Sipanyas 2 - Hanunuu

Ti Panawagan sa Pag-ampu

¹ Magkun si Sipanyas sa manga taga Huda, “Nasyun unman may kakay-ahan, pagtirip-nan kamu ag pag-ampu

² bag-u rumas-ug ti itinagka pag sirang palayasun kamu ag ipayag parihu sa upa. Pag-ampu yi kamu bag-u rumas-ug ti sirang ibuhus Panginuun kay masyadu pag pangagalit.

³ Kamu waydi pag manga mapinakumbabaun ag masurundun sa manga sugu Panginuun, pagpakarani kamu sa kanya. Pagparargu kamu sa pagbuwat matadlung ag pagpakumbaba kamu. Barang abi alagaan kamu Panginuun sa sirang ibuhus niya kay pangagalit.”

Parusa sa Nasyun Pilistiya

⁴ “Unman may masawad sa manga nasakupan Gasa ag Askalun. Ti manga nasakupan Asdud kay palayasun sa sulud lang tunga sirang. Palayasun diman ti manga nasakupan Ikrun ginan sa kanda banwa.

⁵ Kaawaawa kamu pag manga Pilistiyu magpangulian sa saruy dagat. Inda ti pagsabihun Panginuun laban sa kanyu: ‘Kamu pag manga Pilistiyu sa Kanaan, papasun niku ag unman may masawad sa kanyu.’

⁶ Nakan kanyu manga daga sa saruy dagat bumaliw paraharaban ag tudir manga karanidu.

⁷ Saklawun tunda manga nasawad taga Huda. Ati sida pag manpaharab kanda manga hayup ag nu rumas-ug ti yabi maturug sida sa manga balay sa Askalun. Kaawaan sida Panginuun nida Diyus ag paabundahun maan sida.”

Ti Parusa sa Nasyun Muab ag Amun

^8-9 Magkun ti Panginuun Makamaskihan, ti Diyus Israil, “Nadnugan niku ti magsurug ag magpuya manga taga Muab ag taga Amun sa kang manga nasakupan. Pag-ipadayaw waya nida kuntay kaya nida agawun ti daga niku nasakupan. Nakan sinaadan niku wayakun niku ti Muab hanggan ti Amun parihu sa Suduma ag Gumura. Ag kanda daga udyi mapakinabangan tugka aban, tubuan inda manga dugihan pag-ilamnun, ag mapnu manga kali buruwatan asin. Girahun inda niku manga nasawad pag nasakupan ag pamul-un nida ti tanan manga kasiyunan inda.”

¹⁰ Magkun si Sipanyas, “Tunda ti balus sa kayabangan manga taga Muab ag taga Amun. Dahil pagpakay-ahun nida ag pagmuransahun ti nasakupan Panginuun Makamaskihan.

¹¹ Padalaun sida Panginuun dahil papasun niya ti tanan manga diyus-diyusan sa buu kalibutan. Ag sambahun siya manga tawu sa tanan nasyun sa kanda manga banwa.”

Ti Parusa sa Nasyun Itiyupya ag Asirya

¹² Magkun ti Panginuun, “Kamu hanggan pag manga taga Itiyupya, ipamatay niku kamu sa girahan.

¹³ “Parusahan diman niku ti manga taga Asirya sa kanaway. Bumaliw ga pangawakawaan ti Ninibi, mauga parihu sa tigangan.

¹⁴ Bumaliw pasturan inda manga baka, kambing, ag iba waya pag kalasi manga hayup. Umapun ti manga bukaw sa manga nadaut tulduk, ag madnugan kanda uni sa manga gaha. Madaut ti manga sabian ag magkaratangkas ti manga sidru pag kayu.

¹⁵ Katunda ti mangyari sa banwa Ninibi, magpadayaw-dayaw kuntay unman may man-gira sa kanda ag unman may pumarihu sa kanda. Dapat lubusan yi madaut ti banwa ag ulianan wadi inda talun hayup. Ag ti kada maglawuy ati magkasari-sari magsurug sa kanda kahamtangan.”