Santiyagu 4 - Hanunuu

Kalaban ngap Diyus Tigmahal sa Ugali Kalibutan

¹ Hintay nguna kanyu pagpun-an irisgan nakan mag-arawayan? Unman aw lugud ti daut pag manga kagustuhan namugad sa kanyu nalub-anan sa kada usa sa kanyu? Nakan pudu lalabanan basad naisipan.

² May paghangadun kamu, dapat unman niyu matanggap. Nakan lumibun lang kamu tawu basta matanggap niyu ti kanyu paghangadun. Kamu maghirak sa kasiyunan manga iba balaw kanyu, nakan kamu magkalagalitan hanggan mag-arawayan. Unman matanggap niyu ti kanyu paghangadun, dahil kamu unman maghagad sa Diyus.

³ Una kamu maghagad balaw waydi kamu pakan-an dahil daut kanyu turunu. Nakan kamu maghagad para gamitun angay lang sa kanyu sadili daut kagustuhan.

⁴ Unman duy kamu makatiwalaan. Unman aw waya niyu alam nu kanyu pagmahalun ti ugali kalibutan, kamu kalaban yi ngap Diyus. Nakan una hintay ti may gustu magmahal sa ugali kalibutan, kalaban yi ngap siya Diyus.

⁵ Barang kanyu isip unman mahalaga ti nisurat sa Banal Kasuratan magkun, “Magkaibug gid ti Diyus magpakiusa sa manga tawu, dahil kay pinakan-an sida arup.”

⁶ Dapat masyadu diman marig-un kay awat Diyus sa kanta. Dahil magkun ti Banal Kasuratan, “Ti Diyus lumaban sa manga mayabang, dapat mag-awat sa manga mapinakumbabaun.”

⁷ Nakan ngani pagpasakup kamu sa Diyus. Labani niyu ti diyablu, bag-u pumakarayu yi siya ginan sa kanyu.

⁸ Pagpakarani kamu sa Diyus, bag-u pumakarani waydi ti Diyus sa kanyu. Lumpiyuha kanyu manga kamang, kamu pag manga makasalanan. Lumpiyuha kanyu tagipusuun, kamu pag manga tawu magkauman-uman kanyu naisipan.

⁹ Pagmaruku kamu pagpanhilumawan paglumi gid kamu. Kanyu magparaarak-akan ilsi niyu luwa mata. Kanyu kabayaan pag-ilisi niyu karukuan.

¹⁰ Pagpakumbaba kamu sa atubangan Panginuun, bag-u kamu paabwatun niya.

Danga Pagpihua Kanmu Patar-ari nu Daut nu Mayad

¹¹ Danga magkaradat-an kamu, manga patar-ari. Nu ti tawu mag-away sa usa ka patar-ari, ag magpihu sa usa ka patar-ari nu daut nu mayad, kay pag-awayun ngap ti Kasuguan, kay pagpihuun ti Kasuguan nu daut nu mayad. Nu alamun nimu nu daut nu mayad ti Kasuguan balaw yi ngap kawu magtupad sa Kasuguan, bagkus ngap pagpalabi-labihan lang nimu ti Kasuguan.

¹² Usa lang ti nagpakaun Kasuguan, siya diman ngapu ti makapihu sa daut sa mayad. Siya lang ti may kamaskihan hampay makaparibri sa tawu ag makapapas sa tawu. Dapat si unu lugud kawu nakan kawu magpihu sa kanmu kaparihu tawu nu daut nu mayad?

Danga Magpayabang

¹³ Pagpatingi duy kamu tigsabi magkun, “Taynguna una aldaw kami umati sa kabanwa-banwahan. Sulud usa ka timpu kanmi ulian ati hampay magnigusyu yumaman.”

¹⁴ Dapat unman niyu alam nu hintay ti malakawan niyu aldaw pag sirang. Dahil kanyu buhi parihu sa alinyabu, madali nagluwang, bigla lang naparaw.

¹⁵ Kainda ti dapat niyu sabihun magkun, “Nu angay sa kagustuhan Panginuun, ag nu buhi waya kami, buwatun nimi ti paggayakun pag buruwatun.”

¹⁶ Dapat kamu magpalabi-labi, magpayabang-yabang. Tunda ngap duy daut.

¹⁷ Nu alam tawu ti dapat niya buwatun pag kaayadan bag-u unman waydi kay pagtupadun, siya magkasala.