Sipanyas 3 - Hanunuu

Ti Aratubangun Hirusalim

¹ Magkun si Sipanyas, “Kaawaawa ti Hirusalim! Ti manga nasakupan niya manuglaban sa Diyus ag magbuwat mayagting pag manga bagay. Kay manga takinan maihid-ihid.

² Unman sida magpatingi una sa kantapu, ag dayu sida magpatudlu. Unman sida magsarig sa Panginuun kanda Diyus, unman magdangup sa kanya.

³ Kanda manga pinunu parihu sa liyun mag-ngurub. Kanda manga takinan parihu sa manga simarun idu maghanap kay makaun nu yabi ag unman may pagsawadan tugka sa surip.

⁴ Kanda manga purupita palabi-labihun sa kanda manga pagbuwatun ag unman makatiwalaan. Paglapastanganun nida manga manughandug ti Balay Diyus ag paglabagun nida ti Kasuguan Diyus.

⁵ Dapat asan di ti kadayawan Panginuun sa karaw-an nida banwa. Pagbuwatun Panginuun ti mayad ag balaw ti daut. Sirang-sirang pag-ipakakit niya kay kaayadan, ag unman niya inda pag-apasan. Dapat ti daut parargu sa pagbuwat daut ag unman sida magkay-a.

⁶ “Magkun ti Panginuun, ‘Pinapas niku ti manga nasyun; ginuba niku kanda manga banwa hanggan kanda manga alad batu ag manga bantayaw. Unman may nasawad sa kanda manga nasakupan, nakan udyi may tawu maglakaw sa kanda manga karsada.

⁷ Dahil sa kang manga binwat inda inisip niku igalang yi aku niku manga nasakupan ag tanggapun yi nida kang tamyaw sa kanda, hampay balaw yi maguba kanda banwa angay sa kang itinagka sa kanda. Dapat lalu waya gid sida nagpakadaut.

⁸ “ ‘Nakan kamu pag manga matinupadun pag taga Hirusalim, alagda niyu ti sirang unu-unuhun niku ti manga nasyun. Dahil nagpasya yi aku tipunun ti manga nasyun hanggan ti manga kaharian hampay ibuhus niku sa kanda ti mahigpit niku pag pangagalit parihu sa apuy mag-irub sa buu kalibutan.

⁹ Pagkatapus, bag-uhun niku ti manga tawu, hampay magpakarani sida tanan sa kangku ag magkarausa mansirbi sa kangku.

¹⁰ Kang manga namululagan pag nasakupan sa baliw dipay manga sapa Itiyupya mandara manga handug sa kangku.

¹¹ “ ‘Sa ati pag sirang sa kang pagparusa, kamu pag manga taga Hirusalim balaw mangay-a sa manga binwat niyu pag kasalanan sa kangku. Dahil bul-un niku ginan sa kanyu ti manga magpalabaw-labaw ag magpayabang-yabang. Nakan unman yi may pumayabang ati sa kang banal pag bantud.

¹² Dapat may sawadan aku sa Hirusalim manga tawu pugri ag makuri. Manhagad sida awat sa kangku.

¹³ Inda pag manga nasawad Israilita balaw sida mamuwat daut. Dayi sida mamudil ngatay mandaya. Mangaun ag maturug sida udyi may pagkadalaan.’ ”

Makabaya ti manga Israilita

¹⁴ Magkun si Sipanyas, “Kamu pag nasakupan Israil, paghuyaw kamu sa kabayaan! Kamu pag manga nasakupan Siun, ti banwa Hirusalim, pagkanta kamu ag pagbaya sa buu tagipusuun!

¹⁵ Dahil balaw yi kamu parusahan Panginuun. Palayasun niya kanyu manga kalaban. Kaibahan niyu ti Panginuun, ti Hari Israil, nakan udyi kamu may kakurian dapat kadalaan.

¹⁶ “Sa ati pag sirang, sabihun manga tawu sa kanyu manga taga Hirusalim, ‘Manga nasakupan Siun, danga kamu magkadala; pagpakarig-un kamu.

¹⁷ Dahil kaibahan niyu ti Panginuun niyu Diyus. Parihu siya sa usa ka makamaskihan pag sundalu manribri sa kanyu. Makabaya gid siya sa kanyu, ag sa panab-anan niya pagmahal bag-uhun niya kanyu buhi. Manganta siya ag manhuyaw may kabayaan dahil sa kanyu,

¹⁸ parihu sa tawu magbaya nu sirang kapistahan.’ “Magkun ti Panginuun, ‘Iribri niku kamu sa tiriisun hampay kamu bukun yi mangay-a.

¹⁹ Sa ati pag sirang, parusahan niku ti tanan mag-ihid sa kanyu. Kamu parihu sa manga karanidu napilay ag namululagan dapat iribri niku kamu ag tipunun di maan. Kaybi pinakay-a kamu, dapat parangalan niku kamu ag buwatun bantug sa buu kalibutan.

²⁰ Hu, tipunun niku kamu sa ati pag sirang, ag pauliun sa kanyu nasyun. Parangalan niku kamu ag buwatun bantug sa buu kalibutan. Mangyari inda sa sirang paabundahun niku kanyu mayad pag kahamtangan. Makitan gid ngap niyu inda. Aku, ti Panginuun, ti magsabi inda.’ ”