Talaghusay 1 - Hanunuu

Binihag Lahi ni Huda ag Lahi ni Simyun si Aduni Bisik

¹ Pagka namatay si Huswi, namaingana ti manga Israilita sa Panginuun nu si unu sa kanda manga lahi ti un-an lumaban sa manga Kananiyu.

² Nagsagut ti Panginuun, “Ti lahi ni Huda, dahil pag-ipakaun niku sa kanda ati pag daga.”

³ Nakan magkun ti lahi ni Huda sa kanda kadugu sa lahi ni Simyun, “Awati niyu kami hampay sakupun ti rugar manga Kananiyu para sa kanmi, dahil awatan diman nimi kamu sa pagsakup rugar para sa kanyu.” Nakan inawatan ngani sida lahi ni Simyun sa labanan.

^4-5 Pagka nan-gira ti lahi ni Huda, inawatan sida Panginuun laban sa manga Kananiyu ag Pirisiyu. 10,000 tawu kanda minatay sa Bisik. Habang maglaban sida sa Bisik, nakalaban nida ati si Aduni Bisik.

⁶ Nalagiw si Aduni Bisik, dapat linagas siya manga Israilita ag nadakup siya. Pinlud nida kay manga ina-ina kamang ag lulud.

⁷ Magkun si Aduni Bisik, “70 ka hari ti pinanpuldan niku ina-ina kamang ag lulud bag-u namunpun sida dabu sa kang sirung lamisa. Bag-u kainda binwat diman Diyus sa kangku ti binwat niku sa kanda.” Bag-u dinara nida si Aduni Bisik sa Hirusalim, ag ati siya namatay.

⁸ Ginira manga lahi ni Huda ti Hirusalim ag nasakup nida inda. Pinanmatay nida ti manga mag-ulian siyun ag sinunug ti banwa.

⁹ Pagkatapus, ginira nida ti manga Kananiyu mag-uli sa manga kabantudan, sa Nigib, ag sa manga tagudtud sa isalpan.

¹⁰ Sinalakay diman nida ti manga Kananiyu mag-uli sa Hibrun (sa kabag-u pag-ingarnan Kiryat Arba), ag pinanmatay nida sida ni Sisay, Ahiman, ag si Talmay.

Sinakup ni Utniyil ti Banwa Dibir

¹¹ Ginan sa Hibrun, ginira waya gid nida ti manga mag-uli sa Dibir (sa kabag-u pag-ingarnan Kiryat Sipir).

¹² Magkun si Kalib, “Ipaasawa niku kang anak si Aksa sa tawu makatalu ngatay makasakup sa Kiryat Sipir.”

¹³ Si Utniyil, anak ni Kinas patar-ari ni Kalib imaw ti nakaagaw sa banwa. Nakan ipinaasawa ni Kalib sa kan Utniyil kay anak si Aksa.

¹⁴ Pagka mag-asawa yi sida, sinabihan ni Aksa kay asawa kuntay manhagad sida dugang pag daga sa kay ama. Bag-u nag-atag si Aksa sa kan Kalib, ag pagka nakadugsun siya ginan sa kay asnu, pinaingana siya ni Kalib nu unu kay kailangan.

¹⁵ Sinmagut si Aksa, “Pakan-i aku pahintulut. Gustu mana niku pakan-an nimu aku manga bulbugan, dahil ti ipinakaun nimu pag daga sa kangku sa Nigib unman may bulbugan.” Nakan ipinakaun ni Kalib sa kanya ti rugar may manga bulbugan sa babaw hanggan sa lawud.

Ti manga Pagsakup Lahi ni Huda ag Lahi ni Binhamin

¹⁶ Pagka ginminan ti manga lahi ni Huda sa banwa Hiriku, kinmuyug sa kanda ti manga Kiniyu, ginan sa lahi manugang ni Muysis, atabug sa pangawakawaan Huda. Nangulian sida kaibahan ti manga tawu ati, arani sa banwa Arad sa Nigib.

¹⁷ Bag-u kay lahi maan ni Simyun ti inawatan lahi ni Huda sa pagsakup banwa Sipat pag-ulian diman manga Kananiyu. Ipinadamhak nida lubus inda pag banwa, nakan iningarnan inda Hurma.

