Santiyagu 3 - Hanunuu

Ti Dila

¹ Manga patar-ari niku, danga mana maghingbut ti mayamu sa kanyu hampay manga manugtudlu, kabay alam diman niyu kita manga manugtudlu lalu gid pihuun aban nu daut nu mayad.

² Kita tanan pirmi magsalan. Una si unu pag tawu nu unman magsalan sa kay bagaw, unman yi may ikasabi sa kanya. Mapinigilun siya sa kay sadili bilug.

³ Nu binwatan nita rinda ti bibig kabayu, magkapasunud ag mag-ipatulin una naan tag kanta gustu.

⁴ Katunda diman waydi ti bangka. Madi laun ag pagdara-darahun waya durus mabisug, pagwaringun lang diit pag timun una naan tag kay gustu manugpalakaw bangka.

⁵ Katunda diman hanggan ti dila tawu, madi diit lang pag gamit nita bilug, dapat subra kay magkabuwat pag padayaw-dayaw. Isipa lang niyu. Ginan lang sa alimpatu pag nanlalangyaban sa katalunan.

⁶ Ti dila ga usa waydi ka apuy, lubus yi sa kadautan, imaw ti magmaliw sa kanta buu bilug. Tunda ti pagsabihun pag apuy sa dila ginan ngani sa impirnu, pinamaktan niya ti kadungganan tawu.

⁷ Tanan kalasi manuk una hayup tiglakaw, una iyay tigyapang, una hintay pag iyay tig-uli sa danum maparignuk di tawu, nahugup yi ngap kay ugali.

⁸ Dapat unman may tawu pumahugup sa kay dila. Ti dila ti pinakadaut, unman may kaapasan pasay yi dalit imaw ti makamatay sa kaparihu tawu.

⁹ Ti dila kanta paggamitun sa pagdayaw sa Panginuun hanggan sa Ama. Ti dila kanta diman paggamitun sa pagmuransa sa tawu sa linalang ga histuda Diyus.

¹⁰ Ginan sa bibig ti pagdayaw sa Diyus. Imaw diman hanggan pag bibig tigmuransa sa tawu. Balaw mana inda mahimu duy, manga patar-ari.

¹¹ Balaw lumuwang ginan sa bulbugan tab-ang ti danum maasin.

¹² Manga patar-ari, balaw mamurak ulibu ti puun igus. Balaw diman waydi lumuwang ti danum matab-ang sa bulbugan maasin.

Ti Kadunungan ginan sa Diyus

¹³ Hintay nguna sa kanyu ti madunung hanggan mapininsarun? Pakitan niya tunda sa kay mayad pag ugali, angay sa mapinakumbabaun pag kadunungan.

¹⁴ Dapat kamu nu mahinirakun ag maramuun kanyu tagipusuun, danga waydi niyu iyabang tunda, danga waydi ipaulam ti katutuuhanan.

¹⁵ Ti katida pag kadunungan balaw ginan sa Diyus, nu unman taga sitay sa babaw daga, angay sa ikaayad lang sadili bilug ag ginan ngap sa manga labang.

¹⁶ Dahil una naan katpung ti may parahirak ag maramuun, siyun diman ti kaguluhan hanggan ti tanan kadautan buwat.

¹⁷ Dapat ti may kadunungan ginan sa Diyus pihu marinu gid kay ugali, mairibgun siya sa kahusayan, maalumanay, mapinaangayun, maawaun, hanggan masipag sa mayad buwat, balaw mag-ihid, unman waydi magpabalhinguun.

¹⁸ Ag ti tawu nu madunung magpanab-anan sa mayad pag taratuhan, nu itanum niya kay kahusayan, may maani ngap siya katadlungan.