Talaghusay 21 - Hanunuu

Manga Asawa para sa manga Binhaminita

¹ Ati sa Mispa nangaku ti manga Israilita balaw gid nida ipaasawa kanda manga anak babayi sa manga Binhaminita.

² Bag-u nag-atag ti manga Israilita sa Bitil ag nanlumi mabaskug sa atubangan Diyus tugka sa yabi.

³ Magkun sida, “Panginuun, Diyus Israil, hayga lugud nangyari inda? Taynguna nabuhinan yi usa ka linahi ti Israil!”

⁴ Pagkasurip, nagbuwat sida harandugan manga handug pagsunugun ag manga handug para sa mayad pag pakiusa sa Panginuun.

⁵ Bag-u nagpaingana sida, “May lahi aw lugud Israil balaw kinmuyug sa kanta katpung nagtipun kita sa atubangan Panginuun sa Mispa?” Sa ati katpung pag udas, nakataratu yi sida matyun ti balaw umatag sa atubangan Panginuun.

⁶ Nanruku gid ti manga Israilita sa kanda kadugu manga Binhaminita. Magkun sida, “Nabuhinan usa ka linahi ti Israil.

⁷ Naan nguna kita pag manhanap pamaasawa sa manga nasawad pag manga Binhaminita, dahil nakataratu yi kita sa Panginuun balaw gid nita ipaasawa sa kanda kanta manga anak babayi?”

⁸ Pagka nagpaingana sida nu may linahi Israil balaw kinmuyug katpung nagtipun sida sa atubangan Panginuun sa Mispa, naalaman nida balaw kinmuyug ti manga taga Habis Gilyad.

⁹ Dahil pagka binilang ti manga tawu, unman may ati una di usa lang ka taga Habis Gilyad.

^10-11 Nakan nagpili ti manga nasakupan 12,000 maisug pag manga sundalu, ag sinabihan sida, “Pag-atag kamu sa Habis Gilyad ag panmatya niyu ti manga taga ati, anak ngatay gurangun, lalaki ngatay babayi, purya lang sa manga daraga.”

¹² Ag ati nakakit sida 400 tugnaw pag daraga ag dinara nida inda sa kanda kampu sa Silu sakup Kanaan.

¹³ Pagkatapus nagpadara ti buu nasakupan Israil manga manugbarita sa manga Binhaminita magpatagu sa Batu Rimun. Sinabihan sida manga manugbarita kuntay alistu yi makiampud sa kanda ti kaparihu nida manga Israilita.

¹⁴ Nakan nag-ululi ti manga Binhaminita ag ipinakaun manga Israilita sa kanda ti manga daraga taga Habis Gilyad. Dapat kurang waya ti manga daraga para sa kanda.

¹⁵ Nanruku gid ti manga Israilita sa nangyari sa manga Binhaminita, dahil binawasan Panginuun ti manga Binhaminita sa manga linahi Israil.

¹⁶ Nakan nanharampangan ti manga manugpamahala sa nasakupan Israil. Magkun sida, “Udyi may nasawad babayi Binhaminita. Unu nguna kanta buwatun hampay makapangasawa ti nasawad nida pag manga lalaki?

¹⁷ Kailangan may manga lahi sida hampay balaw madura ti lahi ni Binhamin.

¹⁸ Dapat balaw diman mahimu ipaasawa nita sa kanda kanta manga anak babayi dahil nakataratu yi kita saadan ti bumuwat inda.”

¹⁹ Bag-u naala-ala nida arani yi maaw ti tinimpu pag pista para sa Panginuun pagganapun sa Silu. (Ti Silu sa kanaway baliwa Bitil, sa salatan baliwa Libuna, ag sa isalpan baliwa dalan ginan sa Bitil atabug sa Sikim.)

²⁰ Sinabihan nida ti manga Binhaminita, “Pagpatagu kamu sa ubasan,

²¹ ag bantayi niyu ti manga daraga taga Silu. Nu lumawuy sida ati hampay manayaw sa pista, pagluwas kamu sa tanman ag masigbuul kamu kanyu asawan-un ag daran-a sa kanyu rugar.

²² Nu manriklamu sa kanmi kanda manga ama ngatay patar-ari lalaki, inda kanmi sabihun sa kanda, ‘Pabay-ani lang niyu sida dahil kurang ti manga daraga nab-ul nimi katpung nan-gira kami sa Habis Gilyad. Unman kamu may saragtun dahil unman diman nagpahintulut asawan-un manga Binhaminita kanyu manga anak babayi.’ ”

²³ Nakan binwat inda manga Binhaminita. Masigbuul sida manga daraga magsayaw, ag dinara pauli bilang asawa nida. Pagras-ug nida sa kanda daga, ipinatindug maan nida kanda manga banwa ag ati nangulian.

²⁴ Nuli diman ti iba waya pag manga Israilita sa kanda sadili daga, ag sa kanda sadili lahi ag magtal-anakan.

²⁵ Sa tunda pag udas, unman may hari ti Israil, nakan makapagustu lang ti kada usa nu unu kanda gustu buwatun.