Talaghusay 19 - Hanunuu

Ti Libita ag Kay Asawa Suruguun

¹ Ati katpung kaybi unman may hari ti Israil, may usa ka lalaki Libita mag-uli sa arayu baliwa kabantudan Ipraim. Inda pag Libita nakaasawa usa ka suruguun taga Bitlihim sa Huda.

² Dapat tunda pag babayi nanguragin sa kay asawa, ag nuli inda sa balay niya manga gurang sa Bitlihim. Pagkalawuy upat ka bulan,

³ nagpasya ti Libita sulangun niya kay asawa ag sabihan pagkuyug yi siya sa kanya. Nakan naglakaw siya kaibahan kay usa ka suruguun ag duwa ka asnu. Pagras-ug niya ati, pinasaka siya babayi. Pagka nakitan siya niya manugang lalaki, masulung gid siya pinadayun.

⁴ Pinilit siya niya manugang pag-ati dap siya sa kanda. Nakan ati dap siya sa sulud tulu ka sirang, ati diman magkaun, mag-inum ag magkaturug.

⁵ Pagka sa ikap-at yi pag sirang, surip waya gid binmangun ti Libita hanggan kay suruguun, ag nan-alistu sa pag-uli. Dapat magkun sa kanya kay manugang lalaki, “Pagkaun dap kamu bag-u maglakaw.”

⁶ Nakan nangaun dap ngani ag nanginum sida duwa. Pagkatapus, magkun kay manugang lalaki, “Pagsitay lang dap kamu sa yabi dahil manbarayaan waya kita.”

⁷ Balaw mana siya magpasnu dapat pinilit gid siya niya manugang lalaki, nakan ati maan sida.

⁸ Pagka surip, nag-alistu sida lumakaw, dapat magkun maan kay manugang lalaki, “Pagkaun dap kamu, sabyi lang sa malambung kamu paglakaw.” Nakan nangaun dap maan sida.

⁹ Pagka magkalakaw yi ti Libita, kay asawa, ag kay suruguun, magkun kay manugang lalaki, “Malambung yi, sab lagat-lagat madulum yi. Mayad waya pag sitay yi lang maan kamu pag maturug. Pagbarayaan dap kamu sitay, aldaw yi lang madlum surip kamu pag ginan.”

^10-11 Dapat udyi pinmasnu ti Libita, nu unman naglakaw siya hanggan kay asawa, kaibahan kay duwa ka asnu. Malambung yi gid sida igu rinmas-ug sa arani Hibus (imaw ti Hirusalim). Nakan magkun ti suruguun Libita, “Mayad waya siguru sitay yi lang kita maturug sa inda pag banwa manga Hibusiyu.”

¹² Nagsagut ti Libita, “Balaw mahimu kita sitay pag maturug sa rugar balaw sakup manga Israilita. Mandiritsu kita sa Gibiya.

¹³ Dali, hingabtun nita makaras-ug sa Gibiya ngatay sa Rama, ag ati kita pag maturug.”

¹⁴ Nakan naparargu sida sa paglakaw. Mag-itakip yi ti init sa dayu bantud pagka rinmas-ug sida sa Gibiya sakup lahi ni Binhamin.

¹⁵ Sinmulud sida sa banwa ag tinmukaw sa padang, dapat unman gid may nanpadayun sa kanda.

¹⁶ Pagka madulum yi, may usa ka gurangun lalaki mag-uli yi ginan sa kay tarabahu sa tanman. Inda pag gurangun ati pag mag-uli kaybi sa kabantudan Ipraim, dapat kainda sa Gibiya yi siya pag mag-uli. Inda pag Gibiya sakup lahi ni Binhamin.

¹⁷ Pagka nakitan gurangun ti manga day-uhan, pinakaranyan niya ag pinaingana, “Taga naan kamu? Ag naan tag kamu?”

¹⁸ Nagsagut ti Libita, “Ginan kami sa Bitlihim sakup Huda ag muli kami sa kanmi balay sa kabantudan Ipraim. Unman may nanpadayun sa kanmi sa kay balay.

¹⁹ May karan-unun ag irinmun kami niku asawa hanggan niku suruguun, ag may pamaharab di kami sa kanmi asnu. Nakan unman yi kami may tuhay waya kailangan.”

²⁰ Magkun ti gurangun, “Danga kamu magkaturug sitay sa padang. Ati yi lang kamu sa kang balay. Aku ti bahala sa tanan niyu kailanganun.”

²¹ Nakan kinmuyug sida sa gurangun. Pagras-ug nida, pinakaun gurangun kanda manga asnu. Ag pagkatapus ugas nida manga lulud, nangaun sida ag nanginum.

²² Pagka magbarayaan sida, kadaka lang pinalibutan manga daut pag manga tawu ti balay ag hinampak ti sabian balay. Magringgit sida sa gurangun may apu balay, “Paluwasan kanmu bisita lalaki dahil kanmi ulidun siya.”

²³ Nagsagut ti gurangun, “Manga kakilala, bisita niku inda pag tawu, nakan danga niyu pagbuwata inda pag mayagting ag makakaray-a pag bagay.

²⁴ Ipakaun niku sa kanyu kang anak daraga ag ti asawa inda pag tawu, ag pagustu kamu nu unu kanyu buwatun sa kanda. Basta danga lang niyu pagbuwata inda pag makakaray-a pag bagay sa kang bisita.”

²⁵ Unman naniwala ti manga tawu sa kanya, nakan ipinalwas Libita kay asawa ag ipinakaun sa kanda. Ginahus ag inublus-ublusan sa buu yabi tugka sa magkasurip. Ag pagka marayaw-rayaw yi, pinalakaw nida ti babayi.

²⁶ Nagbalik ti babayi sa balay pagdayunan niya asawa. Naplid siya sa may sabian, ag ati siya tugka sa nasinggitan init.

²⁷ Pagka surip maaga binmangun ti Libita ag binukasan niya ti sabian hampay lumakaw yi, nakitan niya kay asawa mabugtangan ag kay manga kamang mawaklayan waya sa sabian.

²⁸ Magkun ti Libita, “Pagbangun yi, mag-uli yi kita.” Dapat tigbak yi maaw ti babayi, nakan ikinarga niya ti bangkay sa kay asnu ag linmakaw.

²⁹ Pagras-ug niya sa kanda, pinamulud-pulud niya sa 12 ka bahagi ti bangkay niya asawa ag ipinadara sa 12 ka linahi Israil.

³⁰ Magkun ti tanan nakakit inda, “Unman waya gid may nangyari parihu sa inda ginan sa pag-ighit manga Israilita sa Ihiptu. Unu nguna ti mayad nita buwatun?”