Titu 3 - Hanunuu

Ti manga Ugali manga Napasakup sa kan Hisus

¹ Paalalahani nimu ti manga patar-ari pagpasakup sida sa manga pangulu hanggan sa manga may kangaranan. Pagpirmi daan alistu kanda naisipan sa magbuwat mayad.

² Amparaha nimu sida magbagaw daut una sa kantapu. Iwasi nida ti mag-arawayan. Kailangan sida pagmaalumanay, lubus galanga nida ti tanan tawu.

³ Nu kaybi waya kita diman nagsimray sa dalan, kurang kita sa intindi, manga palasupladu kita, ga panawuhun kita nita sadili kagustuhan naisipan hanggan tanan kalasi kasayahan. Ati katpung may ugali diman kita magkutub ag maghamnu galit ag pirmi kita kinagalitan manga iba. Nagkalagalitan diman kita sa usa kag sa usa.

⁴ Dapat taynguna ipinaburayhaw Diyus kay pangaawa hanggan kay pagmahal sa manga tawu. Siya ngani kanta Manugribri.

⁵ Nakan irinibri niya kita, balaw dahil sa kanta sadili buwat mayad nu unman angay lang sa kay pangaawa. Irinibri niya kita, linumpiyu kita sa danum sa katpung kita inanak inuman ag binag-u kita Ispiritu Banal.

⁶ Ilinubus Diyus sa kanta ti Ispiritu Banal ginan sa kan Hisu-Kiristu sa kanta Manugribri.

⁷ Dahil sa kay pangaawa sa kanta nakan kita kay pagkilalan-un manga matadlung ag may pag-asa diman kita matanggap nita ti buhi unman may katapusan.

⁸ Inda pag manga adal imaw ti katutuuhanan. Nakan ngani kang gustu pagkasipag kawu itudlu nimu inda hampay ti manga magsarig sa Diyus handa kanda naisipan sa pagbuwat mayad. Inda pag manga paanyu imaw ti pinakamayad ag mapakinabangan tanan tawu.

⁹ Iwasan nimu ti manga dibati unman may pulus, ti manga tultulanun aba pag listahan nida manga ginurang, ti maglalabanan hanggan mag-arawayan tungkul sa Kasuguan. Dahil ti katunda unman makinabangan, unman diman may pulus.

¹⁰ Una si unu pag tawu tigpagulu tigpaaway sa manga iba tawu danga yi dap magpakiusa kawu sa kanya nu sinabihan nimu tugka sa ikadwa pag sabi.

¹¹ Dahil alam nimu nu katunda ti tawu magtikis yi siya magbuwat kasalanan. Alam diman niya daut kay pagbuwatun.

Manga Pangatapusan pag Bilin

¹² Kang ipaasan si Artimas aw ngatay si Tikiku. Nu rumas-ug asan, pilit gid duy lumuwang kawu kadali sa kangku sa banwa Nikupulis. Kang gayak ati dap aku sa Nikupulis hanggan sa udwaya lumawuy ti amihanun.

¹³ Danga nimu pabay-ani, awati di gid nimu si Aturni Sinas hanggan si Apulus hampay balaw maatrasadu kanda maglakaw. Pihua gid nimu pagkang-ud kanda manga balalunun.

¹⁴ Tudlui gid nimu kanta manga kaibahan asan hampay gamitun nida ti kada udas sa tarabahu ikabuhi nida ag hampay makaawat diman sida sa manga may kakurangan.

¹⁵ Pagpaingan-un kawu tanan niku manga kaibahan nu kabitay waydi kawu asan baliwa. Ipadakit waydi nimu kang kamusta asan sa tanan magsarig pag manga patar-ari. Pagsa kanyu tanan ti papalad Diyus.