Sakaryas 7 - Hanunuu

Sinungyaw ti Magpabalhinguun Pagpamauray

¹ May sinabi ti Panginuun sa kan Sakaryas katpung ikap-at pag sirang sa bulan Kislib (ikasiyam pag bulan), sa ikap-at pag timpu kay paghari ni Daryu.

^2-3 Nangyari inda matapus maipadara manga nasakupan Bitil si Sarisir hanggan si Rigim Milik, kaibahan kanda manga tawuhan, hampay hagadun sa manga manughandug sa Balay Diyus ag sa manga purupita sa pagpaingana sa Panginuun nu kailangan waya sida manhimanglaw ag balaw manhandum karan-unun sa ikalima pag bulan hampay alalahanun ti pagkagba Balay Diyus, parihu sa pagbuwatun nida sa dugay yi pag manga timpu.

⁴ Inda ti pagsabihun Panginuun Makamaskihan sa kan Sakaryas,

⁵ “Sabihi nimu ti tanan manga tawu mag-uli sa Israil hanggan ti manga manughandug, kanda pagpamauray ag panrukuan sa kada ikalima ag ikapitu pag bulan sa sulud pitumpulu ka timpu unman nida pagbuwatun para sa kangku.

⁶ Nu sida magkaun ag mag-inum, pagbuwatun nida inda para lang sa kanda sadili pag kabayaan.

⁷ Inda diman pag tultulanun kang pagsabihun sa manga purupita kaybi, katpung abunda waya ti Hirusalim ag mayamu waya kay tawu hanggan sa manga banwa sa kay palibut, hanggan sa Nigib ag Sipila.”

⁸ Magkun maan ti Panginuun sa kan Sakaryas,

⁹ “Inda ti sinabi niku sa kang manga nasakupan: ‘Paghusay kamu mayad. Ipakakit niyu kanyu kaayadan ag pangaawa sa usa kag sa usa.

¹⁰ Danga niyu pag-apiha ti manga buranday babayi, manga ilu, manga pugri, ag ti manga day-uhan magpangulian kaibahan niyu. Danga kamu gayak daut laban sa kanyu kaparihu.’

¹¹ “Dapat unman gid nida pinahalgaan kang sinabi. Binugyahan nida inda ag unman nida pinatingihan.

¹² Pinaganit nida kanda manga tagipusuun parihu sa batu, ag unman sida nagpatingi sa Kasuguan ag manga bagaw pag-ipasabi niku Ispiritu sa manga purupita kaybi. Nakan aku, ti Panginuun Makamaskihan magkagalit gid masyadu.

¹³ Dahil unman nida pinatingihan kang manga pagsabihun, unman diman niku patingihan nu manawag sida sa kangku.

¹⁴ Parihu aku sa buhawi manwayak sa kanda sa tuhay-tuhay pag rugar sa unman waya nida naatagan. Tinayakan yi nida kanda marinu pag daga tugka sa udyi nida inda mapakinabangan ag udyi maulian.”