Sakaryas 8 - Hanunuu

Nanaratu ti Diyus Papaladan Niya ti Hirusalim

^1-2 Magkun maan ti Panginuun Makamaskihan sa kan Sakaryas, “Magpasunaid gid aku sa Siun. Ag dahil sa daka niku pag pasunaid, magkagalit gid aku sa kay manga kalaban.

³ Mamalik aku sa Siun, ti banwa Hirusalim, ag mangulian aku siyun. Nakan ingarnan ti Hirusalim Masurundun pag Daka Banwa ag kang bantud ingarnan Banal pag Bantud.

⁴ Manukawan maan sa manga buruybuyahan Hirusalim ti manga magsugkud yi pag gurangun dahil sa pagkagurangun.

⁵ Ag ti buruybuyahan mapnu manga anak magbuybuya.”

⁶ Magkun waya ti Panginuun Makamaskihan, “Mahimu isipun inda dayu mangyari sa kang nasawad nasakupan, dapat mahimu di inda sa kangku.

⁷ Iribri niku kang manga nasakupan dinara-bihag sa manga daga sa butlakan ag sa isalpan.

⁸ Daran-un maan niku sida pabalik sa Hirusalim ag ati sida pauliun. Ag kas-a waya bumaliw sida kang nasakupan ag aku bumaliw kanda matapat ag matadlung pag Diyus.”

⁹ Magkun waya gid ti Panginuun Makamaskihan, “Inda pag tultulanun sinabi diman manga purupita katpung ipinatindug uman ti patakinan Balay Diyus niku. Ag taynguna nadnugan yi maan niyu inda, pagpakarig-un kamu hampay matapus niyu ti pagpatindug sa Balay Diyus.

¹⁰ Katpung udwaya naumpisahan ti pagpatindug uman sa Balay Diyus, makuri kanyu kahamtangan hanggan ti kahamtangan manga hayup. Unman kamu may kabaydanan ag mahawag una naan dahil pagpaawayun niku ti manga tawu.

¹¹ Dapat taynguna, aku, ti Panginuun Makamaskihan, magkun, dayi niku buwatun inda sa kanyu sa manga nasawad.

¹² Makapananum kamu may kahusayan. Mamurakan ti manga ubas, manpatubas ti daga, ag magkaimaw maan tun-ug. Ipakaun niku inda tanan sa kanyu sa manga nasawad, ag pihu matanggap niyu inda.

¹³ Manga nasakupan Huda ag Israil, pagsaadan kamu iba manga nasyun. Dapat iribri niku kamu ag bumaliw papalad kamu sa kanda. Nakan danga kamu magkadala, pagpakarig-un kamu.”

¹⁴ Magkun waya ti Panginuun Makamaskihan, “Katpung ginalit aku niyu manga ginurang, nagpasya aku parusahan kamu ag balaw kaawaan.

¹⁵ Dapat taynguna nagpasya aku mayadun maan ti Hirusalim ag Huda. Nakan danga kamu magkadala.

¹⁶ Inda ti dapat niyu buwatun: Pagsabi kamu kay tutuu sa usa kag usa. Paghusay kamu kay tutuu sa balay hurusayan para sa ikamayad tanan.

¹⁷ Danga kamu maggayak daut laban sa kanyu kaparihu, ag danga kamu magsumpa sa kapudilan dahil ti tanan tunda kang pagkadat-an.”

^18-19 Magkun maan ti Panginuun Makamaskihan sa kan Sakaryas, “Ti pag pamauray sa ikap-at, ikalima, ikapitu ag ikasampulu pag bulan bumaliw masulung ti sirang pagdaus sa kapistahan para sa manga nasakupan Huda. Nakan mahala niyu ti katutuuhanan ag ti kahusayan.

²⁰ Mayamu pag manga nasakupan ginan sa tuhay-tuhay pag banwa ti umatag sa Hirusalim.

²¹ Ti manga nasakupan sa usa ka banwa umatag sa usa ka banwa ag sumabi, ‘Atabug kami hampay mandarangin ag mandangup sa Panginuun Makamaskihan. Abala kamu, pagkuyug sa kanmi!’

²² “Mayamu pag manga nasakupan ginan sa makamaskihan pag manga nasyun ti umatag sa Hirusalim hampay mandarangin ag mandangup sa kangku.

²³ Ag sa ati pag sirang, sampulu ka day-uhan ginan sa tuhay-tuhay pag manga nasyun iba-iba kay pamagaw ti pumakarani sa usa ka Hudiyu ag sumabi, ‘Gustu gid nimi kumuyug sa kanyu, dahil nadnugan nimi ti Diyus kaibahan niyu.’ ”