Sakaryas 5 - Hanunuu

Ti Ipinakakit tungkul sa Linulun Kasuratan Maglayang

¹ Nakitan niku ti usa ka linulun kasuratan maglayang.

² Nagpaingana ti anghil sa kangku, “Unu ti nakitan nimu?” Magkun aku, “Usa ka linulun kasuratan maglayang, may 20 ka luk-an siku kay aba ag 10 ka luk-an siku kay kadaka.”

³ Magkun ti anghil sa kangku, “Nakasurat sa tunda pag kasuratan ti saad rumas-ug sa buu daga Israil. Pagsabihun sa usa ka bahagi kasuratan ti tanan manugtakaw duraun sa Israil, ag sa baliw bahagi waydi kasuratan pagsabihun ti kada usa manumpa may kapudilan duraun diman.

⁴ Magkun ti Makapangyarihan Panginuun, ‘Ipadara niku inda pag manga saad sa ulian manga manugtakaw ag sa ulian manga magsumpa may kapudilan sa kang ngaran. Pumirmaminti inda sa kanda balay tugka sa magkarawayak inda.’ ”

Ti Ipinakakit tungkul sa Babayi sa Sulud Balulang

⁵ Nagpakakit maan ti naghampang pag anghil sa kangku ag magkun, “Bantayi lugud nimu nu unu tunda ti magras-ug.”

⁶ Nagpaingana aku, “Unu tunda?” Magkun siya, “Balulang.” Ag magkun waya siya, “Tunda tanda kasalanan manga tawu sa buu daga Israil.”

⁷ Ti balulang may taklub timga. Pagka bin-ul kay taklub, nakitan niku may usa ka babayi matukawan siyun sa sulud balulang.

⁸ Magkun ti anghil, “Tunda pag babayi tanda kadautan.” Itinukmud niya ti babayi pabalik sa sulud balulang ag rargu tinakluban.

⁹ Pagkatapus, may nakitan aku duwa ka babayi maglayang mabaskug, may malapad pakpak parihu sa tagwak. Kinabyaw nida ti balulang ag dinara patungud.

¹⁰ Pinaingana niku ti naghampang pag anghil sa kangku nu naan tabug nida pagdarahun ti balulang.

¹¹ Magkun siya, “Sa Babilunya, nu naan pagbuwatun nida ti balay diyus-diyusan para sa balulang. Ag nu mamhan yi ti balay diyus-diyusan, ipauli nida siyun ti balulang hampay sambahun.”