Talaghusay 8 - Hanunuu

Minatay ni Gidyun si Siba ag si Salmuna

¹ Taynguna, magkun ti nasakupan Ipraim sa kan Gidyun, “Hintay inda kanmu binwat? Hayga unman nimu kami tinawag katpung nanlaban kamu sa manga Midyanita?” Ag sinisi gid nida si Gidyun.

² Dapat magkun si Gidyun sa kanda, “Ti nabwat niku diit lang gid nu ipaparihu sa nabwat niyu. Una ti diit pag binwat niyu higit waya nu ipaparihu sa tanan binwat nimi magtal-anakan.

³ Ipinatalu Diyus sa kanyu ti manga takinan Midyanita si Urib hanggan si Siib. Malu, unu ti nabwat niku nu ipaparihu ati?” Pagka nasabi inda ni Gidyun nahumpawan sida sa kanda mag-isug.

⁴ Nagdipay si Gidyun ag kay 300 tawuhan sa Sapa Hurdan. Madi magkagasa yi gid sida parargu di gid kanda maglagas sa kanda manga kalaban.

⁵ Pagka nakaras-ug sida sa Sukut, namakaawa si Gidyun sa manga taga ati. Magkun siya, “Pakan-i dap duy niyu kami karan-unun. Magkagasa ag magkalun-us yi gid kami ag kailangan waya nimi lagsun ti duwa ka hari Midyan si Siba ag si Salmuna.”

⁶ Dapat sinmagut ti manga takinan Sukut, “Unman waya ngani niyu nadakup si Siba ag si Salmuna. Hayga pakan-an nimi kamu karan-unun?”

⁷ Magkun si Gidyun, “Katida aw! Nu madakup yi nimi si Siba hanggan si Salmuna, bakulun gid niku kamu dugihan pag manga yangaw.”

⁸ Ati ginan tinmukad sida ni Gidyun sa Pinwil ag imaw diman kay pag-ipakihampang sa manga taga ati, dapat kay sagut nida parihu diman sa sagut manga taga Sukut.

⁹ Magkun si Gidyun sa kanda, “Pagkatapus matalu nimi kanmi kalaban, bumalik kami sitay, ag dautun nimi kanyu bantayaw.”

¹⁰ Taynguna, si Siba ag si Salmun ati sa Karkur kaibahan ti nasawad nida 15,000 sundalu. Manga 120,000 yi ti namatay sa kanda.

¹¹ Parargu sida ni Gidyun sa kanda maglagas. Ati sida lakaw sa rugar manga mag-uli sa turda sa butlakan Nuba ag Hugbiya. Bag-u ginira nida ti manga Midyanita.

¹² Nalagiw si Siba ag si Salmuna, dapat linagas sida ni Gidyun ag dinakup, nakan nataranta ti tanan sundalu nida.

¹³ Pagka pauli yi sida ni Gidyun ginan sa labanan, ati sida lakaw sa Tukadun Hiris.

¹⁴ Nakadakup sida usa ka anak lalaki taga Sukut, ag pinaingana nida nu si unu kay manga takinan sa Sukut. Ag ilinista anak ti ngaran 77 ka takinan sa Sukut.

¹⁵ Pagkatapus inatagan nida ni Gidyun ti manga taga Sukut ag sinabihan, “Magkatandaan aw waya niyu kanyu sinabi sa kangku? Magkun kamu, ‘Udwaya ngani niyu nadakup si Siba ag si Salmuna. Hayga pakan-an nimi karan-unun kanmu magkagasa ag magkalun-us pag manga tawuhan?’ Kainda, indaay yi si Siba ag si Salmuna!”

¹⁶ Bag-u bin-ul ni Gidyun ti manga manugpamahala Sukut ag tinudluan niya sida intindi sa panab-anan pagbakul sa kanda dugihin pag manga yangaw.

¹⁷ Bag-u dinaut niya ti bantayaw sa Pinwil ag pinanmatay ti manga lalaki ati.

