Sakaryas 12 - Hanunuu

Rurisun ti manga Kalaban Hirusalim

¹ Inda ti sinabi Panginuun tungkul sa Israil: “Aku ti Panginuun ti nagbuwat kalangitan ag kalibutan, ag aku ti magpakaun buhi sa tawu.

² Ti Hirusalim buwatun niku ga intus pumalangu sa manga nasyun sa kay kalibut. Ag nu girahun yi nida ti Hirusalim, girahun diman nida ti iba pag manga banwa sa Huda.

³ Sa tunda pag sirang, buwatun niku ga mabuyat pag batu ti Hirusalim, ag una si unu pag nasyun ti kumabyaw inda masaktan gid. Ti tanan nasyun sa buu kalibutan tumiripun hampay girahun ti Hirusalim.

⁴ Dapat padalaun niku ti tanan nida manga kabayu ag pabuyuhun niku kanda manga manugkabayu. Aku, ti Panginuun magsabi, bantayan niku ti nasakupan Huda, dapat butaun niku ti tanan kabayu manga nasyun.

⁵ Ag kumumun ti manga takinan Huda sa kanda sadili, ‘Marig-un ti nasakupan Hirusalim dahil ti Panginuun Makamaskihan imaw ti kanda Diyus.’

⁶ “Sa tunda pag sirang, ti manga takinan Huda buwatun niku ga maglabdaban baga sa nakatapung manga kayu ngatay ga maglabdaban sulu sa binugkus manga uhay. Rurisun nida ti manga nasyun sa kanda palibut. Dapat balaw maunu ti nasakupan Hirusalim sa kanda rugar.

⁷ Un-an niku papanaluhun ti iba manga banwa Huda hampay balaw lumamang ti kadayawan manga linahi ni Dabid ag manga taga Hirusalim kaysa iba manga banwa Huda.

⁸ Sa ati pag sirang, ingatan di Panginuun ti manga mag-uli sa Hirusalim hampay una ti pinakamalumuy sa kanda bumaliw ga kan Dabid kay kabisug. Ti manga magtal-anakan ni Dabid bumaliw ga Diyus, ga anghil Panginuun magpanguna sa kanda.

⁹ Sa ati pag sirang, rurisun niku ti tanan nasyun man-gira sa Hirusalim.

¹⁰ “Pakan-an niku ispiritu maawaun ag maradarangin ti manga linahi ni Dabid hanggan ti manga taga Hirusalim. Bantayan nida aku kanda binunu, ag manlumi sida parihu sa gurang maglumi sa pagkamatay nida bugtung anak ngatay anak panganay.

¹¹ Sa ati pag sirang, masyadu gid ti lulumian sa Hirusalim parihu sa lulumian para sa kan Hadad Rimun sa karatagan Migidu.

^12-14 Manlumi ti kada magtal-anakan sa buu daga Israil: ti manga magtal-anakan linahi ni Dabid, ni Natan, ni Libi, ni Simaya, ag ti iba waya pag manga magtal-anakan. Bululagan manlulumian ti manga lalaki ag manga babayi.”