Sakaryas 4 - Hanunuu

Ti Ipinakakit tungkul sa Gintu pag Paraulian Sulul-an ag Duwa ka Puun Ulibu

¹ Nagbalik ti anghil naghampang sa kangku ag pinulaw niya aku dahil ga naturugan aku.

² Pinaingana niya aku, “Unu ti nakitan nimu?” Nagsagut aku, “Nakitan niku ti usa ka gintu pag paraulian sulu may malukung sa tungud kay paraulian lana. Sa kay palibut malukung may pitu ka sulul-an ti kada usa may pitu ka tubu lakawan lana.

³ May duwa ka puun kayu ulibu sa baliw-baliw, usa sa sikun ag usa sa wala.”

⁴ Pinaingana niku ti anghil naghampang sa kangku, “Unu duy kay ibug sabihun inda?” Nagsagut siya,

⁵ “Unman aw lugud nimu alam kay ibug sabihun tunda?” Magkun aku, “Unman duy.”

⁶ Sinabi niya sa kangku, “Bag-u niku sagtun kanmu paingana, patingihi inda ti pagsabihun Panginuun Makamaskihan tultulan nimu kan Surubabil: “Surubabil, matapus nimu ti pagpatindug sa Balay Diyus bukun sa panab-anan kabisugan ngatay kakayahan tawu nu unman sa panab-anan niku Ispiritu.

⁷ Ag una waya parihu kay kadaka sa bantud ti hadlang kanmu pag-atubangun, patagun di tunda. Mamhan di gid ti Balay Diyus, habang pag-ipauli ti pinaka-uryan pag batu inda, manringgit ti manga tawu, ‘Panginuun, papaladan duy nimu inda.’”

⁸ Nakan sa panab-anan anghil, sinabi Panginuun sa kangku

⁹ mamhan ti Balay Diyus sa pagdumara ni Surubabil, siya diman ti mandumara sa pagpauli kay patakinan batu inda. Ag nu mangyari tunda, maalaman niyu ti Panginuun Makamaskihan imaw ti nagpadara sa kangku tag sa kanyu.

¹⁰ May manga tawu magpuya dahil pira di waya ti nabuwat sa pagpatindug sa Balay Diyus. Dapat makabaya sida nu makitan nida pag-ipauli yi ni Surubabil ti pinaka-uryan ag pinakamahalaga pag batu sa Balay Diyus. Pagkatapus, magkun sa kangku ti anghil, “Inda pag pitu ka sulu tanda mata Panginuun magbantay sa buu kalibutan.”

¹¹ Nagpaingana aku sa anghil, “Unu kay ibug sabihun inda pag duwa ka puun kayu ulibu sa sikun ag sa wala paraulian sulu?

¹² Ag unu kay ibug sabihun inda pag duwa ka sanga kayu ulibu sa saruy duwa ka tubu gintu paglakawan lana kulay gintu?”

¹³ Magkun siya sa kangku, “Unman aw nimu alam kay ibug sabihun tunda?” Magkun aku, “Unman duy.”

¹⁴ Nakan magkun siya sa kangku, “Kay ibug sabihun tunda ti duwa ka tawu pinili hampay sumirbi sa Panginuun, maghari sa buu kalibutan.”