Talaghusay 18 - Hanunuu

Si Mikas ag ti Lahi ni Dan

¹ Sa kaybi pag panahun unman may hari ti Israil. Ag sa tunda diman pag panahun, ti lahi ni Dan maghanap rugar nida maulian ag maapu mismu nida. Sa manga linahi Israil, ti lahi ni Dan unman waya nakatanggap kanda maranahun pag daga.

² Nakan nagsugu ti manga lahi ni Dan lima ka maraisug pag lalaki ginan sa kanda lahi hampay manhanap kanda ulian. Inda pag lima ka lalaki ginan sa manga banwa Sura ag Istaul. Pagka linmakaw yi sida hampay manhanap rugar, nakaras-ug sida sa balay ni Mikas sa kabantudan Ipraim, ag ati sida naturug.

³ Habang ati sida, naalaman nida balaw taga ati tunda pag kan-akan Libita dahil sa kay pamagaw. Nakan pinaingana nida siya, “Hayga sitay kawu? Si unu ti nagdara sa kanmu sitay? Ag unu kanmu pagbuwatun sitay?”

⁴ Sinabihan niya sida sa binwat ni Mikas sa kanya, ag magkun siya, “Magtarabahu aku bilang manughandug ni Mikas, ag pag-upahan niya aku.”

⁵ Nagsagut ti manga lalaki, “Nu katunda, paingan-a malu ti Diyus nu ungud maayus inda kanmi lakaw.”

⁶ Nagsagut ti manughandug, “Danga kamu magkaarimputu. Pag-ibahan kamu Panginuun sa kanyu maglakaw.”

⁷ Nakan nagparargu maan sa paglakaw inda pag lima ka lalaki ag nakaras-ug sida sa Lais. Nakitan nida maayus ti pagpangabuhi manga tawu ati parihu sa manga Siduniyu. May kahusayan inda pag rugar, ag asan ti tanan pangailangan manga tawu. Magsarig gid ti manga mag-uli ati balaw may mangunu sa kanda. Inda pag rugar arayu sa manga Siduniyu, ag unman sida may kakampi banwa.

⁸ Pagka nakauli ti lima ka lalaki sa Sura ag Istaul, pinaingana sida nida manga kasimanwa nu unu kanda nakitan.

⁹ Magkun sida, “Abala yi, may nakitan yi kami marinu pag rugar para sa kanta. Dali! Girahun yi nita hampay masakup nita tunda pag daga.

¹⁰ Ipinakaun Diyus sa kanta inda pag daga. Malapad inda ag abunda, bag-u asan ti tanan pangangailangan nita. Ag usa waya, magsarig gid ti manga mag-uli ati unman may mangunu sa kanda.”

¹¹ Nakan ginan sa Sura ag Istaul, naglakaw ti 600 tawu armadu ginan sa lahi ni Dan hampay lumaban.

¹² Nagkampu sida sa isalpan baliwa banwa Kiryat Harim sa Huda. (Nakan tugka kainda inda pag rugar pag-ingarnan Kampu ni Dan.)

¹³ Ati ginan, parargu sida sa kanda maglakaw tugka sa nakaras-ug sida sa balay ni Mikas, sa kabantudan Ipraim.

¹⁴ Bag-u ati pag lima ka lalaki nantiid sa Lais magkun tag sa kanda manga kaibahan, “Alam aw niyu ti usa sa manga balay sitay may ipud manughandug, may larawan hinaklupan pilak, ag tuhay waya pag manga diyus-diyusan? Unu nguna ti mayad nita buwatun?”

¹⁵ Pagkatapus nida pasya nu unu kanda buwatun, nag-atag sida sa balay ni Mikas ag kinamusta ti kan-akan Libita mag-uli ati.

^16-17 Habang matindugan sa sabian banwa ti Libita hanggan ti 600 armadu manga lahi ni Dan, sinmulud ti lima ka manugtiid sa balay ni Mikas ag pinanbuul nida ti ipud, ti larawan pinahaklupan pilak, ag ti tuhay waya pag diyus-diyusan.

¹⁸ Pagka nakitan tunda manughandug sinulud lima ka tawu kay balay ni Mikas ag pagbul-un tunda pag manga bagay, nagpaingana siya sa kanda, “Hayga pagbul-un niyu inda?”

¹⁹ Nagsagut sida, “Danga kawu mag-ingay. Pagkuyug kawu sa kanmi dahil buwatun kawu nimi manughandug ag manugpayu. Dayu aw lugud kawu bumaliw manughandug sa usa ka linahi Israil kaysa usa lang ka magtal-anakan?”

²⁰ Nagustuhan manughandug ti sinabi sa kanya, nakan nangawat siya sa kanda sa pagbuul ipud, hanggan ti larawan pinahaklupan pilak ag tuhay waya pag manga diyus-diyusan, ag kinmuyug siya sa kanda.

²¹ Sa kanda maglakaw, mag-una kanda manga anak, manga hayup, ag manga kagamitan.

²² Nikarayu yi sida sa balay ni Mikas pagka naalaman ni Mikas ti nangyari. Nakan tinipun niya kay manga kamalay ag linagas nida ti manga lahi ni Dan.

²³ Pagringgitan nida sida, ag inmaliwliw ti manga lahi ni Dan ag nagpaingana sa kan Mikas, “Unu lugud ti nangyari ag paglagsun niyu kami?”

²⁴ Sinmagut si Mikas, “Magpaingana waya kamu? Bin-ul niyu ti manga diyus-diyusan kang ipinabwat, hanggan kang manughandug. Unman may nasawad sa kangku.”

²⁵ Magkun sida, “Mayad waya danga yi lang kawu mag-ingay, dahil barang mangisug waya kanmi manga kaibahan ag matyun kawu nida hanggan kanmu magtal-anakan.”

²⁶ Nakan nagparargu maan sa paglakaw ti manga lahi ni Dan. Nakitan ni Mikas balaw niya sida makaya, nakan nuli yi lang siya.

²⁷ Nag-atag ti manga lahi ni Dan sa Lais dara ti manga diyus-diyusan ni Mikas hanggan kay manughandug. May kahusayan pag rugar ti Lais, ag magsarig gid ti manga mag-uli ati unman may mangunu sa kanda. Ginira manga lahi ni Dan ti Lais, pinanmatay ti manga tawu, ag sinunug ti banwa.

²⁸ Unman may makaawat sa manga taga Lais dahil arayu sida sa Sidun ag unman sida may kakampi banwa. Ti Lais asan sa karatagan arani sa Bit Rihub. Pagka sa uryan, ipinatindug maan inda manga lahi ni Dan ag kanda inulianan.

²⁹ Inilisan nida Dan kay ngaran inda angay sa ngaran nida ginurang si Dan, usa sa manga anak ni Hakub.

³⁰ Ipinatindug nida ati ti diyus-diyusan ni Mikas ag kanda sinamba. Si Hunatan anak ni Girsum ag kay laki ni Muysis ti binwat nida manughandug. Ti manga lahi ni Hunatan imaw ti nagsirbi bilang manga manughandug sa lahi ni Dan tugka sa pagbihag sa manga taga Israil.

³¹ Ag habang ti Turda Diyus ati di waya sa Silu, ti diyus-diyusan ni Mikas parargu pagsambahun sa Dan.