¹⁸ Sinakup diman nida ti Gasa, Askalun, ag Ikrun hanggan kanda manga sakup rugar sa kay sangput.

¹⁹ Inawatan Panginuun ti lahi ni Huda. Sinakup nida ti manga kabantudan, dapat unman nida natalu ti manga mag-uli sa manga karatagan dahil tunda pag manga tawu may manga kalisa baul.

²⁰ Ag angay sa itinaratu ni Muysis, ti Hibrun ipinakaun sa kan Kalib. Pinalayas ni Kalib ti tulu ka magtal-anakan mag-uli sa inda pag rugar kay manga lahi ni Anak.

²¹ Dapat unman pinalayas lahi ni Binhamin ti manga Hibusiyu mag-ulian sa Hirusalim. Nakan tugka kainda parargu mag-ulian ti manga Hibusiyu sa Hirusalim kaibahan sa manga lahi ni Binhamin.

Sinakup Duwa ka Lahi ni Husi ti Bitil

^22-23 Taynguna, sinalakay manga lahi ni Husi ti banwa Bitil (sa kabag-u pag-ingarnan Lus), ag inawatan sida Panginuun. Pagka nagpadara sida manugtiid sa Bitil,

²⁴ may nakitan ti manga manugtiid usa ka tawu magluwas ginan sa ati pag banwa. Magkun sida sa kanya, “Awati kami nu kabitay makasulud sa banwa ag balaw nimi kawu unhun.”

²⁵ Nakan tinudluan niya sida. Ag pinanmatay nida ti tanan mag-uli sa ati pag banwa. Dapat unman nida inunu ti tawu nagtudlu sa kanda hanggan kay buu niya magtal-anakan.

²⁶ Inda pag tawu nag-atag sa daga manga Hitiyu, ag ati nagpatindug siya usa ka banwa iningarnan niya Lus. Imaw diman inda kay ngaran tugka kainda.

Manga Tawu Unman Pinalayas manga Israilita sa Kanda manga Daga

²⁷ Unman pinalayas lahi ni Manasis ti manga mag-ulian sa Bit San, Taanak, Dur, Ibliam, Migidu, hanggan ti manga banwa sa sangput, dahil magpaniguradu ti manga Kananiyu unman man-alis siyun ginan pag daga.

²⁸ Pagka makapangyarihan yi ti manga Israilita, pinilit nida mantarabahu ti manga Kananiyu para sa kanda, ag balaw gid nida sida pinalayas.

²⁹ Unman diman pinalayas lahi ni Ipraim ti manga mag-ulian sa Gisir. Nakan inda pag manga Kananiyu parargu mag-ulian kaibahan nida.

³⁰ Unman diman pinalayas lahi ni Sabulun ti manga mag-ulian sa Kitrun ag Nahalul. Nakan inda pag manga Kananiyu parargu mag-ulian ati kaibahan nida. Dapat pinilit nida sida mantarabahu para sa kanda.

³¹ Unman diman pinalayas lahi ni Asir ti manga mag-ulian sa Aku, Sidun, Aksib, Hilba, Apik, ag Rihub.

³² Nakan parargu inda pag manga Kananiyu mag-ulian ati kaibahan nida.

³³ Unman diman pinalayas lahi ni Niptali ti manga mag-ulian sa Bit Simis ag Bit Anat. Nakan inda pag manga Kananiyu parargu mag-ulian ati kaibahan nida. Dapat pinilit nida sida mantarabahu para sa kanda.

³⁴ Nu tungkul sa lahi ni Dan, unman sida pinahintulutan manga Amuriyu mangulian sa karatagan, nakan ati lang sida nangulian sa kabantudan.

³⁵ Unman gid inmighit sa Hiris, Ayalun ag Saalbim ti manga Amuriyu, dapat igu makapangyarihan yi ti lahi ni Husi, pinilit nida ti manga Amuriyu sa pagtarabahu para sa kanda.

³⁶ Ti sakup manga Amuriyu ginan sa Dalan Patukad sa Akrabim atabug sa unahan waya Sila.