Titu 1 - Hanunuu

¹ Inda ti may surat si Pablu, kay panawuhun Diyus ag apustul ni Hisu-Kiristu. Sinugu aku hampay parig-unun ti pagsarig manga pinili Diyus ag hampay itudlu sa kanda ti katutuuhanan nita surundanun,

² agud magsarig sida sa buhi unman may katapusan. Udwaya linalang ti kalibutan daan di itinaratu Diyus ti buhi unman may katapusan. Ti Diyus unman madunung magpudil.

³ Sa kay taning pag udas ipinaburayhaw Diyus inda pag barita bag-u kay iinintirga sa kangku hampay kang itudlu sa manga tawu angay sa kay bilin Diyus, imaw yi ngani kanta Manugribri.

⁴ Inda kang surat tabug sa kanmu, Titu, dahil kawu kang pinagkaanak, usa kita sa kanta pagsarig. Pagsa kanmu ti papalad hanggan ti kahusayan ginan sa Diyus Ama ag ginan sa kan Kiristu Hisus, sa kanta Manugribri.

Kay manga Buruwatun ni Titu sa Kirita

⁵ Tinayakan niku kawu sa Kirita hampay ayusun nimu ti manga buruwatun udwaya namhan, pilian nimu manga manug-asiwa ti iglisya sa kada rugar ga kang diman ibinilin sa kanmu.

⁶ Ti kailangan nimu piliun tunda unman may ikasaway, usa lang kay asawa, kay manga anak magpasakup waydi sa Panginuun, mabuut kanda ugali ag masurundun.

⁷ Kailangan gid unman may ikasabi sa manug-asiwa iglisya. Ti manug-asiwa iglisya imaw ti piniyaran buruwatun Diyus. Kailangan siya unman palabi-labihun, unman waydi arisgadu, balaw maglangu, balaw magalitun, balaw daluk,

⁸ ag balaw waydi mag-irang kay balay. Kailangan siya maraibgun sa mayad, mapinigilun sa kay sadili, matinupadun sa kay kaparihu tawu, masurundun sa Diyus, mapinasunaidun sa kay sadili.

⁹ Kailangan siya marig-un kay magtupad sa tutuu pag Bagaw Diyus angay sa itinudlu sa kanya hampay mitudlu maan niya sa manga iba sa ikarig-un nida ag hampay ipagpakilala diman waydi niya ti salan manga tawu maglaban sa Mayad pag Barita.

¹⁰ Mayamu yi tiglaban sa inda pag adal. Pagdayaun nida ti iba, kanda pagtudluan sa manga unman may kabuluhan. Ti kayamuan ay manga Hudiyu ti magtudlu katida.

¹¹ Kailangan sida amparahan sa kanda maglaban hanggan magdaya, dahil pagguluhun nida ti manga magtal-anakan. Basta sida sa kumakit lang kuwarta, pag-itudlu nida ti unman kailangan itudlu.

¹² May usa diman waydi ka purupita sida sa taga Kirita ti magsabi magkun, “Pudil-pudilun ti manga taga Kirita, arisgadu kay ugali, manga bugyahin, daluk-daluk.”

¹³ Balaw salan kay pagsabihun. Nakan paanyuan nimu sida sa mahigpit hampay mangugali sida sa maayus angay sa kanda pagsarig,

¹⁴ ag hampay dayi sida magpaniwala sa manga tultulanun basta-basta manga Hudiyu, danga waydi sida magpaniwala sa paanyu manga tawu magdayu sa katutuuhanan.

¹⁵ Ti tanan manga bagay malumpiyu diman waydi sa tawu nu malumpiyu kay naisipan. Dapat sa manga tawu daut kay naisipan manga unman magsarig sa kan Hisus, unman may bagay malumpiyu, dahil may pag-alalahanun sida kasalanan sa kay naisipan hanggan sa kay tagipusuun.

¹⁶ Ti sabi nida kilala kunu nida ti Diyus, dapat sa kanda tarabahu pag-ipaulam ngap nida ti Diyus. Pagpanab-angan yi sida, dahil sida manga supladu, dayu mahimu sida sa una hintay pag mayad buwat.