Isaiah 10 - Hawaii Pidgin Bible

¹ Bummahs! fo da guys dat make all kine rules dass not right, An write all kine rules dat make humbug fo da peopo!

² Dey make da peopo dat no mo notting Fo no get help from da judge. Dey take away da rights From my peopo wen dey get hard time. Dey steal stuffs from da widows An da kids dat no mo faddah o muddah.

³ But wat you guys goin do Wen da time come fo God punish you guys? Wen da army guys from far away Wipe you guys out jalike one storm? Wat peopo you guys goin run to Fo dem help you guys? Wea you guys goin leave all yoa rich stuffs Wen you run away?

⁴ Ony one ting you can do—give up! Cuz wat goin happen to you, mo worse den da prisona guys! O you can fall down on top da groun wit da odda mahke bodies, Cuz wat goin happen to you, mo worse den wat happen to da guys dey kill! An Da One In Charge stay huhu wit da Israel peopo still yet, An he stay ready fo bus um up.

Da Assyria Peopo Goin Stan In Front Da Judge

⁵ God tell: “Bummahs fo you guys! I goin use da Assyria peopo jalike one club fo punish you, Cuz I stay huhu wit you Israel peopo, An I goin make da Assyria guys wack you!

⁶ I goin sen da Assyria army guys agains my peopo Dat ack jalike I no matta. I no can take awready Da bad kine stuff da Israel peopo stay do. Dass why I tell da Assyria peopo Fo come take da Israel peopo rich stuff An take um all away. Jalike dey goin walk on top da Israel peopo An push um down jalike dey mud on top da streets.

⁷ “But da Assyria guys, dey no tink like me. Dey no make same kine plan jalike me. Dea plan, diffren kine, Cuz dey ony like wipe out eryting, An kill plenny diffren peopos.”

⁸ Da Assyria king tell: “Eh, oua army general guys, All a dem, dey king guys too!

⁹ Us guys awready win an take ova Kalno an Karkemish, Hamat an Arpa, Samaria an Damascus!

¹⁰ We wen take ova diffren lands dat get dea kings befo time, An da idol kine gods fo dose lands, was mo strong Den da Jerusalem an Samaria kine idol gods.

¹¹ Us guys wen win ova Samaria town an dea idol gods. Now we goin do da same ting to Jerusalem town An da idol kine gods dea.”

¹² Wen God my Boss pau all he goin do on top Mount Zion inside Jerusalem town wea da Temple stay, den God goin tell, “Now I goin punish da king fo Assyria, cuz he get big head an high nose.

¹³ “Cuz da Assyria king tink, ‘I can do all dis cuz I strong, An I know wat fo do erytime, Cuz I undastan plenny stuff. I wen take away da lines dat stay block off Fo all da countries come part a my country. I wen take all dea rich stuffs. An take down dea kings, Cuz I one real strong guy.

¹⁴ I find all da silva an gold Dat da diffren peopos get. I grab um, jalike somebody take eggs from one nes! I take away stuff from peopo all ova da world, Jalike somebody take da eggs dat da muddah bird leave. Wen I do dat, nobody tell notting, O flap da wing, No even open da mout, an no squawk.’ ”

¹⁵ You tink da ax mo betta den da guy dat swing um? Da saw mo betta den da guy dat use um? You tink da club goin lif da guy dat carry um? Da stick fo walk goin lif somebody dat use um? No way!

¹⁶ Cuz a dat, Da One In Charge, da Boss, da God Ova All Da Armies, He goin make da big Assyria army guys Come sick an skinny, An come mo an mo weak jalike get feva. Fo shua, God goin light one fire Dat goin burn up all da awesome stuff Dat da Assyria king wen get.

¹⁷ Da God dat give da Israel peopo light, Fo da Assyria peopo, he goin come jalike one fire. Da One dat stay good an spesho fo da Israel peopo Goin burn up da Assyria peopo. In one day, dat fire goin burn up All da Assyria peopo, jalike dey thorns an weeds.

¹⁸ Da Assyria king get any kine awesome fores An plenny place fo grow fruit tree. Da One In Charge goin make all dat no goin be no moa, Inside an outside, Jalike wen one sick guy come wipe out.

¹⁹ Ony litto bit trees goin stay Inside da Assyria king fores. Not too much, even one young boy can count um.

Goin Get Israel Peopo Dat Still Stay

²⁰ Dat time goin come, An some a da Israel peopo dat still stay alive Da ones from da Jacob ohana dat get away, Dey no goin trus da Assyria king no moa, Da one dat wen wack um. But dey goin trus Da One In Charge fo real kine, Da One dat stay good an spesho fo da Israel peopo.

²¹ Ony some a da Jacob peopo goin come back hea An trus da Real God dat get all da powa.

²² No matta you Israel peopo Get plenny, jalike da sand by da ocean, Ony some a dem goin come back. God tell all da oddas goin come wipe out, Jalike wen da big watta carry um away, Cuz az da right ting fo him do.

²³ Cuz Da One In Charge make up his mind awready Fo wipe out da peopo. Da One In Charge a me, da God Ova All Da Armies, He da One stay do dis Ery place inside da whole world.

Da One In Charge Goin Punish Assyria

²⁴ Dass da ting Da One In Charge a me tell, Da God Ova All Da Armies: “My peopo dat stay in Jerusalem town, lissen! No sked da Assyria guys! No matta dey beat you guys wit sticks, An pick up dea club fo wack you, Jalike da Egypt guys wen do befo time!

²⁵ But ony litto bit mo time now, Den I no goin stay huhu wit you guys no moa. I goin come huhu wit da Assyria guys An go wipe dem out.”

²⁶ Dat time, Da One In Charge, Da God Ova All Da Armies, Goin bring somebody fo wack da Assyria guys wit one whip, Jalike befo time, wen he let Gideon win Ova da Midian guys at da Oreb Rock. Jalike da time da peopo come outa Egypt, An Moses hold out da stick fo walk Ova da Red Sea.

²⁷ Dat time, da Assyria peopo no goin be dea, Jalike wen God go hemo One heavy load from yoa back, O jalike wen God open da yoke from yoa neck, An den you goin come big an strong one mo time.

²⁸ Look! Da Assyria army stay come! Awready dey come Ayat, an den pass by Migron. Dey leave some guys Mikmash side fo guard dea stuffs dea.

²⁹ Dey go ova Mikmash Pass. Dey tell, “Eh, we stay Geba town tonite!” Da peopo inside Ramah town, dey sked an shaking. All da peopo inside Gibeah, Saul town, dey stay run.

³⁰ You peopo inside Bat-Gallim, yell Cuz you all stay real sked. Watch out, you Laishah peopo! Pooa ting dem! fo da peopo inside Anatot!

³¹ Da Madmenah peopo, dey stay running away. Da peopo dat live Gebim town, dey look fo one place fo hide.

³² Da same day, da Assyria army guys goin stop by Nob town. Dey goin show an yell, “Up yoas!” from ova dea, Fo make da peopo come sked Dat live Jerusalem town on top Mount Zion.

³³ But you know, Da Boss, dass Da One In Charge, Da God Ova All Da Armies, He goin wipe out da Assyria army an dea mo bigga leadas, Jalike he chop down one big tree wit one ax!

³⁴ He goin chop down da Assyria guys, Jalike wen somebody cut inside da fores wit one ax, Jalike wen da awesome big trees inside Lebanon fall down.