Talaghusay 16 - Hanunuu

Nag-atag sa Gasa si Samsun

¹ Usa ka sirang, nag-atag si Samsun sa Gasa usa ka banwa Pilistiyu. May nakitan siya ati usa ka babayi baraydan, ag nangulid siya sa tunda pag babayi.

² Nabaritaan manga taga Gasa asan maaw si Samsun, nakan pinalibutan nida ti banwa ag binantayan ti puwirtahan banwa sa buu yabi. Unman sida nan-gira sa tunda pag yabi. Naggayak sida sa magkasurip nida pag matyun si Samsun.

³ Dapat tugka lang karaw-an yabi pag nangulid si Samsun sa babayi. Bag-u nagbangun siya ag nag-atag sa may puwirtahan banwa. Hiniyaptan niya ti puwirtahan banwa ag inayit dara ti manga tulduk ag manga kandadu inda. Bag-u pinas-an niya inda ag dinara sa katayungtungan bantud masranguhan sa Hibrun.

Si Samsun ag si Dilayla

⁴ Pagka sa uryan, naibug si Samsun sa usa ka babayi mag-uli sa luung Surik. Kay ngaran si Dilayla.

⁵ Taynguna, inatihan manga takinan manga Pilistiyu si Dilayla ag sinabihan, “Pakihampangi nimu siya kuntay sabihan niya sa kanmu kay lihim nu hayga masyadu siya mabaskug ag nu kabitay siya matalu, hampay gapusun ag bihagun nimi siya. Nu mabuwat nimu inda, ti kada usa sa kanmi mamakaun sa kanmu 1,100 bilug pilak.”

⁶ Nakan pinaingana ni Dilayla si Samsun. Magkun siya, “Sabihan nimu sa kangku nu hayga masyadu kawu mabisug. Ag halimbawa, nu may man-gapus ngatay mandakup sa kanmu kabitay niya inda buwatun?”

⁷ Nagsagut si Samsun, “Nu gapusun aku pitu ka bag-u pag-uway, bumaliw wadi parihu sa kusug iba tawu kang kabisugan.”

⁸ Pagka naalaman inda manga takinan manga Pilistiyu, pinakan-an nida si Dilayla pitu ka bag-u pag panhigut uway ag ginapus niya si Samsun.

⁹ May pira ka manga Pilistiyu magpatagu siyun sa baliw pag sulud-sulud. Bag-u nagringgit si Dilayla, “Samsun! May manga Pilistiyu rinmas-ug hampay dakpun kawu.” Dapat pinamuklut lang ni Samsun ti manga higut uway parihu lang sa lubid nitarang sa apuy. Nakan unman waya gid nida magkaalaman ti lihim niya kusug.

¹⁰ Magkun si Dilayla sa kan Samsun, “Pinaumang lang nimu aku; nagpudil kawu sa kangku. Tapatan yi sa kangku nu kabitay kawu magapus.”

¹¹ Magkun si Samsun, “Nu gapusun aku bag-u pag lubid balaw waya gid ginamit, bumaliw wadi parihu sa kusug iba tawu kang kabisugan.”

¹² Nakan nagbuul si Dilayla bag-u pag lubid balaw waya gid ginamit ag ginapus niya si Samsun. May pira ka manga Pilistiyu magpatagu siyun sa baliw pag sulud-sulud. Bag-u nagringgit si Dilayla, “Samsun! May manga Pilistiyu rinmas-ug hampay dakpun kawu.” Dapat pinamuklut lang ni Samsun ti higut sa kay takyay parihu lang sa bunang.

¹³ Nakan magkun maan si Dilayla sa kan Samsun, “Tugka kainda paglukuhun lang nimu aku ag pagpudilan. Sabihan yi sa kangku nu kabitay kawu magapus.” Magkun si Samsun, “Nu ihigut nimu ti pitu ka salapid niku buhuk sa halablan ag hugtun panhabul, bumaliw wadi parihu sa kusug iba tawu kang kabisugan.”

¹⁴ Nakan pagka maturugan si Samsun, ihinigut ni Dilayla ti pitu ka salapid buhuk ni Samsun sa halablan, ag nagringgit, “Samsun! May manga Pilistiyu rinmas-ug hampay dakpun kawu.” Nipulaw si Samsun ag linapsu niya kay buhuk sa halablan.

¹⁵ Nakan magkun si Dilayla sa kanya, “Magkun kawu pagmahalun nimu aku, dapat balaw maaw tutuu. Tulu yi ka bisis nimu aku pinaumang. Unman gid kawu nanabi nu naan ginan kanmu kusug.”

