Amos 1 - Hawaii Pidgin Bible

Da Israel Peopo Do Bad Kine Stuff Da Guy Dat Talk Fo God

¹ Dis wat Amos tell. Amos, he one a da guys from Tekoa dat know how fo breed da sheeps da spesho kine way. Dat time, Uzziah was king Judah side. Same time, Joash boy Jeroboam Numba Two, he was king Israel side. Dat time, Amos wen see someting jalike one dream bout wat goin happen to da Israel peopo. You know, was two year befo da big earthquake.

God Get Powa Fo Punish

² Dis wat Amos tell: “Da One In Charge Up Dea Inside Da Sky, He make one big noise from Zion Hill! He talk strong from Jerusalem town, jalike thunda! Wen he do dat, da places wea da sheep guys go fo find grass, No mo grass, notting! An da trees on top Mount Carmel all dry up too.”

Da Israel Peopo, Mo Worse Den Da Odda Peopos Da Damascus Peopo

³ You betta lissen! Dis wat Da One In Charge tell: “Ova an ova, da Damascus peopo wen go agains me. Az why no way I goin let um go an no punish dem! Da buggahs wen trash da Gilead peopo, Jalike dey wen go drag one heavy board wit plenny spikes ova dea bodies.

⁴ Dass why I goin sen army guys fo burn da palace Dat dea King Hazael wen build. Dis fire goin eat up eryting dea, An da Ben-Hadad Fort dat get strong wall too.

⁵ I goin broke down da gate fo Damascus town An wipe out da main guy fo Aven Valley, Da guy dat stay in charge Bet-Eden side. Da Aram peopo, I goin catch dem An take all dem Kir side.” Dass wat Da One In Charge tell!

Da Filisha Peopo

⁶ You betta lissen! Dis wat Da One In Charge tell: “Ova an ova, da Gaza peopo wen go agains me. Az why, no way I goin let um go an no punish dem! Dey wen make one whole nation dea prisonas An sell um to da Edom peopo fo come dea slaves.

⁷ Dass why I goin sen army guys fo burn down da Gaza town wall An burn up da palaces dat get strong wall.

⁸ I goin wipe out da leada fo Ashdod town An da guy in charge a Ashkelon town. I goin go agains da peopo dat live Ekron town. Da odda Filisha guys, dey goin come wipe out too!” Dass wat Da One In Charge tell.

Da Tyre Peopo

⁹ You betta lissen! Dis wat Da One In Charge tell: “Ova an ova, da Tyre peopo wen go agains me. Az why, no way I goin let um go an no punish dem! Dey wen sell one whole nation to da Edom peopo, Cuz dey neva like do da right ting fo dea braddah guys.

¹⁰ Dass why I goin sen army guys Fo burn down da Tyre town wall. Da fire goin eat up da palaces dat get strong wall.”

Da Edom Peopo

¹¹ You betta lissen! Dis wat Da One In Charge tell: “Ova an ova, da Edom peopo wen go agains me. Az why, no way I goin let um go an no punish dem! Dey wen go hunt dea braddah guys, da Israel peopo, Wit swords fo kill dem. Dey neva like show pity fo da Israel peopo. Dey like stay huhu all da time An no mo cool head, eva.

¹² Dass why I goin sen army guys fo burn Teman town, An da fire goin eat up da palaces dat get strong wall, Bozrah town.”

Da Ammon Peopo

¹³ You betta lissen! Dis wat Da One In Charge tell: “Ova an ova, da Ammon peopo wen go agains me. Az why, no way I goin let um go an no punish dem! Gilead side, dey even wen rip open da hapai wahines Jus fo dem take ova mo plenny land.

¹⁴ Dass why I goin make da Rabbah town wall burn An da fire goin eat up all da palaces dat get strong wall. Goin get war an peopo yelling An fighting jalike one hurricane kine wind storm.

¹⁵ Da king fo da Ammon peopo, an his officer guys, I goin make all dem prisonas an sen dem far away.” Dass wat Da One In Charge tell!