Sakaryas 10 - Hanunuu

Kay Pangaawa Diyus sa Huda ag sa Israil

¹ Paghagad uran sa Panginuun sa panahun tig turubu manga tanum, dahil siya ti magbuwat gal-um. Pagpakan-an niya uran ti manga tawu ag ti kada tanum sa padang.

² Kay tutuu, bukun mapaniwalaan ti manga diyus-diyusan ag ti manga manughula. Magsabi sida salan pag kahulugan manga tagin-up. Unman may pulus ti pagpabisug nida sa nalub-anan manga tawu. Nakan magsimray ti nasakupan Israil parihu sa karanidu. Nakurian sida dahil unman sida may takinan.

³ Magkun ti Panginuun, “Magkagalit gid aku sa manga takinan niku nasakupan. Parusahan gid niku sida. Dahil alalahanun di niku kang manga karanidu, ti manga nasakupan Huda. Buwatun niku sida parihu sa manga kabayu sa girahan marapanalu.

⁴ Ginan sa kanda ti manga takinan parihu sa patakinan pag batu, pamatuk turda, ag pamana paggamitun sa girahan.

⁵ Magkarausa ti manga nasakupan Huda ag bumaliw sida parihu sa marabisug pag manga sundalu tumalu sa kanda manga kalaban ga lutuk tatatataan sa dalan. Manlaban sida dahil kaibahan nida aku, ag taluhun nida ti manga manugkabayu.

⁶ “Pabisugun niku ti manga nasakupan Huda ag iribri niku ti nasakupan Israil. Pabalikun niku sida sa kanda rugar dahil naawa aku sa kanda. Ag dahil aku ti Panginuun kanda Diyus, sagtun niku kanda darangin. Nakan parihu lang ga unman niku sida binugyahan.

⁷ Ti nasakupan Israil bumaliw parihu sa mabaskug pag sundalu. Bumaliw masulung sida parihu sa nakainum irinmun makalangu. Maalaala nida manga linahi inda pag panalu ag makabaya sida dahil sa kang binwat.

⁸ Tawagan niku kang manga nasakupan ag tipunun niku sida. Iribri niku sida, ag yumamu sida parihu sa kabag-u.

⁹ Una winayak niku sida sa iba nasyun, maalaala di nida aku ati. Mabuhi di sida hanggan kanda manga anak, ag bumalik sida sa kanda rugar.

¹⁰ Pauliun niku sida ginan sa Ihiptu ag Asirya, ag mangulian sida sa kanda rugar tugka sa Gilyad ag Libanun. Bumaliw masiut sida sa kanda kadagaan.

¹¹ Dumipay sida sa dagat mabalud dapat kumalma di ti manga balud. Una ti Sapa Nilu mak-at di. Ti pag-ipadayaw-dayaw Asirya umababa ag ti kapangyarihan Ihiptu madura di.

¹² Pabisugun niku kang nasakupan dahil sida sa kangku di, ag sundun nida aku. Aku, ti Panginuun, ti magsabi inda.”