Sakaryas 3 - Hanunuu

Ti Ipinakakit tungkul sa kan Huswi Pangulu Manug-asiwa

¹ Ipinakakit sa kangku Panginuun ti pangulu manughandug si Huswi matindugan sa atubangan anghil Panginuun. Matindugan sa kay sikun baliwa si Satanas hampay bangdanan siya.

² Dapat magkun ti anghil Panginuun sa kan Satanas, “Angay sa Panginuun imaw ti nagpili sa Hirusalim, salan gid kawu Satanas. Dahil inda pag tawu si Huswi irinibri niya ginan sa pagkabihag parihu sa pamagba rinabnut ginan sa apuy.”

³ Mauring kay rutay ni Huswi habang matindugan siya sa atubangan anghil.

⁴ Nakan magkun ti anghil sa kay iba manga anghil matindugan sa atubangan niya, “Lukasa niyu kay rutay mauring.” Bag-u magkun siya sa kan Huswi, “Bin-ul yi niku kanmu manga kasalanan. Ag taynguna, pasulungan yi kawu bag-u pag rutay.”

⁵ Ag magkun aku, “Pasulungan diman niyu siya malumpiyu pag pantaung sa ulu.” Nakan pinasulungan ngani nida siya bag-u pag rutay ag malumpiyu pag pantaung habang matindugan ag mabantayan siyun ti anghil Panginuun.

⁶ Pagkatapus, sinabi anghil Panginuun sa kan Huswi ti bilin

⁷ Makapangyarihan Panginuun: “Nu sumunud kawu sa kang manga palakaw ag sumunud sa kang manga pag-isugu, pamahalaun niku kawu sa kang Balay hanggan sa kay manga sugkadan inda. Ag pasnuan niku kawu makapakarani sa kang atubangan parihu sa manga anghil matindugan ati.

⁸ Taynguna, pagpatingi kawu, Huswi pangulu manughandug: Kawu hanggan ti manga kaparihu nimu manughandug tanda sa manga pararas-ugun mangyari. Itultul niku kang suruguun pag-ingarnan Sanga.

⁹ Huswi, bantayi nimu ti batu ipinauli niku sa kanmu atubangan, may pitu inda ka mata. Paukitan niku inda, ag pamul-un niku ti kasalanan daga Israil sa sulud lang usa ka sirang.

¹⁰ Sa tunda pag sirang, mabuhi kamu may kaariwayahan. Ti kada usa sa kanyu ban-awan niyu kanyu manga kamalay hampay manukawan sa sirung niyu manga ubas ag puun igus. Aku, ti Panginuun Makamaskihan, ti may sabi inda.”