Talaghusay 5 - Hanunuu

Kay Kanta ni Dibura ag ni Barak

¹ Sa tunda pag sirang nanalu sida, nanganta si Dibura hanggan si Barak kay anak ni Abinuam. Inda kanda kinanta:

² Dayawun ti Panginuun! Dahil nanguna ti manga takinan Israil sa paglaban, ag buluntad nagsunud sa kanda ti manga tawu.

³ Pagpatingi kamu manga hari hanggan manga takinan! Manganta aku manga pagdayaw sa Panginuun, ti Diyus Israil!

⁴ Panginuun, pagka inmighit kawu sa Bantud Siir, pagka linmuwas kawu sa daga Idum, natandug ti kalibutan ag inmuran mabaskug.

⁵ Natandug ti manga bantud sa atubangan nimu, Panginuun. Kawu ti Diyus Israil nagpaburayhaw kanmu sadili sa Bantud Sinai.

⁶ Katpung panahun ni Samgar anak ni Anat, hanggan katpung panahun ni Hail, unman may maglakaw sa manga baklayan. Ti manga magbaklay ati maglakaw sa palihud-lihud pag manga dalan.

⁷ Pira wadi ti mag-uli sa manga banwa Israil, tugka sa rinmas-ug kawu, Dibura, kawu pagkilalan-un ina Israil.

⁸ Pagka nansamba ti manga Israilita sa manga bag-u diyus, rinmas-ug sa kanda ti gira. Dapat sa 40,000 Israilita unman una di usa ti may imaw panangga ngatay bangkaw.

⁹ Magbaya gid kang tagipusuun sa manga takinan Israil ag sa manga Israilita buluntad magsunud sa kanda. Dayawun ti Panginuun!

¹⁰ Kamu pag manga mayaman masakyan sa malagti pag manga asnu ag sa marinu pag turukawan tunda, ag kamu pag manga pugri maglakaw lang, pagpatingi kamu!

¹¹ Patingihi niyu ti manga tultulanun manga tawu sa sangput manga bubun. Pag-itultul nida ti manga panalu Panginuun sa manga sundalu sa Israil. Bag-u namatakda ti nasakupan Panginuun sa may puwirtahan banwa magkun,

¹² “Abala yi Dibura, manlakaw kita habang magkanta manga pagdayaw sa Diyus. Abala yi Barak anak ni Abinuam, bihaga kanmu birihagun.”

¹³ Ti manga nasawad buhi sa nasakupan Panginuun linmus-ug kaibahan niku hampay girahun ti manga kilala ag makapangyarihan pag manga tawu.

¹⁴ Ti iba sa kanda ginan sa Ipraim — ti daga magkaapu kaybi manga Amalikita — ag iba waya gid ginan sa lahi ni Binhamin. Kinmuyug diman sa paglaban ti manga kumandir sundalu ni Makir hanggan ti lahi ni Sabulun.

¹⁵ Kinmuyug diman sa kan Dibura ag sa kan Barak ti manga takinan lahi ni Isakar atabug sa karatagan. Dapat ti lahi waydi ni Rubin unman may pagkarausa, nakan unman sida makadisisyun nu manguyug sida ngatay unman.

¹⁶ Lahi ni Rubin, patayak lang aw lugud kamu kaibahan manga karanidu? Gustu lang aw niyu mamatingi sa magtawag manga manugbantay sa kanda manga karanidu? Unman gid ungud kamu may pagkarausa, nakan unman kamu makapasya nu manguyug kamu ngatay unman.

¹⁷ Napatayak diman ti lahi ni Gad sa butlakan Hurdan, ag ti lahi waydi ni Dan napatayak sa kanda buruwatun sa manga barku. Ti lahi ni Asir napatayak sa kanda pag-ulian arani sa dagat.

¹⁸ Dapat ibinuhis lahi ni Sabulun ag ni Niptali kanda buhi sa paglaban.

¹⁹ Nagras-ug ti manga hari manga Kananiyu ag nanlaban sa manga Israilita ati sa Taanak ati sa saruy Sapa Migidu, dapat una di usa ka pilak unman sida may nab-ul.

²⁰ Balaw lang ti Israil ti nanlaban laban sa kanda ni Sisara, nu unman hanggan diman ti manga pamgasan.

²¹ Inanud sida sa Luung Kisun, ti dugay yi pag luung. Pumarargu aku sa paglaban sa panab-anan kabisugan Panginuun.

²² Ag taynguna madnugan ti tagalpak lulud manga kabayu.

²³ Bag-u magkun ti anghil Panginuun, “Saadan ti Mirus! Saadan gid masyadu ti manga mag-uli siyun dahil unman sida nangawat katpung nanlaban ti Panginuun sa manga makapangyarihan pag tawu.”

²⁴ Mapalad gid si Hail kay asawa ni Hibir usa ka Kiniyu sa tanan pag babayi mag-uli sa manga turda.

²⁵ Katpung nanhagad danum si Sisara, gatas kay ipinakaun masukadan sa mahalaga pag sukadan.

²⁶ Bag-u namuul siya martilyu ag pamatuk sa turda ag ipinatuk sa ulu ni Sisara.

²⁷ Ag namatay si Sisara mabugtangan sa malulud ni Hail.

²⁸ Kay ina ni Sisara mabantayan sa gaha ag unman makaagwanta. Nagpaingana siya nu hayga udwaya magras-ug kay anak.

²⁹ Nagsagut sa kanya kay madunung ag may kadayawan pag manga kababayihan, ag imaw diman ngani kay pagpakasabihun sa kay sadili:

³⁰ “Barang nadugay sa pagbuul ag sa paghuray manga bagay kanda naagaw sa kanda manga kalaban: barang usa ngatay duwa ka babayi para sa usa ka sundalu, mahalaga pag manga rutay para sa kan Sisara, ag marinu pag manga rutay binurdahan para sa kangku.”

³¹ “Nakan Panginuun, mana maruris ti tanan nimu manga kalaban. Dapat mana ti manga magmahal sa kanmu bumaliw parihu sa init magsinggit marayaw gid.” Ag may kahusayan sa Israil sa sulud upatpulu ka timpu.