Talaghusay 14 - Hanunuu

Si Samsun ag ti Usa ka Daraga taga Timna

¹ Usa ka sirang, nag-atag si Samsun sa Timna, ag may nakitan siya ati usa ka daraga Pilistiyu.

² Pagka nuli siya, sinabihan niya kay manga gurang. Magkun siya, “May nakitan duy aku ati sa Timna usa ka babayi Pilistiyu. Bul-a duy niyu siya hampay kang asawan-un.”

³ Dapat nagsagut kay manga gurang, “Hayga gustu gid nimu mangasawa ginan sa manga Pilistiyu unman magsarig sa Diyus? Unman gid aw lugud kawu may magkapilian sa kanta manga kakilala ngatay kasimanwa?” Nagsagut si Samsun sa kay ama, “Basta bul-a niyu siya para sa kangku, dahil siya kang pagkaibgan.”

⁴ Balaw alam manga gurang ni Samsun kay pasya kagustuhan maaw Panginuun. Dahil maghanap ti Panginuun pagkakataun lumaban sa manga Pilistiyu, dahil sa ati katpung ti Israil sakup manga Pilistiyu.

⁵ Nag-atag si Samsun sa Timna kaibahan kay manga gurang. Pagka atag si Samsun sa manga taranuman ubas sa Timna, kadaka siya sinulang usa ka anak liyun mag-ngurub.

⁶ Pinabisug siya Ispiritu Panginuun, ag linuuk niya ti liyun sa panab-anan niya manga kamang ga sa magluuk lang siya anak kambing. Dapat unman niya inda sinabi sa kay manga gurang.

⁷ Bag-u inatagan ni Samsun ti babayi, nanharampangan sida duwa. Pagkaibgan gid ungud niya ti babayi.

⁸ Pagkalawuy manga pira ka sirang, nagbalik si Samsun sa Timna hampay pakasalan ti babayi. Ati siya lakaw sa dalan nu naan minatay niya ti liyun hampay bantayan inda. Ag nakitan niya ti kayamuan putyukan ag daykut sa bilug liyun.

⁹ Kinmuut siya daykut ag kinaun habang maglakaw. Pagka nakitan niya kay manga gurang, pinakan-an niya sida daykut, ag kinaun diman nida inda. Dapat balaw niya sida sinabihan kuntay bin-ul niya inda sa bilug namatay liyun.

¹⁰ Nag-atag kay ama ni Samsun sa balay urumagadun niya, ag ati nangalistu karan-an si Samsun angay sa surundanun nida kailangan buwatun lalaki.

¹¹ Pagka ati si Samsun pinakan-an siya 30 ka anak manga lalaki hampay makaibahan niya.

¹² Magkun si Samsun sa kanda, “May patigmahun aku sa kanyu. Nu mapintuan niyu inda bag-u matapus ti pitu ka sirang karan-an, pakan-an niku kamu 30 ka pisahan linu ag 30 diman ka mahalaga pag rutay.

¹³ Dapat nu unman niyu mapintuan, kamu ti pagpakaun sa kangku 30 ka pisahan linu ag 30 ka mahalaga pag rutay.” Nagsagut sida, “Hu, sabihan sa kanmi kanmu patigmahun.”

¹⁴ Magkun si Samsun, “Ginan sa mangangaun, linmuwang ti karan-unun, ag ginan sa mabaskug, linmuwang ti matagsing.” Nakalawuy ti tulu ka sirang dapat unman gid nida inda magkapintuan.

¹⁵ Pagka sa ikap-at pag sirang, sinabihan nida kay asawa ni Samsun, “Pakihampangi kanmu asawa kuntay sabihan niya sa kanmu kay sagut sa kay patigmahun hampay maalaman nimi. Nu unman, sunugun kawu nimi hanggan ti magtal-anakan nimu ama. Ipinaataytag aw lugud niyu kami sa inda pag karan-an hampay bul-un kanmi kasiyunan?”

¹⁶ Nakan nag-atag ti babayi sa kan Samsun maglulumiun. Magkun siya, “Unman maaw nimu aku pagmahalun. Namapintu kawu patigmahun sa kang manga kasimanwa dapat unman nimu sinabi sa kangku kay sagut.” Nagsagut si Samsun, “Unman ngani niku sinabi sa kang manga gurang sa kanmu aw waya.”

¹⁷ Siyun ginan udyi may apas kay maglumi ti babayi tugka sa ikapitu pag sirang. Nakan sinabi yi lang ni Samsun sa kanya kay sagut dahil magpilit siya. Ag ti sinabi ni Samsun sa kanya sinabi diman waydi niya sa kay manga kasimanwa.

¹⁸ Nakan bag-u natapus ti ikapitu pag sirang, sinagut nida ti patigmahun. Magkun sida sa kan Samsun, “Udyi may tumagsing sa daykut, ag udyi may bumisug sa liyun.” Nagsagut si Samsun, “Nu balaw niyu pinilit kang asawa, unman mana niyu naalaman kay sagut.”

¹⁹ Sinuldan maan Ispiritu Panginuun si Samsun. Nag-atag siya sa Askalun ag ati pinanmatay niya ti 30 ka tawu ag binul-an manga kasiyunan ag manga rutay. Bag-u ipinakaun niya ti manga rutay sa manga tawu nakapintu sa kay patigmahun. Pagkatapus nuli siya sa kay manga gurang, magkaisug gid siya dahil sa nangyari.

²⁰ Kay asawa ni Samsun ipinaasawa sa pinakaun-an pag abay lalaki sa kanda kasal.