Talaghusay 20 - Hanunuu

Nag-alistu ti Israil sa Paglaban

¹ Ti tanan Israilita ginan sa Dan tugka sa Biirsiba hanggan ti ginan sa Gilyad nagtipun sa Mispa, sa atubangan Panginuun.

² Ati diman ti takinan kada linahi Israil sa pagtiripun nasakupan Diyus. 400,000 sida tanan pag manga sundalu armadu baladaw.

³ Nakadnug ti manga taga Binhamin kuntay ti kaparihu nida manga Israilita nagtipun sa Mispa. Taynguna nagpaingana ti manga Israilita, “Kabitay nangyari inda pag kadautan?”

⁴ Magkun ti Libita asawa babayi minatay, “Nanlawuy kami mag-asawa sa Gibiya sakup Binhamin hampay ati pag maturug.

⁵ Igu yabi yi, ti dinayunan nimi pag balay pinalibutan manga lalaki taga Gibiya. Matyun mana nida aku; dapat maaw, linugus nida kang asawa tugka sa namatay siya.

⁶ Nakan dinara niku pauli kay bangkay ag pinamulud-pulud ag ipinadara sa 12 ka linahi Israil, dahil masyadu daut ag makakaray-a kanda binwat sitay sa Israil.

⁷ Malu, kita tanan pag manga Israilita, unu kainda kanta buwatun?”

⁸ Nagkarausa ti manga tawu magkun, “Balaw may umuli sa kanta.

⁹ Kaindaay kanta buwatun, manlunggungan kita nu si unu sa kanta ti man-gira sa Gibiya.

¹⁰ Ti ikasampulu pag bahagi tanan lalaki sa kada lahi imaw ti man-asikasu sa karan-unun manga sundalu. Ti nasawad imaw ti manbalus sa taga Gibiya dahil sa makakaray-a pag binwat nida sa Israil.”

¹¹ Nakan nagkausa ti manga lalaki Israil sa paggira sa Gibiya.

¹² Nagsugu manga manugbarita ti manga linahi Israil sa buu lahi Binhamin sa pagsabi, “Hintay inda pag kadautan ti nangyari asan sa kanyu?

¹³ Taynguna, pakan-an niyu sa kanmi ti manga daut pag manga taga Gibiya ti nagbuwat inda, hampay matyun nimi sida para madura inda pag kadautan sa Israil.” Dapat unman binati manga Binhaminita kanda kaparihu manga Israilita.

¹⁴ Bagkus ngap linmuwas sida sa kanda manga banwa ag nagtipun sa Gibiya hampay lumaban sa kanda kaparihu manga Israilita.

¹⁵ Sa tunda diman pag sirang, nakatipun ti manga Binhaminita 26,000 sundalu balaw kaibahan ti 700 pinili pag manga sundalu taga Gibiya.

¹⁶ Inda pag 700 pinili lunsay manga walahun ag kaya pantukun lastiku una lanut buhuk.

¹⁷ Ti manga Israilita waydi, purya sa lahi ni Binhamin, nakatipun 400,000 sundalu anad gid sa girahan.

¹⁸ Nagtukad ti manga Israilita sa Bitil ag nagpaingana sa Diyus nu hintay pag lahi ti un-an man-gira sa manga Binhaminita. Ag angay sa Panginuun, ti lahi ni Huda.

¹⁹ Nakan igu sa sunud pag sirang, surip waya gid nagkampu ti manga Israilita arani sa Gibiya.

²⁰ Bag-u nag-atag sida sa Gibiya hampay lumaban sa manga Binhaminita.

²¹ Nagruluwang ti manga Binhaminita sa Gibiya hampay lumaban sa kanda. Ag sa tunda lang pag sirang, 22,000 Israilita ti namatay manga Binhaminita.

^22-23 Nakan tinmukad maan ti manga Israilita sa Bitil ag nanlulumian ati tugka yabi. Pinaingana nida ti Panginuun, “Manlaban aw waya maan kami sa kanmi kadugu manga Binhaminita?” Sinmagut ti Panginuun, “Hu, paglaban maan kamu.” Nakan pinarig-un nida ti kada usa ag napauli maan sida sa ati diman pag rugar sa un-an pag sirang nansalakay sida.

²⁴ Pagka sa sunud pag sirang, ginira nida ti manga Binhaminita.

²⁵ Dapat linmuwas maan ti manga Binhaminita sa Gibiya ag sinulang kanda kaparihu manga Israilita. Ag sa tunda pag udas, namatay maan nida ti 18,000 Israilita armadu tanan baladaw.

