Santiyagu 5 - Hanunuu

Paalaala sa manga Mayaman

¹ Pagpatingi kamu pag manga mayaman. Paglumi kamu pagnguynguy dahil sa manga kakurian rumas-ug sa kanyu.

² Daut yi kanyu manga kayamanan, kinaun yi ipus kanyu manga rutay.

³ Una kanyu manga gintu manga pilak tinayan yi. Tunda ngap pag tayan tigpuruyba aban laban sa kanyu, imaw ti ga apuy humirut sa kanyu bilug. Tunda pag kayamanan kanyu tinipun para sa uryan sirang.

⁴ Magtawag magpatutuu laban sa kanyu ti patabig unman ipinakaun niyu sa manga manug-ani sa kanyu tanman. Kay dangup manga manug-ani kanyu inapi aput yi sa langit, nadnugan yi Panginuun Makamaskihan sa tanan.

⁵ Magpadayaw-dayaw kamu dahil kang-ud yi udyi may kurang kanyu kasiyunan sitay sa babaw daga. Nagtabul kamu parihu ga manga hayup iriyawun.

⁶ Kanyu sinintinsiyahan bag-u ipinamatay ti manga tawu una unman may kasalanan ag unman sida naglaban sa kanyu.

Pangungud sa Darangin

⁷ Nakan ngani manga patar-ari, pag-agwanta sa alagad kamu hanggan sa ud rumas-ug ti Panginuun. Isipa duy niyu ti manugtanman. Tutuu yi gid maggagad sa kay ani, mag-agwanta siya sa alagad sa bag-u padna uran, hanggan sa tig bururak katpung pag uran.

⁸ Kailangan diman kamu pag-agwanta sa alagad. Pagkarig-un kanyu nalub-anan, dahil arani yi kay pagras-ug Panginuun.

⁹ Danga kamu maghirinanakitan, manga patar-ari, barang kamu pihuun Diyus kanyu daut kanyu mayad, dahil udyi dugay rumas-ug yi ti Manugpihu.

¹⁰ Manga patar-ari, huwada niyu ti manga purupita ti nagbagaw angay sa kay udyuk Panginuun. Lubus matiniisun sida nag-agwanta sa kakurian.

¹¹ Pagkumnun nita mapalad ti manga matiniisun. Alam yi niyu si Hub matiniisun. Naalaman diman waydi niyu kay binwat Panginuun sa kanya pagka nakalawuy ti kakurian. Siti pag makilala nita kuntay ti Panginuun mapinasunaidun ag maawaun.

¹² Dapat lalu waya manga patar-ari niku, danga kamu magpanumpa nu kamu magtaratu, danga paghinangbita ti langit hanggan ti daga, una lang hintay. Kang-ud yi waydi nu sabihun niyu, “Hu ngani”, nu hu. Sabihun niyu “Unman”, nu unman waydi, barang pihuun kamu Diyus kanyu daut kanyu mayad.

¹³ May tiriisun aw una si unu sa kanyu? Pagdarangin siya. May magbaya aw? Pagkanta siya pagdayaw sa Diyus.

¹⁴ May magkasakit aw sa kanyu? Pabul-an niya ti manga manug-asiwa iglisya, hampay idarangin siya ag payidan lana sa ngaran Panginuun.

¹⁵ Bag-u paayadun ti may sakit dahil kanda magdarangin may tapil pagsarig. Pabisugun siya Panginuun ag patawadun siya nu siya nagkasala.

¹⁶ Nakan ngani isabi niyu kanyu manga kasalanan sa usa kag sa usa, bag-u pagdararanginan kamu sa usa kag sa usa agud kamu paayadun. Daka kay magkabuwat ti darangin tawu matadlung.

¹⁷ Si Ilyas pag tawu ga kanta diman. Nangungud siya sa darangin hampay balaw umuran, bag-u sa sulud tulu ka timpu may unum ka bulan balaw yi ngani nag-uran.

¹⁸ Pagka siya nandarangin maan, bag-u binmunuk ti uran hanggan ti manga tanum namururak gid maan.

¹⁹ Manga patar-ari niku, nu may nagsimray sa kanyu ginan sa katutuuhanan ag nu may usa ka patar-ari nagbawi sa kanya,

²⁰ inda tandai niyu una si unu lang ti magbawi sa tawu makasalanan ginan sa kay naugalian salan, kay irinibri niya ti usa ka tawu karadwa sa kamatayan. Dahil sa kay nagbawi nakan mayamu pag kasalanan ti napatawad yi.