Talaghusay 12 - Hanunuu

Si Hipti ag ti Lahi ni Ipraim

¹ Nagtipun ti manga sundalu Ipraim, ag nagdipay sida sa Sapa Hurdan ag nag-atag sa Sapun hampay atubangun si Hipti. Nagpaingana sida, “Hayga unman nimu kami tinawag katpung nanlaban kamu sa manga Amunita? Dahil sa binwat nimu inda, irubun nimi kawu asan sa kanmu sulud balay.”

² Dapat magkun si Hipti sa kanda, “Masyadu kanmi lalabanan sa manga Amunita, naghagad aku awat sa kanyu. Dapat unman niyu aku inawatan.

³ Pagka naalaman niku balaw kamu mangawat, ibinuhis niku kang buhi sa labanan. Ag pinanalu aku Panginuun. Taynguna, hayga baga gustu niyu lumaban sa kangku?”

⁴ Nagsagut ti manga taga Ipraim, “Kamu pag manga taga Gilyad madayagan lang ginan sa Ipraim ag Manasis.” Nakan tinipun ni Hipti ti manga lalaki sa Gilyad ag nanlaban sida sa manga taga Ipraim. Ag natalu nida ti manga taga Ipraim.

⁵ Inagaw nida ti manga rugar sa Sapa Hurdan diripayan atabug sa Ipraim, hampay unman may manga taga Ipraim makapalagiw. Una si unu ti dumipay, pagpaingan-un nida nu taga Ipraim aw siya ngatay balaw. Nu sumagut siya, “Balaw,”

⁶ pag-ipabagaw nida siya “Shibulit,” dahil ti manga taga Ipraim unman makasampit inda. Nu kay bagawun “Sibulit,” dakpun rargu nida ag matyun ati mismu sa may diripayan Sapa Hurdan. Sa ati katpung pag udas, 42,000 taga Ipraim ti namatay.

⁷ Pinangunahan ni Hipti ti Israil sa sulud unum ka timpu. Pagka namatay siya, ilinbung siya sa usa ka banwa sa Gilyad.

Si Ibsan, si Ilun ag si Abdun

⁸ Pagka namatay si Hipti, si Ibsan taga Bitlihim ti nag-ublus sa kanya bilang takinan Israil.

⁹ Si Ibsan may 60 ka anak: 30 ka lalaki ag 30 ka babayi. Ipinaasawa niya kay manga anak sa manga balaw sakup nida lahi. Pinangunahan niya ti Israil sa sulud pitu ka timpu.

¹⁰ Pagka namatay siya, ilinbung siya sa Bitlihim.

¹¹ Ti nag-ublus sa kanya bilang takinan Israil si Ilun taga Sabulun. Pinangunahan niya ti Israil sa sulud sampulu ka timpu.

¹² Pagka namatay siya ilinbung siya sa Ayalun sakup Sabulun.

¹³ Ti nag-ublus sa kanya bilang takinan Israil si Abdun anak ni Hilil taga Piratun.

¹⁴ May 40 siya ka anak lalaki ag 30 ka laki lalaki, ag ti kada usa sa kanda may asnu pagsakyan. Pinangunahan niya ti Israil sa sulud walu ka timpu.

¹⁵ Pagka namatay siya, ilinbung siya sa Piratun, sa kabantudan Ipraim, sakup kaybi manga Amalikita.