Talaghusay 4 - Hanunuu

Si Dibura ag si Barak

¹ Pagka namatay si Ihud, nagbuwat maan kadautan ti manga Israilita sa magbantay Panginuun.

² Nakan ipinasakup maan sida Panginuun sa kan Hari Habin taga Hasur, usa ka hari manga Kananiyu. Ti takinan manga sundalu ni Habin si Sisara mag-uli sa Harusit Haguyim.

³ May 900 kalisa baul si Habin. Ag masyadu gid kay paghigpit niya sa manga Israilita sa sulud duwapulu ka timpu. Nakan naghagad maan awat ti manga Israilita sa Panginuun.

⁴ Sa ati pag panahun, si Dibura ti takinan Israil. Usa siya ka purupita Diyus ag asawa ni Lapidut.

⁵ Nu may arayusun ti manga Israilita sa kanda manga unman pagkaraintindihan, mag-atag sida sa kan Dibura sa sirung puun kayu Palma ni Dibura, sa karaw-an Rama ag Bitil sa kabantudan Ipraim.

⁶ Sa usa ka sirang, ipinatawag ni Dibura si Barak anak ni Abinuam taga Kadis sakup lahi ni Niptali. Pagras-ug ni Barak, magkun si Dibura sa kanya, “Ti Panginuun, ti Diyus Israil, magsugu sa kanmu pagbuul kawu 10,000 lalaki sa manga lahi ni Niptali ag ni Sabulun ag daran-a sida sa Bantud Tabur.

⁷ Garyahun niku si Sisara, ti takinan manga sundalu ni Habin, atag sa Luung Kisun kaibahan kay manga sundalu ag manga kalisa. Ag ati panaluhun niku kamu laban sa kanda.”

⁸ Magkun si Barak sa kan Dibura, “Manlakaw aku nu manguyug kawu; dapat nu balaw kawu manguyug, dayu aku manlakaw.”

⁹ Nagsagut si Dibura, “Hu, kumuyug aku sa kanmu; dapat ti kadayawan balaw sa kanmu dahil ipatalu Panginuun si Sisara sa usa ka babayi.” Nakan kinmuyug si Dibura sa kan Barak ag nag-ati sida sa Kadis.

¹⁰ Ati ipinatawag ni Barak ti manga lahi ni Niptali ag ni Sabulun, ag 10,000 tawu ti nagkuyug sa kanya. Kinmuyug diman sa kanya si Dibura.

¹¹ Sa ati pag udas, si Hibir usa ka Kiniyu namatindug kay turda arani sa daka pag kayu sa Saananim arani sa Kadis. Napablag siya sa iba pag manga Kiniyu manga lahi ni Hubab bayaw ni Muysis.

¹² Taynguna, sinabihan si Sisara kuntay nag-atag sa Bantud Tabur si Barak.

¹³ Nakan tinipun ni Sisara ti 900 niya ka kalisa baul, hanggan ti tanan niya manga sundalu. Bag-u linmakaw sida ginan sa Harusit Haguyim atabug sa Luung Kisun.

¹⁴ Magkun si Dibura sa kan Barak, “Alistu, lakaw yi, dahil imaw yi inda pag sirang papanaluhun kawu Panginuun laban sa kan Sisara. Pangunahan gid kawu Panginuun.” Nakan linmus-ug si Barak sa Bantud Tabur kaibahan kay 10,000 sundalu.

¹⁵ Pagka nansalakay yi sida ni Barak, linitu Panginuun si Sisara hanggan ti tanan niya manga manugkalisa ag manga sundalu. Bag-u linmuksu si Sisara sa kay kalisa ag nalagiw.

¹⁶ Linagas ni Barak ti manga sundalu ni Sisara hanggan kay manga manugkalisa tugka sa Harusit Haguyim ag pinanmatay sida tanan. Unman gid may nasawad sa kanda una di usa.

¹⁷ Si Sisara nalagiw atabug sa turda ni Hail asawa ni Hibir, dahil magkakilala si Hari Habin taga Hasur ag kay magtal-anakan ni Hibir usa ka Kiniyu.

¹⁸ Sinulang ni Hail si Sisara ag sinabihan, “Abala, pagsulud kawu sa kang turda ag danga kawu magkadala.” Nakan nagsulud si Sisara ag tinabunan siya kumut ni Hail hampay itagu.

¹⁹ Magkun si Sisara sa kan Hail, “Painuma aku danum. Magkauwaw gid aku.” Nakan binungka ni Hail ti paknul sukadan gatas ag pinainum si Sisara, bag-u tinabunan maan niya siya.

²⁰ Magkun si Sisara, “Pagtindug lang kawu sa may sabian turda ag nu may rumas-ug ag mamaingana nu may iba tawu atay sabihun nimu unman.”

²¹ Dahil sa subra budlay ni Sisara, nakaturug siya mahamuuk. Pagka nakitan ni Hail maturugan yi si Sisara, namuul siya martilyu hanggan pamatuk turda bag-u amat-amat napakarani sa kan Sisara. Bag-u pinulpug niya ti pamatuk sa kay dungandungan ni Sisara tugka sa linmapus ag nilubung sa daga, ag namatay si Sisara.

²² Pagka rinmas-ug si Barak maghanap sa kan Sisara, sinulang siya ni Hail, ag sinabihan, “Abala, ipakakit niku sa kanmu ti tawu paghanapun nimu.” Nakan kinmuyug si Barak sa kan Hail sa sulud turda. Ag ati nakitan niya si Sisara mabugtangan tigbak yi, may patuk lapus sa kay ulu.

²³ Sa tunda pag sirang, pinanalu Diyus ti manga Israilita laban sa kan Hari Habin usa ka Kananiyu.

²⁴ Parargu kanda paglaban sa kan Habin tugka sa mamatay nida siya.