Talaghusay 7 - Hanunuu

Tinalu ni Gidyun ti manga Midyanita

¹ Surip waya gid, naglakaw si Hirubaal (imaw diman si Gidyun) kaibahan kay manga tawuhan. Kinmampu sida ati sa may bulbugan Harud. Ti manga Midyanita kinmampu waydi sa kanaway baliwa nida sa karatagan arani sa Bantud Muri.

² Magkun ti Panginuun sa kan Gidyun, “Pagkayamu kanmu kaibahan. Barang umisip sida natalu nida ti manga Midyanita dahil sa kanda sadili kakayahan ag balaw dahil sa kangku.

³ Nakan paingan-a sida nu si unu tig kadala, mahimu yi mighit sitay ginan sa Bantud Gilyad ag pag-uli yi.” Pagka sinabi inda ni Gidyun, nuli ti 22,000, ag 10,000 wadi ti nasawad.

⁴ Dapat magkun ti Panginuun sa kan Gidyun, “Mayamu waya duy ti nasawad. Daran-a sida sa sapa subukun niku ti kumuyug sa kanmu. Nu si unu kang sabihun ti ikuyug nimu, kuyugan nimu. Dapat ti sabihun niku danga pagtabana, danga nimu pagtabana.”

⁵ Nakan dinara ni Gidyun sida sa sapa. Ag ati magkun ti Panginuun, “Pasamanan ti tanan mag-inum danum tinapnay sa dalukap ga idu magsulup ag pasamanan diman ti mag-inum danum maluhudan.”

⁶ May 300 tawu ti nanginum sa kanda manga dalukap, ag ti iba nanginum maluhudan.

⁷ Magkun ti Panginuun sa kan Gidyun, “Sa panab-anan inda pag 300 tawu iribri niku kamu ag papanaluhun sa manga Midyanita. Ti nasawad pag manga tawu paulia yi lang sa kanda manga rugar.”

⁸ Nakan pinauli sida ni Gidyun pagkatapus tinayakan nida kanda manga balun ag manga budyung; ti nasawad 300 tawu. Taynguna, ti kampu manga Midyanita ati sa karatagan, sa kanda lang lawud.

⁹ Sa ati pag yabi, magkun ti Panginuun sa kan Gidyun, “Pag-alistu kawu! Giraha yi niyu ti kampu manga Midyanita dahil ipatalu niku sida sa kanyu.

¹⁰ Dapat nu magkadala kawu man-gira kainda, ibaha kanmu suruguun si Pura ag pag-ati kamu sa kampu Midyanita,

¹¹ ag patingihi niyu nu unu kanda paghampangan. Pihu gid bumisug kanmu nalub-anan gumira dahil sa kanmu madnugan.” Nakan inmatag sida duwa sa katapusan kampu manga Midyanita, nu naan may manga sundalu magguwardiya.

¹² Ti manga Midyanita, kaibahan ti manga Amalikita ag iba waya pag manga nasakupan sa butlakan, nankampu ati sa karatagan parihu kayamu sa apan. Ag kanda manga kamilyu parihu kayamu sa baras sa baybay udyi mabilang.

¹³ Paka ati yi sida ni Gidyun, may nadnugan sida duwa ka tawu magharampangan. Magkun ti usa, “Nanagin-up aku may usa ka tinapay sibada nalilid atabug sa kampu nita ag natamaan ti usa ka turda. Bag-u nagpu inda ag nawayak.”

¹⁴ Sinmagut ti usa, “Inda udyi may iba waya nu unman kay baladaw ni Gidyun, usa ka Israilita kay anak ni Huas. Papanaluhun siya Diyus laban sa manga Midyanita ag sa kanta tanan.”

¹⁵ Pagka nadnugan ni Gidyun ti tagin-up ag kay kahulugan inda, nagdayaw siya sa Panginuun. Bag-u binmalik siya sa kampu manga Israilita ag sinabihan niya kay manga kaibahan, “Pag-alistu yi kamu, dahil papanaluhun kita Panginuun laban sa manga Midyanita.”

¹⁶ Pinarti niya sa tulu ka gurupu ti 300 niya tawuhan, ag pinakan-an niya ti kada usa budyung ag anglit may sulu sa kay sulud inda.

¹⁷ Bag-u magkun siya sa kanda, “Nu ati yi kami sa katapusan kampu kalaban, bantayi niyu aku ag sunda niyu nu unu kang buwatun.

¹⁸ Nu patunugun niku hanggan niku manga kaibahan kanmi manga budyung, imaw diman kanyu buwatun sa sangput kampu, ag pagringgit kamu ka baskug, ‘Para sa Panginuun ag sa kan Gidyun!’ ”

¹⁹ Arani yi karaw-an yabi kay magras-ug ni Gidyun hanggan niya 100 ka kaibahan sa katapusan kampu kalaban. Udwaya dugay nangulublusan ti guwardiya ati. Pinatunug nida ni Gidyun kanda manga budyung ag pinanbasag nida kanda manga anglit.

²⁰ Imaw diman ti binwat duwa ka gurupu. Ag habang paghiyaptan nida wala pag kamang ti sulu ag sa sikun pag kamang ti budyung, magringgit sida, “Manlaban kita para sa Panginuun hanggan para sa kan Gidyun.”

²¹ Ti kada usa nag-alistu sa kanda paratag-an sa sangput kampu, dapat kanda manga kalaban namalalagiwan magriringgitan.

²² Ag habang magtunug ti manga budyung 300 Israilita, pinaaway Panginuun ti manga tawu sa sulud kampu. Ti iba nalagiw tag sa Bit Sita arani sa Sirira tugka sa katugkaan Abil Mihula arani sa Tabat.

²³ Ipinatawag ni Gidyun ti manga Israilita ginan sa manga lahi ni Niptali ag ni Asir, ag sa buu lahi ni Manasis, ag ipinalagas sa kanda ti manga Midyanita.

²⁴ Nanpasugu diman si Gidyun sa manga manugtultul sa manga mag-uli sa kabantudan Ipraim hampay sabihan sida pagbantay sa Sapa Hurdan tugka sa sapa Bit Bara hampay balaw makadipay ti manga Midyanita. Sinunud inda tanan lalaki sa Ipraim ag binantayan nida ati pag manga rugar.

²⁵ Nabihag nida ti duwa ka takinan Midyanita si Urib ag si Siib. Minatay nida si Urib sa may batu iningarnan pagka sa uryan Batu ni Urib, ag si Siib minatay nida sa pirigsan ubas iningarnan pagka uryan Pirigsan Ubas ni Siib. Ag linagas di gid nida ti manga Midyanita. Pagkatapus dinara nida kay ulu ni Urib ag ni Siib sa kan Gidyun ati sa dipay Sapa Hurdan.