Talaghusay 3 - Hanunuu

Ti Nasawad pag manga Nasakupan sa Kanaan

¹ Nagsawad ti Panginuun iba ka manga nasakupan sa Kanaan hampay subukan ti manga Israilita balaw nakalakaw sa paglaban sa Kanaan.

² Binwat inda Panginuun hampay tudluan lumaban ti manga linahi Israilita balaw waya nakalakaw inda.

³ Inda ti manga nasakupan isinawad Panginuun: ti manga mag-ulian sa lima ka banwa manga Pilistiyu, ti tanan Kananiyu, ti manga Siduniyu, ag ti manga Hibiyu mag-uli sa manga bantud Libanun, ginan sa Bantud Baal Hirmun tugka sa Libu Hamat.

⁴ Isinawad sida hampay subukan nu ungud tupadun manga Israilita ti manga sugu Panginuun ipinakaun niya sa kanda manga ginurang sa panab-anan ni Muysis.

⁵ Nakan nangulian ti manga Israilita kaibahan ti manga Kananiyu, Hitiyu, Amuriyu, Pirisiyu, Hibiyu ag manga Hibusiyu.

⁶ Pinahintulutan manga Israilita kanda manga anak umasawa sa manga taga ati ag makiusa sa pagsirbi sa kanda manga diyus-diyusan.

Si Utniyil

⁷ Nagbuwat daut ti manga Israilita sa magbantay Panginuun dahil kinalimtan nida ti Panginuun nida Diyus ag nagsamba sa manga tawu-tawu Baal hanggan Asira.

⁸ Dahil siyun, nagalit gid ti Panginuun sa kanda, nakan pinabay-anan sida matalu ni Hari Kusan Ristaim taga Aram Naharaim. Nasakup niya sida sa sulud walu ka timpu.

⁹ Dapat pagka nanhagad awat ti manga Israilita sa Panginuun, pinakan-an niya sida usa ka tawu imaw ti rumibri sa kanda. Siya si Utniyil anak ni Kinas kay ari ni Kalib.

¹⁰ Giniyahan siya Ispiritu Panginuun, ag pinangunahan niya ti Israil. Nakipaglaban siya sa kan Hari Kusan Risataim taga Aram, ag pinanalu siya Panginuun.

¹¹ Nakan may kahusayan sa Israil sa sulud upatpulu timpu. Ag bag-u namatay si Utniyil.

Si Ihud

¹² Nagbuwat maan kadautan ti manga Israilita sa magbantay Panginuun. Dahil siyun, ipinasakup sida Panginuun sa kan Hari Iglun taga Muab.

¹³ Sa awat manga Amunita hanggan Amalikita, ginira ag tinalu ni Iglun ti Israil bag-u sinakup ti banwa Hiriku.

¹⁴ Nasakup sida ni Iglun sa sulud 18 ka timpu.

¹⁵ Nanhagad maan awat ti manga Israilita sa Panginuun, ag pinakan-an niya sida usa ka tawu rumibri sa kanda, si Ihud walahun kay anak ni Gira, ginan sa lahi ni Binhamin. Ipinadara siya manga Israilita sa kan Hari Iglun taga Muab hampay mangayaw buhis Israil.

¹⁶ Bag-u siya linmakaw, namuwat siya usa ka baladaw duwa kay urup manga tunga mitrus kay aba. Ihinigut niya inda sa kay sikun pag balangbang, magkatabunan niya rutay.

¹⁷ Pagka ati yi siya, ipinakaun niya ti buhis sa kan Hari Iglun matabul gid pag tawu.

¹⁸ Pagka niayaw ni Ihud ti buhis, pinauli yi niya kay manga kaibahan nagdara buhis.

¹⁹ Kinmuyug siya sa kanda, dapat pagras-ug nida sa batu may kurti arani sa Gilgal, nagbalik si Ihud sa hari ag magkun, “Mahal Hari, may lihim aku sabihun sa kanmu.” Nakan magkun ti hari sa kay manga suruguun, “Tayaki dap niyu kami.” Ag nighit ngani siyun ginan ti tanan niya manga suruguun.

²⁰ Bag-u nagpakarani si Ihud sa hari matukawan sa kay maramig pag sulud-sulud sa tungud. Magkun si Ihud, “May tultulanun aku sa kanmu ginan sa Diyus.” Pagka tinmindug ti hari,

²¹ ginabut wala kamang ni Ihud ti baladaw asan sa kay sikun pag balangbang, ag binunu niya ti hari sa tiyan,

²² ag linmapus sa kay dayu. Ag dahil matabul ti hari nilubung hanggan ti angkap baladaw. Nakan udyi niya inda hinugut.

²³ Bag-u linmuwas si Ihud sa sulud-sulud ag kay ikinandadu ti manga sabian.

²⁴ Pagka nakaighit yi siya, nagbalik ti manga suruguun hari ag nakitan nida saradu ti manga sabian. Kanda isip sa lantayan lang ti hari.

²⁵ Nakan unman yi lang nida binukasan ti sabian ag nangalagad sida sa luwas. Dapat pagka dugay, udyi sida makaagwanta dahil unman waya pagbukasan hari ti sabian. Nakan bin-ul yi lang nida ti susi ag binukasan ti sabian, ag nakitan nida kanda hari mabugtangan sa salug tigbak yi.

²⁶ Sa ati katpung pag udas sa kay mag-alagad manga suruguun sa pagbukas sabian, si Ihud nakapalagiw yi. Linmawuy siya sa may kurti pag manga batu ag nag-ati sa Sira.

²⁷ Pagras-ug niya ati, nanpatunug siya budyung sa kabantudan Ipraim hampay tawagun ti manga Israilita sa paglaban. Bag-u naglus-ug ti manga Israilita ginan sa kabantudan pagpangunahan ni Ihud.

²⁸ Magkun siya sa kanda, “Pagsunud kamu sa kangku dahil ipatalu Panginuun sa kanta ti manga Muabita kanta kalaban.” Nakan nagsunud sida sa kanya ag sinakup nida ti rugar diripayan manga Muabita sa Sapa Hurdan. Unman sida may pinadipay una di usa ka tawu.

²⁹ Sa tunda pag sirang nakamatay sida manga 10,000 Muabita lunsay mabisug ag maisug. Ag unman gid may nakapalagiw una di usa sa kanda.

³⁰ Nakan nasakup Israil ti Muab sa tunda pag sirang, ag siyun ginan may kahusayan yi ti Israil sa sulud 80 ka timpu.

Si Samgar

³¹ Ti dinmasun sa kan Ihud bilang takinan si Samgar kay anak ni Anat. Irinibri niya ti Israil sa manga Pilistiyu. Manga 600 Pilistiyu kay minatay sa panab-anan niya sugkud paggamitun pantabug baka.