Talaghusay 10 - Hanunuu

Si Tula ag si Hair

¹ Pagka namatay si Abimilik, si Tula kay anak ni Puwa, kay laki ni Dudu imaw ti nagpanguna sa pagribri sa Israil. Ginan siya sa lahi ni Isakar, dapat nangulian siya sa Samir sa kabantudan Ipraim.

² Pinangunahan niya ti Israil sa sulud 23 ka timpu. Pagka namatay siya ilinbung siya sa Samir.

³ Dinmasun sa kan Tula si Hair taga Gilyad. Pinangunahan niya ti Israil sa sulud 22 ka timpu.

⁴ May 30 siya ka anak, ag ti kada usa sa kanda may usa ka asnu pagsakyan. Inda sida imaw ti magdumara sa 30 ka banwa sa Gilyad pag-ingarnan kainda manga banwa ni Hair.

⁵ Pagka namatay si Hair, ilinbung siya sa Kamun.

Pinakurianan manga Amunita ti manga Israilita

⁶ Nagbuwat maan kadautan ti manga Israilita sa magbantay Panginuun. Nagpatlikud sida sa Panginuun ag nagsamba sa manga tawu-tawu Baal hanggan Astarut, ag sa manga diyus-diyusan Aram, Sidun, Muab, Amun, ag Pilistiya.

⁷ Dahil siyun, nagalit ti Panginuun ag ipinasakup niya sida sa manga Amunita ag manga Pilistiyu.

⁸ Bag-u siyun ginan pag timpu, pinakurian ag inapi nida ti manga Israilita. Sa sulud 18 ka timpu pinakurianan nida ti tanan Israilita sa Gilyad, sa butlakan Sapa Hurdan sakup kaybi inda manga Amunita.

⁹ Nagdipay diman ti manga Amunita sa isalpan Sapa Hurdan ag nanlaban sa manga lahi nida ni Huda, ni Binhamin, ag ni Ipraim. Dahil siyun, masyadu gid nakurian ti Israil.

¹⁰ Nakan naghagad awat ti manga Israilita sa Panginuun. Magkun sida, “Nagkasala kami laban sa kanmu, dahil nagpatlikud kami sa kanmu kanmi Diyus ag nagsamba kami sa manga tawu-tawu Baal.”

^11-12 Nagsagut ti Panginuun, “Katpung pinakurian kamu manga Ihipsiyu, Amuriyu, Amunita, Pilistiyu, Siduniyu, Amalikita, ag manga Maunita, naghagad kamu awat sa kangku ag irinibri niku kamu.

¹³ Dapat nagpatlikud kamu sa kangku ag nagsamba sa tuhay pag manga diyus. Nakan taynguna balaw yi niku kamu iribri.

¹⁴ Hayga balaw kamu maghagad awat sa manga diyus kanyu pinili sambahun? Sida ti paribrihan sa kanyu sa udas magkakurian kamu.”

¹⁵ Dapat magkun sida sa Panginuun, “Nagkasala kami sa kanmu, nakan buwata ti pagkaibgan nimu buwatun sa kanmi. Dapat kaawai duy nimu kami, ribrihan kami taynguna.”

¹⁶ Bag-u dinayu nida kanda diyus-diyusan ag nagsamba sa Panginuun. Sa kadugayun unman yi mabata Panginuun makitan sida magkakurian.

¹⁷ Rinmas-ug ti sirang nanlalabanan ti manga Amunita tag sa manga Israilita. Nagkampu ti manga Amunita sa Gilyad, ti manga Israilita sa Mispa.

¹⁸ Nanharampangan ti manga takinan Gilyad. Magkun sida, “Nu si unu ti manguna sa kanta manlaban sa manga Amunita, imaw ti buwatun nita takinan sa tanan mag-uli sa Gilyad.”