Sakaryas 14 - Hanunuu

Rumas-ug ti Panginuun ag Humari

¹ Rumas-ug ti sirang pagparusa Panginuun. Ayaw-ayawun niyu manga kalaban ti manga naagaw nida pag kasiyunan ginan sa kanyu manga taga Hirusalim ag kamu mamantay lang sa kanda.

² Dahil tipunun Panginuun ti tanan nasyun hampay lumaban sa Hirusalim. Agawun nida inda pag banwa, pamul-un nida ti manga kasiyunan sa manga balay, ag lugusun nida ti manga babayi. Darahun nida sa iba rugar ti katunga manga mag-ulian sa banwa, dapat kay iba tayakan di.

³ Bag-u lumaban ti Panginuun laban sa tunda pag manga nasyun, parihu sa kay binwat paggira kaybi.

⁴ Sa tunda pag sirang, tumindug siya sa Bantud manga Ulibu, sa butlakan Hirusalim. Matunga inda pag bantud ginan sa butlakan tugka sa isalpan. Ti katunga bantud maisdug tag sa salatan ag ti katunga waydi maisdug tag sa kanaway, ag bumaliw inda maluang pag luung sa karaw-an.

⁵ Malagiw kamu pag manga taga Hirusalim lakaw sa inda pag luung, dahil inda pag luung umaput tugka sa Asil. Malagiw kamu parihu sa binwat niyu manga ginurang kaybi pagka linminug sa panahun ni Hari Usyas taga Huda. Ag rumas-ug ti Panginuun niku Diyus kaibahan ti tanan niya manga anghil.

⁶ Sa ati pag sirang unman may init ngatay ramig.

⁷ Tuhay inda pag sirang, dahil unman may yabi nu unman pasay sirang lang. Ti Panginuun lang ti may alam nu kapira tunda pag mangyari.

⁸ Sa ati diman pag sirang, bumulus ti malindag pag danum ginan sa Hirusalim. Kay katunga inda bumulus sa Dagat Namatay ag kay katunga sa Dagat Miditiranyu. Parargu inda kay magbulus sa panahun turungun hanggan abagat.

⁹ Ti Panginuun ti humari sa buu kalibutan. Siya lang ti kilalan-un Diyus ag udyi may iba waya.

^10-11 Pantayun ti buu daga ginan sa Giba sa salatan tugka sa Rimun sa kanaway baliwa Hirusalim. Dapat pumirmaminti abwat ti Hirusalim sa kay nagkabugtangan. Ag ulianan inda ginan sa may Sabian ni Binhamin tugka sa rugar nu naan asan ti Un-an pag Sabian, ag atabug sa Suuk pag Sabian; bag-u ginan Bantayaw ni Hananil tugka sa pirigsan ubas hari. Udyi mauman papasun ti Hirusalim, ag ti manga mag-ulian siyun ribri sa kaladalaun.

¹² Inda pag manga sarut ipadara Panginuun sa tanan nasyun nan-gira sa Hirusalim: Mabuyuk kanda manga bilug, mata, ag dila una buhi waya sida.

^13-15 Kainda diman pag manga sarut ti rumas-ug sa tanan manga hayup sa kanda kampu, hanggan sa kanda manga kabayu, mula, kamilyu, ag asnu. Sa tunda pag sirang, padalaun gid Panginuun tunda pag manga nasakupan. Ti kada usa sa kanda man-girirahan sa kay kaparihu, sida-sida lang ti man-girirahan. Lumaban diman para sa Hirusalim ti iba manga banwa Huda. Pamul-un ag panipunun nida ti manga kasiyunan manga nasyun sa kanda kalibut — masyadu gid mayamu pag manga gintu, pilak, ag manga rutay.

¹⁶ Bag-u ti tanan masawad sa manga nasyun nan-gira sa Hirusalim tumukad sa inda pag banwa kada timpu hampay mansamba sa Hari, imaw ti Panginuun Makamaskihan, ag hampay idaus ti Pista Pagpatindug manga Payag.

¹⁷ Unman padarahan uran ti manga nasakupan unman umatag sa Hirusalim hampay mansamba sa Hari, ti Panginuun Makamaskihan.

¹⁸ Ti manga unman umatag sa Hirusalim pag manga nasakupan Ihiptu padarahan Panginuun sarut parihu sa kay ipadara sa manga nasyun unman umatag hampay idaus ti Pista Pagpatindug manga Payag.

¹⁹ Imaw tunda kay parusa sa Ihiptu ag sa tanan nasyun unman umatag sa Hirusalim hampay idaus ti Pista Pagpatindug manga Payag.

²⁰ Sa tunda pag sirang mansamba ti manga nasyun sa Panginuun, isurat sa manga gurung-gurung pamarinu sa manga kabayu ti manga bagaw, “Iinintirga sa Panginuun.” Ti manga taramaan sa Balay Diyus Panginuun bumaliw banal parihu sa malukung garamitun sa harandugan.

²¹ Ag ti kada taramaan sa Hirusalim ag Huda bumaliw banal para sa Panginuun Makapangyarihan. Gamitun inda manga manughandug hampay tamaan nida manga pag-isagda. Ag sa tunda pag sirang, udyi may manga manugnigusyu sa Balay Diyus Panginuun Makamaskihan.