Talaghusay 6 - Hanunuu

Si Gidyun

¹ Nagbuwat maan kadautan ti manga Israilita sa magbantay Panginuun, nakan ipinasakup sida Panginuun sa manga Midyanita sa sulud 7 ka timpu.

² Masyadu gid maisug ti manga Midyanita, nakan napilitan ti manga Israilita patagu sa manga bantud, sa manga lukib, ag sa iba waya manga tagu pag rugar.

³ Nu tig-taranum yi ti manga Israilita, pagsalakayun sida manga Midyanita, Amalikita, ag iba waya manga nasakupan sa butlakan.

⁴ Inda sida nagkampu sa rugar manga Israilita, ag dinaut nida ti manga tanum manga Israilita tugka sa Gasa. Pagbul-un nida ti tanan karanidu, baka, hanggan asnu ag unman gid sida may pag-isawad para sa manga Israilita.

⁵ Magsalakay sida dara kanda manga turda ag manga hayup parihu kay kayamu sa manga apan. Udyi gid mabilang kanda kayamuun hanggan kanda manga kamilyu. Dinaut nida ti rugar manga Israilita.

⁶ Nagbaliw kaawaawa ti kahamtangan manga Israilita dahil sa manga Midyanita, nakan nanhagad sida awat sa Panginuun.

⁷ Pagka nandangup sida sa Panginuun,

⁸ pinadaran-an sida Panginuun usa ka purupita magkumun tag sa kanda, “Inda ti pagsabihun Panginuun, ti Diyus Israil: ‘Ilinuwas niku kamu sa Ihiptu nu naan kamu pag binwat panawuhun.

⁹ Irinibri niku kamu sa manga Ihipsiyu ag sa tanan kalaban niyu. Kanyu kalaban ipinatabug niku sa kanyu ag ipinakaun niku sa kanyu kanda manga daga.

¹⁰ Magkun aku sa kanyu aku ti Panginuun niyu Diyus ag dapat balaw kamu magsamba sa manga diyus manga Amuriyu kanda rugar imaw ti kanyu pag-ulian kainda. Dapat unman kamu nagpatingi sa kangku.’ ”

¹¹ Bag-u rinmas-ug ti anghil Panginuun sa Upra. Tinmukaw siya ati sa sirung kayu insina ni Huas kay lahi ni Abisir. Si Gidyun kay anak ni Huas ati katpung maggiuk tirigu sa may pirigsan ubas hampay balaw makitan manga Midyanita ti tirigu.

¹² Nagpakakit sa kanya ti anghil Panginuun ag magkun, “Maisug ag mabaskug pag tawu, kaibahan nimu ti Panginuun.”

¹³ Nagsagut si Gidyun, “Nu kaibahan nimi ti Panginuun, hayga unman siya magbuwat manga makadululaw parihu sa kay binwat kaybi pagka ipinalwas niya sa Ihiptu kanmi manga ginurang, angay sa kanda sinabi sa kanmi? Dapat taynguna pinabay-anan yi kami Panginuun ag ipinahintulut sa manga Midyanita.”

¹⁴ Bag-u magkun ti Panginuun sa kan Gidyun, “Hinan yi, ag gamita kanmu buu kabisugan sa pagribri sa Israil ginan sa manga Midyanita. Aku gid ti magsugu sa kanmu.”

¹⁵ Nagsagut si Gidyun, “Dapat, Panginuun, kabitay niku miribri ti Israil, dahil kanmi magtal-anakan imaw ti pinakamalumuy sa lahi ni Manasis ag aku waya gid ti unman may pulus sa kanmi magtal-anakan.”

¹⁶ Sinmagut ti Panginuun, “Awatan niku kawu, ag rurisun nimu ti manga Midyanita ga sa maglaban kawu sa usa lang ka tawu.”

¹⁷ Magkun si Gidyun, “Nu magkasulung kawu sa kangku, pakan-i aku tanda kuntay kawu gid ungud ti nagsugu sa kangku.

¹⁸ Danga dap duy kawu mag-ighit dahil mam-ul aku kang ihandug sa kanmu.” Magkun ti Panginuun, “Alagdun niku kawu.”

¹⁹ Nuli si Gidyun ag nangiyaw usa ka anak kambing, ag namuwat siya tinapay unman may pamadaka. Pagkatapus, ipinauli niya ti taguban sa alat ag ti sabakan sa anglit, dinara niya ti karan-unun sa anghil ati sa sirung puun kayu insina.

²⁰ Magkun sa kanya ti anghil Diyus, “Tungbawan sa babaw batu ti taguban hanggan ti tinapay, ag buhusi sabakan.” Katida ngani kan Gidyun binwat.

²¹ Bag-u tinanggap anghil Panginuun ti karan-unun, sa panab-anan niya pudpud sugkud paghiyaptan. Kadaka lang inmapuy ginan sa batu, ag inirub apuy ti taguban ag tinapay. Bag-u nadura ti anghil Panginuun.

