Sakaryas 6 - Hanunuu

Ti Ipinakakit tungkul sa Upat ka Kalisa

¹ Nakitan waya gid niku ti upat ka kalisa magluwang sa karaw-an duwa ka bantud galang.

² Ti un-an pag kalisa pagguyudun manga maragang kabayu, ti pangadwa pagguyudun manga mabiru pag kabayu,

³ ti pangatlu pagguyudun manga malagti pag kabayu, ag ti ikap-at pagguyudun manga buntuk-buntukan pag kabayu. Marabisug sida tanan.

⁴ Pinaingana niku ti naghampang pag anghil sa kangku, “Unu duy kay ibug sabihun inda pag manga kalisa?”

⁵ Magkun siya sa kangku, “Inda sida imaw ti upat ka durus sa kapawaan langit ginan sa atubangan Panginuun sa buu kalibutan.

⁶ Ti kalisa pagguyudun manga mabiru pag kabayu atabug sa usa ka rugar sa salatan. Ti kalisa pagguyudun manga malagti pag kabayu atabug sa isalpan. Ag ti kalisa pagguyudun manga buntuk-buntukan pag kabayu atabug sa usa ka rugar sa kanaway.”

⁷ Pagka magras-ug di waya ti marabisug pag manga kabayu, magdali sida mamalibut sa buu kalibutan. Magkun ti anghil sa kanda, “Sigi, palibuta yi niyu ti buu kalibutan.” Nakan linibut ngani nida ti buu kalibutan.

⁸ Bag-u nagbagaw mabaskug ti Panginuun sa kangku, “Bantayi ti manga kabayu atabug sa usa ka rugar sa salatan. Sida ti mamakaun kapaharian sa kang Ispiritu sa inda pag rugar sa salatan.”

Ti Kuruna para sa kan Huswi

⁹ Magkun ti Panginuun sa kangku,

¹⁰ “Bul-a ti manga pamakaun pilak ag gintu nida ni Hilday, ni Tubyas, ag ni Hidaya, bag-u pag-atag kawu sa balay ni Husyas kay anak ni Sipanyas. Sida upat nakabalik ginan sa Babilunya nu naan sida pag dinara-bihag.

¹¹ Ipabwat nimu kuruna ti manga pilak ag gintu, bag-u ipasulung sa ulu ni Huswi imaw ti pangulu manughandug kay anak ni Hihusadak.

^12-13 Sabihi siya aku, ti Panginuun Makamaskihan, magkun, ‘Ti pag-ingarnan Sanga pag tawu umabunda sa kay kahamtangan taynguna, ipatindug maan niya kang Balay. Parangalan siya bilang hari ag manpamahala. Ti manughandug tumindug sa arani niya tukawan ag magkaimaw sida marinu pag ugnayan.’

¹⁴ Ti kuruna ipauli sa kang Balay bilang pag-alaala sa kanda ni Hilday, ni Tubyas, ni Hidaya, ag ni Husyas kay anak ni Sipanyas.”

¹⁵ May manga tawu rumas-ug sa Israil ginan sa arayu pag rugar mangawat sa pagpatindug sa Balay Diyus Panginuun. Nu mangyari yi inda, maalaman niyu ti Panginuun Makamaskihan imaw ti nagpadara sa kangku tag sa kanyu. Ag mangyari gid inda nu sundun niyu mayad ti Panginuun niyu Diyus.