Sakaryas 2 - Hanunuu

Ti Ipinakakit tungkul sa Lalaki may Panukat

¹ Pagka namantay aku, may nakitan aku lalaki may dara panukat.

² Pinaingana niku siya, “Naan tabug kawu?” Nagsagut siya, “Sa Hirusalim; sukatun niku kay bulang ag kay kaaba inda.”

³ Bag-u nighit ti anghil maghampang sa kangku. Sinulang siya usa waya gid ka anghil

⁴ ag magkun sa kanya, “Apura, sabihi ati pag kan-akan may dara panukat, ti Hirusalim bumaliw usa ka daka pag banwa unman may manga alad batu dahil sa subra mayamu kay nasakupan hanggan manga hayup.

⁵ Magkun ti Panginuun siya gid ngap ti bumaliw apuy pag alad sa palibut banwa Hirusalim, ag siya diman ti bumaliw kapangyarihan sa inda pag banwa.”

Pag-ipabalik Diyus Kay manga Nasakupan sa Kanda Rugar

^6-7 Magkun ti Panginuun sa manga Israilita, “Pinanwayak niku kamu una naan tag baliwa sa buu kalibutan. Dapat taynguna, pag-ighit yi kamu, hanggan kamu pag manga binihag sa Babilunya, ag pagbalik kamu sa Siun.”

⁸ Pagka nakitan niku ti manga ipinakakit tida, sinugu aku Panginuun mamagaw laban sa manga nasyun naggira ag nagbuul sa kanyu manga kasiyunan. Dahil una si unu ti bumuwat daut sa kanyu, ga magbuwat diman daut sa mahal pag Panginuun. Inda ti pagsabihun Panginuun Makamaskihan laban sa ati pag manga nasyun:

⁹ “Parusahan gid niku sida; girahun sida nida manga suruguun ag panbul-un kanda manga kasiyunan.” Nu mangyari yi inda, maalaman niyu ti Panginuun Makamaskihan imaw ti nagpadara sa kangku.

^10-11 Magkun ti Panginuun, “Manhuruyawan kamu sa kabayaan, kamu pag manga taga Siun, dahil rumas-ug aku ag mangulian kaibahan niyu. Ag sa siyun pag udas, mayamu pag manga nasyun ti manpasakup sa kangku. Ag bumaliw sida kang nasakupan.” Nu mangyari yi tunda, maalaman niyu ti Panginuun Makamaskihan ngani ti nagpadara sa kangku tabug sa kanyu.

¹² Ag apuun maan Panginuun ti Huda bilang kay bahagi sa banal pag daga Israil. Ag ti Hirusalim baliwun diman niya kay pinili pag banwa.

¹³ Dag-ingay kamu tanan pag manga tawu sa atubangan Panginuun, dahil rumas-ug siya ginan sa kay banal pag ulian.