Talaghusay 13 - Hanunuu

Ti Kapanganakan ni Samsun

¹ Nagbuwat maan kadautan ti manga Israilita sa magbantay Panginuun, nakan ipinasakup sida Panginuun sa manga Pilistiyu sa sulud upatpulu ka timpu.

² Sa ati katpung pag panahun, may usa ka lalaki kay ngaran si Manwa. Kabilang siya sa lahi ni Dan, ag mag-uli siya sa Sura. Kay asawa unman mag-anak.

³ Usa ka sirang, nagpakakit ti anghil Panginuun sa kay asawa ni Manwa ag magkun, “Tugka kainda unman waya kawu may anak. Dapat balaw dumugay mamuduy kawu ag manganak lalaki.

⁴ Taynguna, danga yi kawu mag-inum intus ngatay una hintay pag kalasi irinmun makalangu, ngatay magkaun una hintay pag karan-unun pagbaliwun mauring.

⁵ Dahil ti ianak nimu pag lapsag italaga nimu sa Diyus bilang usa ka Nasariyu. Danga gid nimu pag-uguya kay buhuk. Iribri niya ti Israil sa manga Pilistiyu.”

⁶ Sinabihan babayi kay asawa. Magkun siya, “Nagpakakit sa kangku ti usa ka suruguun Diyus bilang ga usa ka anghil Diyus. Kinulbaan aku! Unman aku namaingana nu taga naan siya ag unman diman siya nanabi nu si unu siya.

⁷ Magkun siya sa kangku mamuduy aku ag manganak lalaki. Sinabihan diman niya aku danga mag-inum intus ngatay una hintay pag kalasi irinmun makalangu, ngatay magkaun una hintay pag karan-unun pagbaliwun mauring, dahil ti ianak niku pag lapsag italaga sa Diyus bilang usa ka Nasariyu ginan sa kay pagkalusad tugka sa mamatay siya.”

⁸ Dahil siyun, nandarangin si Manwa sa Panginuun. Magkun siya, “Panginuun, nu mahimu pabalika kanmu ipinadara pag suruguun hampay tudluan kami nu unu ti dapat nimi buwatun sa anak nimi nu mianak yi siya.”

⁹ Dinungug Diyus ti darangin ni Manwa. Nagpakakit maan ti anghil Diyus sa kay asawa ni Manwa habang matukawan siya usa-usa sa tanman.

¹⁰ Dali-dali niya hinanap kay asawa ag sinabihan, “Manwa, abala! Inda yi ti tawu nagpakakit sa kangku katpung usa ka sirang.”

¹¹ Tinmindug si Manwa ag dinmasun sa kay asawa. Pagka nakitan niya ti tawu, pinaingana niya, “Kawu aw ti nanhampang sa kang asawa?” Nagsagut siya, “Hu.”

¹² Nagpaingana si Manwa sa kanya, “Nu matupad yi kanmu pagsabihun, unu nguna ti manga surundanun tungkul sa pagpangabuhi hanggan ti buruwatun anak?”

¹³ Nagsagut ti anghil, “Kailangan sundun nimu asawa ti tanan sinabi niku sa kanya.

¹⁴ Danga siya magkaun una hintay ginan sa ubas. Danga diman siya mag-inum intus ngatay una hintay pag kalasi irinmun makalangu, ngatay magkaun una hintay pag karan-unun pagbaliwun mauring. Kailangan sundun gid niya ti tanan sinabi niku sa kanya.”

¹⁵ Magkun si Manwa sa anghil, “Danga dap kawu mag-ighit dahil mangiyaw kami anak kambing para sa kanmu.”

¹⁶ Nagsagut ti anghil, “Una mangalagad aku, balaw niku kan-un ti ihayin nimu pag karan-unun. Mayad waya paghandug yi lang kawu handug pagsunugun para sa Panginuun.” (Unman alam ni Manwa anghil maaw tunda Panginuun.)

¹⁷ Napaingana si Manwa, “Unu duy kanmu ngaran, hampay mapasalamatan nimi kawu sa udas matupad kanmu sinabi.”

¹⁸ Nagsagut ti anghil, “Hayga gustu gid niyu maalaman kang ngaran? Makuri inda intindihun.”

¹⁹ Bag-u nagbuul si Manwa anak kambing ag handug pasalamat, bag-u ihinandug niya inda sa babaw harandugan batu para sa Panginuun. Ag habang magbantay si Manwa hanggan kay asawa, nagbuwat ti Panginuun makadululaw pag bagay.

²⁰ Nakitan nida ti anghil Panginuun paatag tungud kaibahan sa maglabdaban apuy. Dahil sa kanda nakitan, rargu linmuhud ti mag-asawa.

²¹ Siyun nida pag nasalman anghil maaw tunda Panginuun. Ag siyun ginan unman yi nida nakitan tunda pag anghil.

²² Magkun si Manwa sa kay asawa, “Pihu gid mamatay kita dahil nakitan nita ti Diyus.”

²³ Dapat nagsagut kay asawa, “Nu gustu Panginuun matyun kita, mana balaw niya tinanggap kanta manga handug. Mana unman diman niya ipinakakit sa kanta tunda pag makadululaw ngatay kay sinabi sa kanta ti tungkul sa anak.”

²⁴ Nagras-ug ti udas kapanganakan asawa ni Manwa. Lalaki kay anak ag iningarnan nida Samsun. Nagdaka ti anak ag pinapaladan Panginuun.

²⁵ Ti Ispiritu Panginuun nag-umpisa nanguna sa kanya habang ati siya sa kampu ni Dan, sa karaw-an Sura ag Istaul.