sore from inside me.

² “Fo shua, he da God get me outa trouble. I goin trus him an no stay sked. Cuz Da One In Charge, da One make me strong An give me powa. He come awready, da One get me outa trouble.”

³ Bumbye, all you guys goin feel good inside, Cuz Da One In Charge get you guys outa trouble, Jalike you guys stay good inside Wen you like drink watta, An you get um outa one puka.

⁴ Dat time, you guys goin tell, “Tell Da One In Charge ‘Mahalo!’ Tell him fo help you cuz you know wat kine god him! Go by all da diffren peopos Fo make shua dey know wat kine tings he can do! Help erybody fo no foget Dat wen you know wat kine god him, You know he da greates!

⁵ “Sing bout Da One In Charge, Cuz he do awesome kine stuff. Let peopo all ova da world know bout dis!

⁶ Yell loud! Yell cuz you guys feel good inside, All you peopo dat live inside Jerusalem town! Cuz da Good An Spesho God fo da Israel peopo Stay wit all you guys, Az why you know he da greates!”