Santiyagu 2 - Hanunuu

Danga may Pagpiliun Tawu

¹ Manga patar-ari niku, kamu pag manga magsarig sa kanta Panginuun Hisu-Kiristu, imaw ti makamaskihan pag Panginuun, danga may pagpiliun kamu tawu.

² Halimbawa may rumas-ug sa kanyu tiripun usa ka lalaki may singsing gintu, marinu kay rutay, bag-u may usa maan ka tawu pugri, pasay lupun kay rutay.

³ Nu kanyu asikasuhun mayad tunda pag marinu kay rutay, nu sabihun niyu sa kanya, “Sitay duy pagkitukaw.” Bag-u nu sabihun niyu sa pugri, “Pagtindug lang kawu siyun,” aw ngatay, “Siyun lang kawu sa salug.”

⁴ Nu katunda kanyu buwat, unman aw may pagpiliun ngap kamu ginhawa tawu? Nagsalan yi gid kamu sa kanyu magkilala sa tawu.

⁵ Isipa gid niyu, mahal niku pag manga patar-ari, pinili Diyus ti manga pugri sitay sa kalibutan hampay sida manga mayaman yi sa pagsarig, kaibahan yi niya sa kay maghari angay sa kay itinaratu sa manga magmahal sa kanya.

⁶ Dapat unman ngap paggalangun niyu ti manga pugri. Unman aw ti mayaman ti mag-unuunu ngapu sa kanyu, magpangarudkud sa kanyu atag sa talaghusay?

⁷ Unman aw lugud sida diman tigbagaw daut pag bagaw laban sa makamaskihan pag ngaran nagsakup sa kanyu?

⁸ Masulung kanyu pagbuwatun nu magtupad lang kamu sa mahalaga pag sugu Diyus nisurat sa Banal Kasuratan magkun, “Mahala nimu kanmu kaparihu ga kanmu diman waydi sadili bilug.”

⁹ Dapat nu kamu may pagpiliun tawu, kamu magkasala. Kay ibug sabihun kamu manga maglabag sa Kasuguan.

¹⁰ Nu ti tawu magtupad sa kabuuhan Kasuguan bag-u magkasala laban sa usa ka sugu, nagkasala ngapu siya sa kabuuhan Kasuguan.

¹¹ Dahil ti magsabi, “Danga magpanguragin”, imaw diman ti nagsabi, “Danga maglibun sa tawu.” Una kawu unman ngani magpanguragin, nu maglibun diman waydi sa tawu, magkasala diman kawu laban sa kabuuhan Kasuguan.

¹² Nakan ngani pagmadahan kamu sa kanyu buwat hanggan sa kanyu bagaw. Dahil pihuun aban kamu nu ngatay angay sa Kasuguan aw ngatay unman. Ti Kasuguan nakan imaw tigpakaun karibrihan.

¹³ Udyi kaawaan Diyus sa kay magsintinsiya ti tawu unman madunung magkaawa. Dapat ti tawu nu madunung magkaawa, unman kailangan magkadala sa parusa Diyus.

Sarig ag Buwat

¹⁴ Manga patar-ari niku, hintay nguna ti pakinabang usa ka tawu nu sabihun niya kuntay siya may pagsarig, bag-u unman diman waydi mag-akitan tunda sa kay manga buwat. Miribri aw lugud siya nu katida lang waydi kay pagsarig?

¹⁵ Halimbawa nu may patar-ari unman may rutay, unman may karan-unun.

¹⁶ Nu kumumun ti usa sa kanya, “Danga duy kawu magkaaburidu, paglambung yi lang kawu pagkaun.” Bag-u unman diman siya pagpakan-an kay manga pangailangan. Kabitay yi lang tunda?

¹⁷ Katunda diman waydi ga tigbak ti pagsarig tawu nu unman mag-akitan sa kay buwat.

¹⁸ Dapat abi may magsabi magkun, “May pagsarig kawu, aku bay sa buwat.” Kang sagut waydi, ipakakit duy nimu kanmu pagsarig nu unman may tapil buwat. Ipakilala diman waydi niku sa kanmu kang pagsarig dahil sa kang manga buwat.

¹⁹ Magpaniwala kawu ti Diyus usa-usa, unman aw? Mayad duy, una ti manga labang magpaniwala diman waydi, pagtakigan waya sida sa dala.

²⁰ Kawu duy kurang katna sa pag-intindi. Kanmu aw gustu ipaliwanag waya niku sa kanmu kuntay unman may gana pag sarig nu unman may tapil buwat?

²¹ Kay magkilala Panginuun sa kanta ginurang sa kan Abraham kuntay siya matadlung dahil sa kay binwat, unman aw? Ipinakaun niya kabay sa Diyus kay anak si Isaak, kay mana matyun sa surunugan manga pag-isagda sa Diyus.

²² Siyun makitan nimu kan Abraham pagsarig may tapil buwat. Ginan sa kay binwat bag-u di lubus namhan kay pagsarig.

²³ Natupad ti isinurat sa Kasuratan magkun, “Nagsarig si Abraham sa Diyus, nakan ngani siya kinilala Diyus kuntay matadlung.” Pagkumnun yi Diyus, “Kang iribahun si Abraham.”

²⁴ Siyun ngani niyu pag maalaman ti usa ka tawu pagkilalan-un Diyus kuntay siya matadlung, balaw dahil sa kay pagsarig lang nu unman dahil sa kay buwat waya.

²⁵ Katunda diman si Rahab pag babayi uragin. Masulung kay nagpasaka sa manga manugtiid manga sinugu taga Israil. Itinudlu waya niya sa kanda ti tuhay pag dalan hampay makaibay sida. Dahil sa katida kay binwat ni Rahab nakan kinilala siya Diyus kuntay matadlung.

²⁶ Tigbak ti bilug nu udyi may arup. Katunda diman waydi ga tigbak ti pagsarig nu unman may patapil manga buwat.