Sakaryas 13 - Hanunuu

Lumpiyuhun ti Kasalanan manga Taga Israil

^1-2 Sinabi Makapangyarihan Panginuun, “Sa ati pag sirang, bukasan ti bulbugan para sa manga linahi ni Dabid ag sa manga mag-ulian sa Hirusalim, hampay lumpiyuhun sida sa kanda manga kasalanan ag kayagtingan. Bul-un niku ti manga diyus-diyusan sa daga Israil ag udyi gid sida maalaala waya. Paighitun niku sa Israil ti magpabalhinguun pag manga purupita hanggan ti daut pag manga ispiritu magsakup sa kanda.

³ Ag nu may imaw waya magpabalhinguun purupita, kay manga gurang ti magpaandam kuntay kailangan siya matyun, dahil magbagaw siya kapudilan ag magkumun waya siya inda ginan sa Panginuun. Ag nu parargu waya gid siya magpabalhinguun bilang purupita, kay ama ag ina yi ngapu ti bumunu sa kanya.

⁴ Tunda pag manga purupita mangay-a sa kanda manga pagsabihun ipinakakit sa kanda. Bukun yi sida manulung panrutayun purupita hampay mandaya,

⁵ bagkus ngap sabihun nida, ‘Balaw aku purupita. Usa aku ka manugtanman, ag imaw inda kang tarabahu ginan waya kaybi sa kang kalay-awan.’

⁶ Ag nu may mamaingana sa kanda tungkul sa manga biyag sa kanda bilug, kanda sagut, ‘Nab-ul niku inda sa balay niku manga kakilala.’ ”

Mamatay ti Manug-alaga Karanidu ag Mamululagan Kay manga Karanidu

⁷ Magkun ti Panginuun Makamaskihan “Alistuhan ti baladaw! Matya kang manug-alaga manga karanidu, kang kaawat. Matya siya hampay mamululagan kay manga karanidu, kang pugri pag manga nasakupan ag parusahan niku sida.

⁸ Mamatay ti duwa sa tulu ka bahagi nasakupan sa buu daga Israil.

⁹ Ag ti ikatlu pag bahagi masawad lumpiyuhun niku parihu sa pilak pag-ipalakaw sa apuy. Subukun niku sida parihu sa gintu pag-ipalakaw sa apuy nu lunsay ngatay unman. Mandarangin sida sa kangku ag sagtun niku sida. Sabihun niku, ‘Sida kang nasakupan.’ Ag sabihun diman nida, ‘Ti Panginuun kanmi Diyus.’ ”