Sipanyas 1 - Hanunuu

¹ Inda ti itinultul Panginuun sa kan Sipanyas katpung si Usyas kay anak ni Amun ti hari sa Huda. Si Sipanyas kay anak ni Kusi, si Kusi kay anak ni Gidalyas, si Gidalyas anak ni Amaryas, ag si Amaryas kay anak ni Isikyas.

Rumas-ug ti Parusa Panginuun

² Magkun ti Panginuun, “Papasun niku ti tanan bagay atay sa kalibutan —

³ ti manga tawu, hayup, manuk, ag isda. Madura ti tanan magpaturun sa tawu hampay magkasala hanggan ti manga makasalanan. Papasun gid niku ti tanan tawu sa kalibutan. Aku, ti Panginuun, ti magsabi inda.

⁴ “Parusahan niku ti manga nasakupan Huda, hanggan ti tanan nasakupan Hirusalim. Papasun niku ti manga nasawad pag manugsamba sa Baal pag diyus-diyusan, hanggan yi ti manga magsirbi pag manga manughandug siyun, hampay rargu yi sida malimtan.

⁵ Papasun diman niku ti manga tawu magdayik sa bubungan nida manga balay hampay mansamba sa init, sa bulan, hanggan sa manga pamgasan. Papasun niku ti manga magsamba ag magpanumpa mansirbi sa kangku, dapat magpanumpa diman mansirbi sa diyus-diyusan sa kan Muluk.

⁶ Papasun niku ti manga magpatlikud ag unman magdangup sa kangku.

⁷ “Danga kamu mag-ingay sa atubangan niku, dahil arani yi ti sirang niku pagparusa. Inalistu yi niku kang manga nasakupan hampay matyun parihu sa hayup pag-isagda. Iinalistu diman niku ti manga kalaban kang binan-awan man-gira sa Huda.

⁸ Sa ati pag sirang, panmatyun niku ti manga taga Huda parihu sa hayup pag-isagda. Parusahan niku kanda manga takinan, hanggan ti manga anak nida hari, hanggan sida tanan ti maghuwad sa daut pag ugali manga taga iba nasyun.

⁹ Parusahan diman niku sa ati pag sirang ti tanan magpaamut sa manga turupadun manga unman magkilala sa kangku, ag ti manga mag-unuunu ag magdaya hampay pun-un manga bagay ti balay nida amu.

¹⁰ “Aku, ti Panginuun, magkun, sa ati pag sirang madnugan ti maglulumian sa Sabian pag-ingarnan Isda sa banwa Hirusalim ag sa bag-u pag bahagi banwa. Madnugan diman ti matnug pag ingay manga magkaragba balay sa manga tagudtud.

¹¹ Paglulumian kamu, kamu pag manga mag-ulian sa ababa bahagi banwa Hirusalim dahil mamatay ti tanan niyu manga manugnigusyu.

¹² “Sa ati pag sirang, usisaun niku mayad ti manga taga Hirusalim ag parusahan niku ti manga tawu masalimpayaan lang sa buhi ag magkumun, ‘Unman may buwatun ti Panginuun, mayad ngatay daut.’

¹³ Pamul-un ginan sa tunda pag manga tawu kanda manga kasiyunan ag wayakun kanda manga balay. Bukun sida ti mangulian sa manga ipinatindug nida pag balay. Ag bukun sida ti uminum intus ginan sa ubas nida itinanum.”

Ti Pinakamadala pag Sirang kay Pagparusa Panginuun

¹⁴ Arani yi ti pinakamadala pag sirang kay pagparusa Panginuun. Inda madali rumas-ug. Makuri masyadu ati katpung pag sirang, dahil una ti maisug pag sundalu manringgit manhagad awat.

¹⁵ Sa ati pag sirang, ipakakit Diyus kay pangagalit. Bumaliw sirang karukuan ag kakurian, sirang pagkarangga hanggan pagkawayak. Bumaliw marurum ag madulum ati pag sirang,

¹⁶ bag-u madnugan ti tunug manga budyung ag ti paragritan manga sundalu maggira sa may alad batu pag manga banwa hanggan sa manga bantayaw nida.

¹⁷ Magkun ti Panginuun, “Ipalakaw niku ti kakurian sa manga tawu, ag lumakaw sida parihu sa buta dahil nagkasala sida sa kangku. Bumulus ga danum kanda dugu, ag mabuyuk ga ugat kanda bangkay.

¹⁸ Dayu makaparibri sa kanda ti manga pilak ag gintu sa sirang ipakakit niku kang pangagalit parihu sa apuy umirub sa buu kalibutan. Dahil kadaka niku papasun ti tanan mag-ulian sa daga.”