²² Napatunayan ni Gidyun kay nakitan anghil gid waydi Panginuun, magkun siya, “Panginuun Diyus nakitan niku kanmu anghil ag nagkaatubang gid kami.”

²³ Dapat sinabihan siya Panginuun, “Danga kawu magkataranta. Danga kawu magkadala. Balaw kawu mamatay.”

²⁴ Nagpatindug ati si Gidyun harandugan para sa Panginuun ag iningarnan niya inda “Magpakaun Kahusayan ti Panginuun.” Ag tugka kainda asan di inda pag harandugan ati sa Upra, sa rugar manga lahi ni Abisir.

²⁵ Sa ati diman pag yabi magkun ti Panginuun sa kan Gidyun, “Bul-a nimu ti ikadwa sa pinakamarinu pag tudu baka nimu ama, kay pitu yi ka timpu. Bag-u dauta ti harandugan ni Baal ti ipinatindug nimu ama, dauta diman ti tulduk tanda diyusa si Asira asan sa tupad harandugan.

²⁶ Pagkatapus, pagpabuwat kawu hustu pag harandugan para sa kangku, ti Panginuun nimu Diyus, sa tungud bantud inda. Bag-u ihandug nimu sa kangku ti tudu baka bilang handug pagsunugun. Ag gamita pan-gatung ti tulduk ni Asira kanmu pinanpulud.”

²⁷ Nakan iniba ni Gidyun kay sampulu ka suruguun ag binwat niya ti isinugu Panginuun sa kanya. Dapat binwat niya inda sa yabi dahil magkadala siya sa kay magtal-anakan ag sa kay kasimanwa.

²⁸ Pagka surip, nakitan manga tawu daut yi ti harandugan ni Baal, ag pulud-pulud yi ti tulduk ni Asira ag imaw yi ti ipinan-gatung sa baka pag-ihandug sa bag-u pag harandugan.

²⁹ Nagparaingan-an sida nu si unu ti nagbuwat tunda. Inusisa nida inda ag naalaman nida si Gidyun anak ni Huas ti nagbuwat tunda.

³⁰ Nakan sinabihan nida si Huas, “Palwasan kanmu anak sitaay! Dahil matyun nimi siya, dahil dinaut niya ti harandugan ni Baal ag pinanpulud ti tulduk ni Asira sa kay tupad.”

³¹ Nagsagut si Huas sa manga tawu magkagalit masangputan sa kanya, “Mag-aratwan aw lugud kamu para sa kan Baal? Pagkampihan gid aw lugud niyu siya? Ti magkampi sa kan Baal imaw ti dapat matyun sa inda pag daga. Nu si Baal tutuu gid pag Diyus, dapat iribri niya kay sadili sa nagdaut sa kay harandugan.”

³² Siyun ginan iningarnan si Gidyun “Hirubaal” kay ibug sabihun, “Pabay-ani idipinsa ni Baal kay sadili,” dahil dinaut niya ti harandugan ni Baal.

³³ Taynguna nagkarausa ti manga Midyanita, Amalikita, ag iba waya manga nasakupan sa butlakan sa paglaban sa Israil. Nandipay sida sa Sapa Hurdan ag nagkampu sa Luung Hisriil.

³⁴ Giniyahan Ispiritu Diyus si Gidyun ag ipinatunug niya ti budyung hampay tawagan ti manga lahi ni Abisir para sumunud sa kanya.

³⁵ Nanpadara siya manga manugtultul sa buu lahi ni Manasis, ag hanggan sa manga lahi ni Asir, Sabulun ag Niptali, hampay tawagan sida kumuyug sa labanan. Ag kinmuyug sida sa kan Gidyun.

³⁶ Magkun si Gidyun sa Diyus, “Magsabi kawu gamitun nimu aku para iribri ti Israil.

³⁷ Taynguna mamauli aku bulbul karanidu sa daga paggiukan nimi tirigu. Nu mabasa ngani inda tun-ug una mamara ti daga, maalaman niku iribri nimu ti Israil sa panab-anan niku kamang, angay sa kanmu sinabi.”

³⁸ Ag katida ngani ti nangyari. Kinaaldawan, surip waya gid nipulaw si Gidyun ag bin-ul niya ti bulbul karanidu ag pin-ga, ag napnu gid ti usa ka malukung.

³⁹ Bag-u magkun si Gidyun sa Diyus, “Danga lang duy kawu magkaisug sa kangku; may usa wadi aku ka hagadun sa kanmu. Gustu niku mamara inda pag bulbul karanidu ag mabasa tun-ug ti daga sa sangput inda.”

⁴⁰ Pagka sa yabi, binwat tunda Diyus. Namara ti bulbul karanidu dapat nabasa tun-ug ti daga sa sangput inda.