¹⁶ Sirang-sirang pagpaingan-un niya si Samsun tugka sa sinamuk si Samsun.

¹⁷ Nakan sinabihan yi lang siya ni Samsun kay tutuu. Magkun si Samsun, “Unman gid napuldan kang buhuk una di. Dahil ginan sa kang pagkalusad, itinalaga yi aku sa Diyus bilang usa ka Nasariyu. Nakan nu mapuldan kang buhuk, bumaliw wadi parihu sa kusug usa ka tawu kang kabisugan.”

¹⁸ Magkaramdaman ni Dilayla nagsabi si Samsun kay tutuu. Nakan nanpasugu siya kuntay sabihi ti manga takinan manga Pilistiyu pagbalik dahil nagsabi yi kay tutuu sa kanya si Samsun. Nakan nagbalik ti manga takinan, dara ti kuwarta panbayad sa kan Dilayla.

¹⁹ Pinaturug ni Dilayla si Samsun sa kay balangbang, pagka turug yi si Samsun, nagtawag siya usa ka tawu hampay uguyun kay pitu ka salapid buhuk ni Samsun. Nakan nanlumuy si Samsun, ag ipinadakup siya ni Dilayla.

²⁰ Nagringgit si Dilayla, “Samsun! May manga Pilistiyu rinmas-ug hampay dakpun kawu.” Binmangun si Samsun kay isip makakalpas waya siya parihu sa binwat niya sitay. Dapat unman niya alam balaw yi maaw siya pag-awatan Panginuun.

²¹ Dinakup siya manga Pilistiyu ag linuwat kay manga mata. Bag-u dinara nida siya sa Gasa ag tinarikadahan galang. Pinatarabahu nida siya sa sulud pirisuhan bilang manuggaling tirigu.

²² Dapat amat-amat maan magtubu kay buhuk.

Kay Pagkamatay ni Samsun

²³ Usa ka bisis, nagtiripun maan ti manga takinan manga Pilistiyu hampay mandaus ag mamakaun mayamu pag manga handug sa kanda diyus si Dagun. Sa kanda magdaus magkanta sida: “Pinanalu kita nita diyus laban sa kan Samsun kanta kalaban.”

^24-25 Masyadu kanda kabayaan ag magringgit sida, “Daran-a ataytag si Samsun hampay pasulungun kita!” Nakan ipinalwas si Samsun sa pirisuhan. Ag pagka nakitan siya manga tawu, dinayaw nida kanda diyus. Magkun sida, “Pinanalu kita nita diyus sa kanta kalaban, ti nagpadamhak sa kanta daga ag nanmatay kayamuan sa kanta.” Bag-u ipinatindug nida si Samsun sa karaw-an duwa ka tulduk ag binwat karasarin-an.

²⁶ Magkun si Samsun sa suruguun mag-abat sa kanya, “Pahiyaptan aku sa tulduk sa inda pag simbahan ni Dagun hampay makapasalandig aku.”

²⁷ Punu tawu ti simbahan ni Dagun. Siyun ti tanan takinan manga Pilistiyu. Sa babaw atup, may 3,000 tawu, lalaki ag babayi. Magbaya sida magbantay sa kan Samsun.

²⁸ Taynguna, nandarangin si Samsun, “Panginuun Diyus, alalahana aku. Nu mahimu, balikan kang kusug una kas-a wadi ginan hampay makabalus aku sa manga Pilistiyu sa pagluwat nida sa kang manga mata.”

²⁹ Nanhiyaput si Samsun sa duwa ka tulduk sa karaw-an matukudan sa atup simbahan ni Dagun. Kay sikun niya kamang sa usa ka tulduk ag kay wala sa baliw waydi pag tulduk.

³⁰ Bag-u nagringgit siya, “Mamatay aku kaibahan inda pag manga Pilistiyu!” Ag itinulang niya ti duwa ka tulduk sa buu niya kusug ag nagba ti simbahan ni Dagun, nadugsakan ti manga takinan hanggan ti tanan tawu ati. Mas mayamu waya kay namatay kaysa kaybi pag udas sa kay magkabuhi waya siya.

³¹ Kay bangkay ni Samsun bin-ul niya manga patar-ari ag manga katawuhan bag-u ilinbung sa linubngan niya ama, si Manwa, ati sa karaw-an Sura ag Istaul. Pinamunuan ni Samsun ti Israil sa sulud duwapulu ka timpu.