Titu 2 - Hanunuu

Ti Matadlung pag Tudlu

¹ Kawu bay kailangan pagpaliwanag sa manga tawu tunda kang-ud pag tudlu.

² Pagkumun kawu sa manga gurangun pag lalaki, pagmapinigilun sida, pagmahusay, pagmaalumanay kanda manga pag-iisip. Pag-ugali sida sa maayus angay sa kanda pagsarig, pag mapagmahal sida, pagmatiniisun.

³ Katunda diman pagkumun kawu sa manga gurangun pag babayi, kailangan ipakakit nida kanda maggalang sa Panginuun hanggan sa tawu, danga sida parabangdan sa tawu, danga sida magkadara sa manga irinmanun, bagkus kailangan pagtudlu sida sa mayad.

⁴ Kailangan kanda tudluan ti manga babayi udwaya may idad dugay hampay sida magmahal sa kanda asawa hanggan sa kanda manga anak.

⁵ Pagpirmi sida maalumanay, pagmalinis kanda manga ugali, pagmasipag sa buruwatun sa sulud balay, pagkaayad kanda manga nabubut-un, pagpasakup sida sa kanda manga asawa hampay unman may pag-ilibak ti manga tawu laban sa Bagaw Diyus.

⁶ Paanyui waydi nimu ti manga lalaki udwaya may idad dugay. Pagmapinigilun sida sa kanda sadili.

⁷ Sa tanan nimu buruwatun pag may makitan sida marinu pag mustara. Pagmatinupadun kawu sa kanmu magtudlu, danga isipun manga iba kuntay hakut lang ti kanmu pagsabihun.

⁸ Pagpirmi gid hustu angay sa katutuuhanan ti kanmu pagsabihun hampay unman may ikasabi una si unu sa kanmu pagbagawun. Nu katida mangay-a kanta manga kalaban dahil unman may tultulun sida laban sa kanta.

⁹ Paanyui diman waydi nimu ti manga panawuhun. Pagmasurundun sida sa kanda amu sa tanan nida tarabahu, danga sa kalugusan. Intindiha nida kanda pagsirbi hampay kang-ud.

¹⁰ Sabihi nimu sida danga maggawhin. Kailangan paglubus masarigan sida hampay sa tanan nida ugali pag-ipakakit nida ti kaayadan kay pag-itudlu Diyus imaw kanta Manugribri.

¹¹ Dahil ipinakakit Diyus kay pangaawa sa ikaribri tanan tawu.

¹² Inda pag pangaawa ti magbutung sa kanta hampay tayakan ti daut pag ugali hanggan ti irisipun makasadili angay sa ugali kalibutan. Bag-u makaugali kita mahusay, matadlung ag angay sa kagustuhan Diyus sitay sa kalibutan.

¹³ Paggagadun nita ti pihu gid mangyari aban, ti madayaw pag kaudasan nu mihayag si Hisu-Kiristu sa karaw-an niya kadayawan. Siya yi ngani kanta makamaskihan pag Diyus hanggan Manugribri.

¹⁴ Ipinakaun niya kay sadili hampay lukatun niya kita sa tanan nita kasalanan, agud kita kay yi nasakupan, malumpiyu ag magkaibug magbuwat mayad.

¹⁵ Itudlu yi ngani nimu inda tanan, ilubus nimu kanmu karampatan sa kanmu magparig-un hanggan sa kanmu magtamyaw sa manga manugpatingi. Danga pakan-an nimu sida kaluagan hampay maghakut diman sa kanmu.