Santiyagu 1 - Hanunuu

¹ Aku si Santiyagu, kay panawuhun Diyus hanggan nita Panginuun Hisu-Kiristu. Ipadangat niku kang surat pangamusta sa kanyu sa sampulu may duwa ka linahi nangalat sa tuhay-tuhay pag nasyun, nu kabitay waydi kamu asan.

Pagsarig ag Kadunungan

² Manga patar-ari niku, pagbaya kamu lubus nu kamu makalakaw sa tuhay-tuhay pag manga subuk.

³ Dahil alam niyu lalu waya ngap rumig-un kanyu pagsarig nu lumapus sa siyun pag manga subuk.

⁴ Kailangan ngani kamu pagpakarig-un hanggan sa katapusan hampay kamu kang-ud yi gid udyi may kakurangan.

⁵ Dapat una si unu sa kanyu nu kurang sa kadunungan, paghagad siya sa Diyus, bag-u siya pakan-an. Dahil ti Diyus abunda kay pamakaun sa tanan tawu, balaw siya mag-irang.

⁶ Dapat ti tawu nu maghagad kailangan pag may sarig. Danga mag-alinlangan, dahil ti mag-alinlangan parihu ga humbak dagat paghuypun durus una naan tag.

⁷ Dagsarig kuntay may matanggap ti tawu una hintay ginan sa Panginuun,

⁸ nu magkauman-uman kay naisipan, ag nu unman malinaw ti turunu niya kagustuhan.

Ti Pugri ag ti Mayaman

⁹ Nu pugri ti usa ka patar-ari, may kabayaan ngap siya nu siya pinaabwat Diyus.

¹⁰ Pagbaya waydi ti patar-ari mayaman nu apinaababa siya Diyus, dahil ti mayaman may kaduraan di parihu sa busang ilamnun.

¹¹ Ti ilamnun magkalayung pagka nasinggitan masyadu pag init. Magkarugnas kay busang, magpud-as kay rinu. Katunda diman waydi ti mayaman ud umapas sa asikasu sa kay kayamanan hanggan sa ud mamatay siya.

Ti Subuk ag ti Tuksu

¹² Papaladan Diyus ti tawu nu marig-un sa kay pagsarig una may paglakawan siya pagsubuk. Pagka nakalawuy yi sa pagsubuk, makatanggap siya buhi unman may katapusan, imaw kay atinaratu Panginuun pag pirimyu sa manga magmahal sa kanya.

¹³ Danga magsabi una si unu nu makalakaw subuk, siya pagtuksuhun Diyus. Dahil ti Diyus unman magkadara sa tuksu, unman waydi siya magtuksu sa tawu.

¹⁴ Magkatuksu ti tawu nu magpaangay magkadara siya sa kay sadili daut pag kagustuhan.

¹⁵ Pagka ti daut pag kagustuhan nagtubu, nan-gamut yi, kay kasuruhan kasalanan. Pagka namhan ti kasalanan, kay kasuruhan yi kamatayan.

¹⁶ Danga kamu magsalan sa kanyu naisipan, mahal niku pag manga patar-ari.

¹⁷ Kada mayad hanggan kang-ud pag pakaun pasay ginan sa langit, ginan sa Ama, sa naglalang sa manga init, bulan hanggan pamgasan sa langit. Balaw siya magkauman. Kay karayawan dayu bumaliw kadudulman.

¹⁸ Angay sa kay kagustuhan binag-u niya kanta buhi pagka ipinakilala niya sa kanta ti bagaw katutuuhanan, hampay kita bilang ga kay yi akaan burak sa tanan niya linalang.

Pagpatingi ag Pagtupad

¹⁹ Manga mahal niku pag manga patar-ari, tandai niyu inda pag bagaw: kada tawu pagpaanad sa magpatingi, danga susun magsagut. Danga hanggan rargu magkagalit.

²⁰ Dahil nu magkagalit ti tawu unman ikatadlung niya sa atubangan Diyus.

²¹ Nakan ngani pagpatlikud kamu ginan sa kayagtingan niyu buwat; pagbul-a niyu ti daut pag ugali; pagpakumbaba kamu lubus ag tanggapa niyu ti Bagaw Diyus ti itinanum sa kanyu tagipusuun. Inda pag Bagaw Diyus ti makaparibri sa kanyu.

²² Pag-ugali kamu angay sa Bagaw Diyus. Nu pagpatingihan lang niyu ti Bagaw Diyus bag-u unman diman pagtupadun, pagdayaun niyu kanyu sadili.

²³ Dahil ti tawu nu magpatingi lang siya sa Bagaw Diyus, bag-u unman magtupad sa kay nadnugan, parihu siya sa usa ka tawu magsalamin,

²⁴ pagka binantayan niya kay sadili susun linmakaw, pinabay-anan lang niya kay sadili ayus.

²⁵ Dapat ti tawu nu magsuyasid sa Kasuguan bag-u parargu sa kay pagtupad, nu katida pihu papaladan siya Diyus sa tanan niya buruwatun, dahil siya balaw manugpatingi lang bag-u kay paglimtan lang kay nadnugan. Dahil ti Kasuguan unman may kakurangan, tutuu makaparibri sa tawu.

²⁶ Nu ti tawu maghantup sa kay sadili kuntay siya matadlung, bag-u unman waydi mapinigilun siya sa kay dila, pagdayaun lang ngap niya kay sadili, unman may pulus kay mayad pag buwat magsamba sa Diyus.

²⁷ Kainda ay di ti pagkamatadlung ti kailangan ag pagbayaun nita Diyus Ama, nu ti tawu mag-awat sa manga ilu hanggan sa manga babayi buranday sa kanda kakurian, ag nu mainingatun siya sa kay sadili bilug hampay balaw madara sa daut pag ugali kalibutan inda.