²⁶ Nakan nagtukad maan ti tanan Israilita sa Bitil ag nanlulumian sa atubangan Panginuun. Unman nanhandum karan-unun sida tugka yabi ag nanhandug manga handug pagsunugun ag manga handug para sa mayad pag pakiusa sa Panginuun.

^27-28 Sa tunda pag udas, ti Kaban Kasunduan Diyus asan sa Bitil, ag ti magpamahala inda si Piniis kay anak ni Iliyasar ag laki ni Aarun. Nagpaingana maan ti manga Israilita sa Panginuun, “Manlaban aw waya maan lugud kami sa kanmi kadugu manga Binhaminita ngatay danga yi lang?” Nagsagut ti Panginuun, “Paglaban maan kamu dahil aldaw papanaluhun yi niku kamu laban sa kanda.”

²⁹ Nakan pinalibutan manga Israilita ti Gibiya.

³⁰ Napauli maan sida sa imaw diman pag rugar. Ikatlu yi inda pag sirang nida paggira.

³¹ Sinulang maan sida manga Binhaminita maglinuluwang ginan sa banwa. Ag parihu sa nangyari sa nakalawuy pag manga sirang, may manga namatay sida manga Israilita. 30 ka Israilita ti namatay sa katanmanan ag sa manga dalan atabug sa Bitil ag sa Gibiya.

³² Dahil magpalagiw ti manga Israilita, ti hantup manga Binhaminita matalu maan nida ti manga Israilita. Unman nida alam napalagas lang maaw ti manga Israilita hampay daran-un sida pakarayu sa banwa.

³³ Pagka rinmas-ug ti manga Israilita sa Baal Tamar, napauli sida ati habang ti manga nakapalibut sa sangput Gibiya maglinuwang yi.

³⁴ 10,000 sida tanan pudu manga pinili pag manga sundalu Israil. Paggirahun nida ti Gibiya, ag masyadu gid ti labanan. Unman alam ti manga Binhaminita arani yi kanda katapusan.

³⁵ Pinanalu Panginuun ti manga Israilita, ag sa tunda pag sirang nakamatay sida 25,100 Binhaminita armadu tanan baladaw.

³⁶ Ag napansin manga Binhaminita magkatalu yi sida. Nalagiw ti daka pag gurupu manga sundalu Israil hampay makagira kanda ipinatambang pag manga tawu masangputan sa banwa Gibiya.

Ti Tultulanun sa Pagpanalu manga Israilita

³⁷ Habang maglagas ti manga Binhaminita, kadaka ginira manga nakapalibut pag manga sundalu ti Gibiya ag pinanmatay ti tanan tawu ati.

³⁸ Bag-u sida ginmira, nanharampangan yi sida nu may makitan ngani sida madamul pag anus sa Gibiya,

³⁹ manbalik sida sa paglaban. Ti manga Binhaminita tunda katpung nakamatay 30 ka Israilita, nakan kanda isip natalu maan nida ti manga Israilita.

⁴⁰ Pagka sa uryan, nantalimbuuk ti anus sa Gibiya. Pagka nakaaliwliw ti manga Binhaminita, nakitan nida ti madamul pag anus ginan sa banwa.

⁴¹ Nakan binmalik ti manga Israilita ag ginira nida ti manga Binhaminita. Nadala ti manga Binhaminita dahil napansin nida arani yi kanda katapusan.

⁴² Nalagiw sida atabug sa pangawakawaan, dapat linagas sida manga Israilita linmuwas sa banwa.

⁴³ Pinalibutan sida manga Israilita ag balaw inapasan sa lagas tugka sa butlakan Gibiya.

⁴⁴ 18,000 maisug pag manga sundalu manga Binhaminita ti namatay.

⁴⁵ Ti iba nalagiw atabug sa pangawakawaan sa Batu Rimun. Dapat 5,000 ti namatay sa kanda sa dalan. Parargu sida paglagsun manga Israilita tugka sa Gidum ag nakamatay waya ti manga Israilita 2,000.

⁴⁶ Sa kabuuhan manga 25,000 manga mahusay Binhaminita ti namatay sa tunda pag sirang. Manga maraisug sida pag manga sundalu ag armadu baladaw.

⁴⁷ Dapat may 600 ka manga Binhaminita nakapalagiw atabug sa Batu Rimun, ag ati sida nantuluy sa sulud upat ka bulan.

⁴⁸ Bag-u binmalik ti manga Israilita sa manga banwa Binhaminita ag pinanmatay nida ti nagkarasawad buhi, hanggan ti manga hayup. Inirub nida ti tanan banwa manga Binhaminita kanda malakawan.