Talaghusay 2 - Hanunuu

Ti Anghil Panginuun sa Bukim

¹ Nag-atag ti anghil Panginuun sa Bukim ginan sa Gilgal. Ag magkun siya sa manga Israilita, “Ilinwas niku kamu sa Ihiptu ag dinara sa daga kang itinaratu sa kanyu manga ginurang. Sinabi niku kaybi balaw niku dautun ti kasunduan niku sa kanyu.

² Sinabi diman niku danga kamu magbuwat kasunduan sa manga taga ati bagkus ngap gubaa niyu kanda manga harandugan. Dapat malu unu kanyu binwat? Unman niyu aku sinunud!

³ Nakan taynguna, balaw niku sida paighitun sa kanyu daga. Bumaliw ga dugi sida sa kanyu lakawan ag kanda manga diyus bumaliw daka pag ka suduk sa kanyu.”

⁴ Pagka nadnugan inda manga Israilita, nangungud sida sa lumi.

⁵ Nakan iningarnan nida tunda pag rugar Bukim (kay ibug sabihun, Maglulumian). Bag-u nanhandug sida ati sa Panginuun.

⁶ Pagka pinaginan yi ni Huswi ti manga Israilita, nag-ati sida sa kanda maranahun pag daga hampay apuun kada usa sa kanda.

⁷ Nagsirbi sida sa Panginuun habang buhi waya si Huswi. Ag una tigbak yi si Huswi, parargu di gid sida sa pagsirbi sa Panginuun habang buhi waya ti manga magdumara sa Israil, imaw ti nakakit sa tanan pag makadululaw binwat Panginuun para sa Israil.

⁸ Ti suruguun Panginuun si Huswi anak ni Nun namatay sa idad 110.

⁹ Ilinbung siya sa kay daga ati sa Timnat Hiris, sa kabantudan Ipraim, sa kanaway baliwa Bantud Gaas.

Inmapas ti manga Israilita sa Pagsirbi sa Panginuun

¹⁰ Pagka nagkaramatay ti manga tawu sa tunda pag sinulput, ti sinmunud pag sinulput tawu unman nakakilala sa Panginuun ag unman may namuangan nu hintay ti binwat Panginuun para sa Israil.

¹¹ Nagbuwat kadautan ti manga Israilita sa magbantay Panginuun ag nagsamba sa manga tawu-tawu Baal.

¹² Binugyahan nida ti Panginuun, ti Diyus nida manga ginurang, imaw ti nagpalwas sa kanda sa Ihiptu. Sinunud nida ag sinamba ti tuhay-tuhay pag manga diyus manga tawu sa sangput nida. Ginalit nida ti Panginuun,

¹³ dahil binugyahan nida siya ag nagsirbi sa kan Baal ag kan Astarut.

¹⁴ Dahil sa pangagalit Panginuun sa Israil, pinabay-anan niya sida girahun manga mananakaw hampay bul-un kanda manga kasiyunan. Pinabay-anan diman sida Panginuun matalu nida manga kalaban sa kanda sangput ag balaw yi nida kaya panindugan kanda sadili.

¹⁵ Nu maglaban sida, pag-ipatalu sida Panginuun, angay sa kay sinabi. Nakan masyadu gid sida nakurian.

¹⁶ Taynguna, pinakan-an Panginuun ti Israil manga takinan imaw ti rumibri sa kanda ginan sa manga mananakaw.

¹⁷ Dapat unman nida binati kanda manga takinan. Bagkus ngap, nagpatlikud sida sa Panginuun ag nagsamba sa tuhay pag manga diyus. Balaw sida parihu sa kanda manga ginurang dahil madali lang sida magpatlikud sa manga sugu Diyus, ti sinunud kaybi nida manga ginurang.

¹⁸ Ti tanan takinan ipinakaun Panginuun sa kanda kay inawatan. Ag habang buhi kanda takinan, irinibri sida Panginuun sa kanda manga kalaban. Dahil magkaawa siya sa kanda dahil sa kanda mag-agwanta sa manga mag-api ag sa magpakuri sa kanda.

¹⁹ Dapat nu namatay yi ngani ti takinan, magbalik yi maan sida sa kanda daan pag buruwatun imaw ti pagsirbi ag pagsamba sa tuhay pag manga diyus. Subra waya kanda kadautan binwat kaysa kanda manga ginurang. Balaw nida gustu tayakan kanda daut manga pagbuwatun ag manga kaganitan nida manga ulu.

²⁰ Nakan lalu waya gid nagalit ti Panginuun sa kanda. Magkun ti Panginuun, “Dahil linabag tunda pag nasyun kang kasunduan sa kanda manga ginurang, ag unman sida nagsunud sa kangku,

²¹ balaw niku paighitun sa kanda ti nasawad pag manga nasyun balaw nasakup ni Huswi bag-u siya namatay.

²² Gamitun niku inda pag manga nasakupan hampay subukan ti manga Israilita nu ungud tupadun nida kang manga sugu, parihu sa kanda manga ginurang.”

²³ Inda kay dahilan nu hayga balaw rargu pinalayas Panginuun ti nasawad pag manga nasakupan ag unman niya pinahintulutan matalu sida ni Huswi.