Ubadyas 1 - Hanunuu

¹ Inda ti sinabi Panginuun Diyus tungkul sa nasyun Idum sa panab-anan ni Ubadyas. Nadnugan nita, manga Israilita, ti barita ginan sa Panginuun, nagsugu siya manugbarita tabug sa manga nasyun hampay garyahun sida girahun ti nasyun Idum.

Parusahan Diyus ti Idum

² Dahil magkun ngani ti Panginuun sa manga taga Idum, “Pagpatingi kamu! Buwatun niku kamu pinakamalumuy sa tanan pag nasyun ag puyaan gid nida kamu.

³ Magkumun kamu unman may tumalu sa kanyu dahil mag-uli kamu sa mabatu ag abwat pag rugar. Dapat ay sa inda pag magpayabang niyu, pagdayaun lang niyu kanyu manga sadili.

⁴ Dahil una buwatun niyu abwat man sa itlugan agila kanyu ulian ngatay ipaaput waya niyu sa manga pamgasan, ilagpak diman niku kamu. Aku, ti Panginuun, ti magbagaw inda.

⁵ “Unman aw nu sinlud manga mananakaw kanyu balay, ti pagbul-un lang nida tunda lang ti kanda pagkaibgan? Ag unman aw ti manga tagaputi ubas magsawad pira ka burak sa kay puun? Dapat kamu tanan rurisun niyu manga kalaban.

⁶ Hanapun nida ag pamul-un ti manga kasiyunan niyu, kamu manga linahi ni Isaw.

⁷ Lukuhun kamu niyu manga kakampi pag nasyun. Ti manga nag-ampud sa kanyu imaw diman ti gumira sa kanyu, ag palayasun nida kamu sa kanyu banwa. Sida pag manga nansaru sa kanyu imaw waya ti pumauli suduk sa lihim laban sa kanyu.

⁸ Aku, ti Panginuun, magkumun sa udas pakurianan yi niku kamu, rurisun niku ti manga madunung sa kanyu. Madura ti kadunungan sa Idum, ti pag-ingarnan Bantud ni Isaw.

⁹ Takigan sa dala kanyu manga sundalu sa banwa Timan, nakan ngani mamatay kamu tanan ti mag-uli sa Bantud ni Isaw.

Ti Kasalanan manga Taga Idum

¹⁰ “Dahil sa kanyu kahigpitan sa kanyu kalahi, sa linahi ni Hakub, miuli kamu sa kakay-ahan ag rurisun hanggan aban.

¹¹ Pinabay-anan lang niyu ti Hirusalim pagka ginira iba nasyun. Pinabay-anan lang niyu bul-un kanda manga kasiyunan ag inayaw-ayaw sa panab-anan lunggungan. Kamu ga manga kalaban diman Israil.

¹² Balaw kamu dapat nagbaya sa udas kadamhakan niyu manga linahi taga Huda. Balaw kamu dapat nagbaya sa udas nida pagkaruris. Ag balaw kamu dapat nagpadayaw sa udas nida kakurian.

¹³ Balaw kamu dapat sinmulud sa banwa niku manga nasakupan sa udas nida kadamhakan ag nam-ul kanda manga kasiyunan. Ag balaw kamu dapat nagbaya sa udas nida magkakurian.

¹⁴ Balaw niyu dapat pinuutan sa manga pagsalakan dalan hampay matyun ti manga nakapalagiw ginan sa Hirusalim. Ag balaw dapat niyu sida ipinakaun sa manga kalaban sa udas nida kakurian.

Parusahan Diyus ti manga Nasyun

¹⁵ “Balaw mana niyu binwat tunda sa Hirusalim, dahil arani yi ti sirang pagsintinsiya niku sa tanan nasyun. Nu hintay kanyu binwat sa iba, katida diman waydi kang buwatun sa kanyu. Nu kabitay kanyu nagkilala sa iba, katida diman waydi kang kumilala sa kanyu.

¹⁶ Nakan ngani nu kabitay pinakurian kang manga nasakupan sa kang banal pag bantud, parusahan diman parargu ti tanan pag nasyun. Masyadu gid pag parusa ti ipakaun niku sa kanda tugka sa matabu sida tanan.

Manalu ti Israil

¹⁷ “Dapat may masawad di manga Israilita sa Bantud Siun, ag bumaliw banal maan inda pag rugar. Maiuli di sa manga linahi ni Hakub ti manga daan nida magkaapu pag daga.

¹⁸ Ti manga linahi nida ni Hakub ni Husi bumaliw ga apuy maghirut sa linahi ni Isaw, parihu sa mag-irub sa dayami. Udyi may masawad sa linahi ni Isaw.” Pihu gid matupad inda, dahil aku, ti Panginuun, ti magbagaw inda.

¹⁹ “Sakupun manga taga Nigib ti Bantud ni Isaw, ag sakupun manga mag-uli sa tagudtud sa isalpan ti manga Pilistiyu. Sakupun diman manga Israilita ti daga Ipraim hanggan Samarya, ag sakupun waydi Binhamin ti Gilyad.

²⁰ Sakupun kayamuan manga Israilita ginan sa pagkabihag ti Kanaan tugka sa Saripta. Ti manga taga Hirusalim nabihag sa Siparad sakupun waydi nida ti manga banwa sa Nigib.

²¹ Tumukad sa Bantud Siun ti manga manugpalpas hampay pamahalaan ti manga tawu mag-uli sa Bantud ni Isaw. Ag aku, ti Panginuun, ti humari.”