Talaghusay 17 - Hanunuu

Ti manga Diyus-diyusan ni Mikas

¹ May usa ka tawu mag-uli sa kabantudan Ipraim kay ngaran si Mikas.

^2-3 Usa ka sirang, magkun si Mikas sa kay ina, “Nadnugan niku sinaadan nimu ti nagbuul kanmu 1,100 pilak. Indaay ti pilak, aku ti nagbuul inda.” Pagka natanggap inda niya ina, magkun siya, “Anak, mana papaladan kawu Panginuun. Ihandug niku inda pag pilak sa Panginuun hampay unman rumas-ug sa kanmu ti saad. Gamitun niku inda pag pilak panpahaklup sa kang ipabwat diyus-diyusan kayu. Hu, ihandug niku inda sa Panginuun hampay maribri kawu sa saad.”

⁴ Bag-u nagbuul kay ina 200 pilak ag ipinakaun sa manugpanday pilak. Ag ginamit inda manugpanday pilak panpahaklup sa diyus-diyusan kayu. Pagka natapus yi, ipinauli inda pag diyus-diyusan sa balay ni Mikas.

⁵ May sadili simbahan si Mikas, ag nagpabuwat siya manga diyus-diyusan hanggan ipud manughandug. Binwat niya manughandug ti usa sa kay manga anak lalaki.

⁶ Sa tunda pag udas, unman may hari sa Israil, nakan makapagustu lang ti kada usa nu unu kanda gustu buwatun.

⁷ May usa ka kan-akan Libita mag-uli sa Bitlihim sakup Huda.

⁸ Pagka sa usa ka sirang, linmakaw siya hampay manhanap ulian sa iba rugar. Sa kay maglakaw, nalakawan niya kay balay ni Mikas sa kabantudan Ipraim.

⁹ Pinaingana siya ni Mikas, “Taga naan duy kawu?” Sinmagut siya, “Taga Bitlihim duy, sakup Huda. Ag usa aku ka Libita. Maghanap aku maulian niku.”

^10-11 Magkun si Mikas, “Sitay yi lang kawu pag-uli sa kangku. Buwatun niku kawu manugpaanyu ag manughandug. Ag kada timpu pakan-an niku kawu sampulu ka bilug pilak, bukud sa manga rutay ag karan-unun kang ipakaun sa kanmu.” Nagpasnu ti Libita sa sinabi ni Mikas ag kinilala siya ni Mikas usa sa kay manga anak.

¹² Binwat siya manughandug ni Mikas, ag ati nangulian sa kay balay.

¹³ Magkun si Mikas, “Taynguna, pihu papaladan aku Panginuun dahil may manughandug yi aku Libita.”