Talaghusay 11 - Hanunuu

Si Hipti

¹ Si Hipti taga Gilyad usa ka mabaskug pag sundalu. Kay ama si Gilyad ag kay ina usa ka babayi baraydan.

² May manga anak si Gilyad sa kay gid asawa. Ag pagka nagdaka sida, pinalayas nida si Hipti. Magkun sida, “Unman gid kawu may manahun sa kanmi ama, dahil anak kawu sa tuhay pag babayi.”

³ Nakan inmighit si Hipti ginan sa kanda ag nangulian sa Tub, nu naan nagkuyug sa kanya ti usa ka gurupu manga tawu unman may pulus kanda manga pagbuwatun.

⁴ Sa ati katpung, nanlalabanan ti manga Amunita ag ti manga Israilita.

⁵ Dahil siyun, ipinab-ul manga manugpamahala Gilyad si Hipti ati sa Tub.

⁶ Magkun sida, “Panguluhi kami sa kanmi paglaban sa manga Amunita.”

⁷ Dapat magkun si Hipti, “Kabay magkagalit kamu sa kangku ag pinalayas niyu aku sa balay niku ama? Taynguna asan kamu sa kagipitan, maghagad kamu awat sa kangku?”

⁸ Dapat magkun sida, “Kailangan kawu nimi. Pagpayag yi kawu, pagkuyug kawu sa kanmi sa paglaban sa manga Amunita, ag kawu ti bumaliw takinan sa Gilyad.”

⁹ Nagsagut si Hipti, “Nu manguyug gid waydi aku sa labanan ag papanaluhun aku Panginuun, aku gid aw lugud kanyu buwatun takinan?”

¹⁰ Magkun sida, “Hu, kawu ti buwatun nimi takinan. Ti Panginuun mismu kanmi kastigus.”

¹¹ Nakan kinmuyug si Hipti sa kanda, pinili siya manga taga Gilyad bilang kanda pinagka takinan ag kumandir. Bag-u ati sa Mispa, sa atubangan Panginuun, sinabi ni Hipti kay manga taratu bilang takinan.

¹² Bag-u namasugu si Hipti manga manugpadakit hampay mamaingana sa hari manga Amunita nu hayga paggirahun nida ti Israil.

¹³ Inda kay sagut hari manga Amunita sa manga manugpadakit ni Hipti: “Katpung nagluwas manga Israilita sa Ihiptu, sinakup nida kanmi manga daga ginan sa Arnun tugka sa Habuk, atabug sa Sapa Hurdan. Nakan taynguna, ulian niyu inda sa kanmi kaayad.”

¹⁴ Ipinabalik ni Hipti ti manga manugpadakit sa hari manga Amunita

¹⁵ hampay sabihun, “Balaw nimi sinakup ti daga Muab ngatay ti Amun.

¹⁶ Katpung inmighit sa Ihiptu kanmi manga ginurang, lakaw sida sa pangawakawaan atabug sa Dagat Marara tugka sa nakaras-ug sida sa Kadis.

¹⁷ Bag-u nagpadara sida manga manugpadakit sa hari Idum hampay paingan-un nu mahimu pahintulutan sida lumawuy sa kanda daga, dapat unman sida pinahintulutan. Katunda diman ti binwat hari Muab sa kanda. Nakan napatayak yi lang sida sa Kadis.

¹⁸ “Pagka sa uryan, nagpadiritsu sida sa kanda paglakaw sa pangawakawaan. Nanlawuy sida sa Idum hanggan Muab tugka sa nakaras-ug sida sa butlakan Muab sa dipay Luung Arnun. Ati sida nangampu, dapat unman sida nandipay sa Arnun dahil katugkaan ati Muab.

¹⁹ “Bag-u nagpadara sida manga manugpadakit sa kan Sihun hari manga Amuriyu (maghari sa Hisbun) hampay paingan-un nu mahimu pahintulutan sida lumawuy sa kanda daga hampay makaras-ug sida sa kanda rugar.

²⁰ Dapat unman nagtiwala si Sihun sa kanda. Bagkus ngap, tinipun niya kay manga sundalu sa Yahas ag ginira ti manga Israilita.