¹⁸ Bag-u pinaingana ni Gidyun si Siba ag si Salmuna, “Unu kay histuda manga lalaki kanyu minatay sa Tabur?” Nagsagut sida, “Parihu sa kanmu, ga manga anak hari.”

¹⁹ Magkun si Gidyun, “Manga patar-ari niku sida; manga anak mismu niku ina. Magsumpa aku sa buhi pag Panginuun nu balaw niyu sida minatay, unman diman niku kamu matyun.”

²⁰ Bag-u magkun siya sa kay anak panganay si Hitir, “Matya sida.” Dahil anak waya si Hitir, nadala siya, nakan unman niya ginabut kay baladaw.

²¹ Magkun si Siba ag si Salmuna sa kan Gidyun, “Hayga balaw kawu ti mumatay sa kanmi? Balaw dapat anak ti bumwat inda.” Nakan minatay sida ni Gidyun ag ipinab-ul niya ti manga pamarinu sa liug nida manga kamilyu.

Ti Pinakamarinu pag Rutay ni Gidyun

²² Magkun ti manga Israilita sa kan Gidyun, “Dahil kawu ti nagribri sa kanmi sa manga Midyanita, kawu yi lang ag kanmu manga lahi ti humari sa kanmi.”

²³ Nagsagut si Gidyun, “Balaw aku ngatay kang lahi ti humari sa kanyu nu unman ti Panginuun.

²⁴ Dapat may hagadun lang aku sa kanyu: ti kada usa sa kanyu pag-ayaw sa kangku usa ka aritus nab-ul niyu ginan sa manga Midyanita.” (Ti manga Midyanita magsulung gintu pag aritus angay sa kanda kinaugalian bilang manga Ismailita.)

²⁵ Magkun ti manga tawu, “Hu, pakan-an nimi kawu.” Nanladlad sida usa ka rutay, ag ti kada usa namauli siyun kanda nab-ul aritus ginan sa manga Midyanita.

²⁶ Manga 20 ka kilu ti natipun pag manga gintu aritus tuhay di ti manga pamarinu, manga unu, manga rutay manga Hari Midyan kulay dungun, ag ti manga nakabitin sa liug manga kamilyu nida.

²⁷ Ginan sa natipun pag gintu, nagpabuwat si Gidyun usa ka ipud ag ipinauli niya tunda sa kay banwa sa Upra. Nagpatlikud maan ti manga Israilita sa Diyus ag nagsamba sa tunda pag binwat ni Gidyun. Nagbaliw daka pag suduk inda sa kan Gidyun ag sa kay magtal-anakan.

²⁸ Imaw tunda ti tultulanun tungkul sa pagpanalu manga Israilita laban sa Midyan, ag unman yi gid inda nakabangun waya. May kahusayan ti Israil sa sulud upatpulu ka timpu habang buhi waya si Gidyun.

Ti Pagkamatay ni Gidyun

²⁹ Nuli si Gidyun sa kay sadili pag balay ag ati pag nangulian.

³⁰ May 70 siya ka anak dahil mayamu kay asawa.

³¹ May asawa diman siya suruguun ati sa Sikim ag may anak sida lalaki iningarnan niya Abimilik.

³² Gurangun yi si Gidyun pagka namatay siya. Ilinbung siya sa lulubngan niya ama si Huas sa Upra, sa rugar manga lahi ni Abisir.

³³ Udwaya lang dugay namatay si Gidyun, nagpatlikud maan ti manga Israilita sa Diyus ag nagsamba maan sida sa tawu-tawu Baal. Binwat nida diyus si Baal Birit.

³⁴ Kinalimtan nida ti Panginuun nida Diyus imaw ti nagribri sa kanda laban sa kanda manga kalaban sa sangput.

³⁵ Unman gid sida nagpakakit kaayadan sa magtal-anakan ni Hirubaal (si Gidyun diman) sa tanan binwat niya pag manga bagay sa Israil.