Talaghusay 15 - Hanunuu

Ti Pagganti ni Samsun sa manga Pilistiyu

¹ Sa tig-arani ati katpung, nansabang si Samsun sa kay asawa may dara siya anak kambing. Magkun si Samsun sa kay manugang lalaki, “Gustu niku mansaka sa sulud-sulud niku asawa.” Dapat balaw nagpayag kay manugang.

² Magkun kay manugang, “Kang isip pagkadat-an yi gid nimu siya, nakan ipinakaun niku siya sa kanmu kakilala. Nu gustu nimu kainda, asan kay arian patar-ari mas marinu waya kaysa kanya. Siya yi lang ti asawan-a.”

³ Magkun si Samsun, “Sa inda pag binwat niyu, danga niyu aku pagsisiha nu unu ti buwatun niku sa kanyu pag manga Pilistiyu.”

⁴ Bag-u linmakaw si Samsun ag nandakup 300 talun idu. Ihinigut ti parihu ikug talun idu sa tigudwa ag pinaulian sulu.

⁵ Bag-u pinamaktan niya ti manga sulu ag pinalpasan ti manga talun idu sa manga tiriguhan manga Pilistiyu. Nairub ti tanan tiriguhan, balaw lang ti manga nabugkus nu unman hanggan diman ti udwaya nabugkus. Nairub diman ti ubasan hanggan ti tanum manga ulibu.

⁶ Nagpaingana ti manga Pilistiyu nu si unu ti nagbuwat tunda, ag naalaman nida si Samsun. Ag naalaman diman nida binwat tida ni Samsun dahil ipinaasawa niya manugang taga Timna kay asawa sa usa niya ka kakilala. Nakan hinanap nida ti babayi ag kay ama bag-u sinunug nida.

⁷ Magkun si Samsun sa manga Pilistiyu, “Dahil sa inda pag binwat niyu, balaw aku umapas tugka sa makabalus aku sa kanyu.”

⁸ Nakan buu kabisugan ginira ni Samsun ti manga Pilistiyu ag mayamu kay minatay. Pagkatapus nalagiw siya ag napatagu sa lukib, sa may dalipi batu Itam.

⁹ Taynguna, nagkampu ti manga Pilistiyu sa Huda, ginira nida ti banwa Lihi.

¹⁰ Nakan nagpaingana sa kanda ti manga taga Huda, “Hayga paggirahun niyu kami?” Nagsagut sida, “Hampay dakpun nimi si Samsun ag balusan sa kay binwat sa kanmi.”

¹¹ Nakan ti 3,000 lalaki Huda nag-atag sa lukib, sa may dalipi batu Itam, ag sinabihan si Samsun, “Unman aw lugud nimu naisip sakup kita manga Pilistiyu? Taynguna kami hanggan nadamay sa kanmu binwat.” Nagsagut si Samsun, “Binalusan lang niku sida sa kanda binwat sa kangku.”

¹² Magkun sida, “Nagsitay kami hampay dakpun kawu ag ipakaun sa manga Pilistiyu.” Nagsagut si Samsun, “Payag aku, basta pagtaratu kamu sa kangku balaw niyu aku matyun.”

¹³ Magkun sida, “Hu, balaw nimi kawu matyun. Gapusun lang nimi kawu ag ipakaun sa kanda.” Nakan ginapus nida si Samsun duwa ka bag-u pag lubid ag dinara sa luwas lukib.

¹⁴ Pagka nadara yi si Samsun sa Lihi, sinulang siya manga Pilistiyu maghuruyawan. Pinabisug Ispiritu Panginuun si Samsun, ag pinamuklut niya ti manga magapusan lubid parihu sa matpuk pag bunang.

¹⁵ Bag-u may nakitan siya sag-ang asnu balaw waya dugay namatay. Bin-ul niya inda ag ginamit panmatay sa 1,000 Pilistiyu.

¹⁶ Magkun si Samsun, “Sa panab-anan sag-ang asnu, minatay niku ti 1,000 tawu. Sa panab-anan sag-ang asnu, natumpuk niku inda pag manga tawu.”

¹⁷ Pagkatapus niya bagaw, iyinmut niya ti sag-ang asnu. Iningarnan tunda pag rugar Ramat Lihi.

¹⁸ Inuwaw gid si Samsun. Nakan nagtawag siya sa Panginuun. Magkun siya, “Pinanalu nimu aku, dapat kainda ga mamatay aku sa uwaw ag mabihag manga Pilistiyu balaw magkilala sa kanmu.”

¹⁹ Nakan ipinalwang Diyus ti danum sa may ukang daga sa Lihi. Nanginum si Samsun ag binmalik kay kabisugan bilug. Inda pag bulbugan iningarnan In Hakuri. Asan di inda sa Lihi tugka kainda.

²⁰ Pinamunuan ni Samsun ti manga Israilita sa sulud duwapulu timpu. Sa tunda pag udas sakup waya manga Pilistiyu kanda daga.