²¹ Dapat ipinatalu sida Panginuun, ti Diyus Israil, sa manga Israilita. Nakan sinakup manga Israilita ti tanan daga manga Amuriyu mag-uli sa tunda pag rugar:

²² ginan sa Arnun tugka sa Habuk, ag ginan sa pangawakawaan tugka sa Sapa Hurdan.

²³ “Nakan ti Panginuun, ti Diyus Israil, imaw ti nagpalayas sa manga Amuriyu ag nagpakaun daga sa manga Israilita. Ag taynguna gustu niyu bul-un inda?

²⁴ Apua niyu ti pag-ipakaun sa kanyu ni Kimus niyu diyus-diyusan. Ag apuun diman nimi ti pag-ipakaun sa kanmi Panginuun nimi Diyus.

²⁵ Hintay duy, mas madunung aw waya kawu sa kan Hari Balak taga Muab, anak ni Sipur? Unman ngani sida nanlaban sa Israil tungkul sa daga ngatay linmaban sa kanda. Man-aw?

²⁶ Manga 300 yi ka timpu mag-ulian ti manga Israilita sa Hisbun ag sa Aruwir, ag sa manga baryu sa sangput nida, hanggan sa manga banwa sa saruy Arnun. Hayga taynguna lang niyu naala-ala bul-un inda?

²⁷ Unman kami may daut binwat sa kanyu, dapat kamu daut kanyu pagbuwatun sa kanmi dahil gustu niyu lumaban sa kanmi. Ti Panginuun imaw ti pumihu sa kanta nu si unu sa kanta ti tama.”

²⁸ Dapat unman gid binati hari manga Amunita ti padakit ni Hipti.

²⁹ Taynguna, hinarian si Hipti Ispiritu Panginuun. Namalibut siya sa buu Gilyad ag Manasis hampay tipunun ti manga sundalu. Pagkatapus namalik siya sa Mispa sakup Gilyad. Ag siyun ginan, ginira niya ti manga Amunita.

³⁰ Nagtaratu si Hipti sa Panginuun. Magkun siya, “Nu pahintulutan gid nimu matalu niku inda pag manga Amunita,

³¹ ihandug niku bilang handug pagsunugun sa kanmu ti un-an lumwas sa kang balay hampay mansulang sa kang pag-uli panalu ginan sa labanan.”

³² Nanlaban si Hipti sa manga Amunita, ag pinapanalu siya Panginuun.

³³ Natalu nida ti manga Amunita, ag mayamu gid kanda minatay. Nasakup nida ti 20 ka banwa ginan sa Aruwir atabug sa sangput Minit tugka sa Abil Kiramim.

Kay Anak ni Hipti

³⁴ Pagka nuli si Hipti sa Mispa sinulang siya niya anak babayi magsayaw habang magpatunug pamakaransing. Bugtung siya pag anak ni Hipti.

³⁵ Pagka nakitan siya ni Hipti, ginitas ni Hipti kay rutay, ag magkun, “Anak niku, pinaruku gid nimu aku dahil nakataratu aku sa Panginuun ihandug niku sa kanya ti un-an manulang sa kangku, ag balaw yi niku inda mabawi.”

³⁶ Nagsagut kay anak ni Hipti, “Ama, nakataratu kawu sa Panginuun. Nakan tupada ti itinaratu nimu, dahil pinanalu kamu Panginuun sa kanyu manga kalaban manga Amunita.

³⁷ Dapat may usa lang aku ka bagay hagadun sa kanmu: pahintuluti aku sa duwa ka bulan makapalibut-libut aku sa manga bantud hampay manruku kaibahan kang manga kakilala babayi, dahil mamatay aku unman makaasawa.”

³⁸ Pinahintulutan siya ni Hipti. Nakan sa sulud duwa ka bulan, namalibut-libut siya sa manga bantud kaibahan kay manga kakilala babayi hampay manruku, dahil mamatay siya unman makaasawa.

³⁹ Pagkalawuy duwa ka bulan, namalik siya sa kay ama. Ag tinupad ni Hipti kay itinaratu sa Panginuun, namatay kay anak usa ka tugnaw pag daraga. Inda ti inumpisahan kaugalian Israil

⁴⁰ sa kada timpu, magpalibut-libut ti manga daraga Israil sa manga bantud ag magpanrukuan sa sulud upat ka sirang bilang pag-alaala sa anak babayi ni Hipti taga Gilyad.