Sakaryas 1 - Hanunuu

Panawagan hampay Bumalik sa Diyus

¹ May sinabi ti Panginuun sa kan Purupita Sakaryas ati katpung sa ikawalu pag bulan sa ikadwa pag timpu kay maghari ni Daryu sa Pirsiya. Si Sakaryas kay anak ni Birikyas ag kay laki ni Iddu.

^2-3 Sinugu Panginuun Makamaskihan si Sakaryas kuntay sabiha inda sa manga nasakupan Israil: “Magkagalit aku sa kanyu manga ginurang. Nakan pagbalik maan kamu sa kangku ag aku bumalik sa kanyu.

⁴ Danga niyu paghuwada ti binwat niyu manga ginurang. Sinugu niku kaybi ti manga purupita hampay sabihan sida patlikudi yi nida kanda manga daut pagbuwatun, dapat unman sida naniwala. Unman gid sida nagsunud sa kangku.

⁵ Kanyu manga ginurang ag tunda pag manga purupita nagkaramatay yi.

⁶ Dapat nangyari sa kanyu manga ginurang kang manga sinabi ag manga pasandam ipinatultul niku sa kang manga suruguun manga purupita. Bag-u nansisi sida magkun, ‘Pinarusahan kita Panginuun Makamaskihan angay sa kanta manga binwat, parihu sa kay kagustuhan buwatun sa kanta.’ ”

Ti Ipinakakit tungkul sa manga Kabayu

^7-8 May sinabi ti Panginuun sa kan Sakaryas sa panab-anan usa ka pakakit. Nangyari inda sa yabi ika-24 pag sirang sa bulan Shibat (ika-11 pag bulan), katpung ikadwa pag timpu kay paghari ni Daryu. Ag imaw inda ti itinultul ni Sakaryas: Nakitan niku ti usa ka tawu masakyan sa maragang pag kabayu. Mapat-ungan inda sa usa ka maratag pag rugar may manga puun kayu mirtu. Sa kay aday-an niya may manga tawu masakyan sa manga kabayu maragang, kurapug, ag malagti.

⁹ Nagpaingana aku sa anghil maghampang sa kangku, “Unu duy kay ibug sabihun tunda pag manga manugkabayu?” Sinmagut siya, “Ipaliwanag niku sa kanmu kay ibug sabihun tunda.”

¹⁰ Bag-u ti tawu mapat-ungan sa may manga puun kayu mirtu imaw ti nanpaliwanag sa kangku. Magkun siya, “Ti manga manugkabayu tunda ipinadara Panginuun hampay lumibut sa buu kalibutan.”

¹¹ Magkun ti manga manugkabayu sa anghil Panginuun mapat-ungan sa may manga puun kayu mirtu, “Nalibut yi nimi ti buu kalibutan ag nakitan nimi inda may kahusayan.”

¹² Magkun ti anghil Panginuun, “Panginuun Makamaskihan, tugka duy kapira pag pakurianan nimu ti Hirusalim hanggan ti manga iba waya banwa sa Huda? May 70 yi ka timpu duy kawu magkagalit sa kanda?”

¹³ Ti isinagut Panginuun sa anghil marinu pag bagaw ag makapakaun kabayaan.

¹⁴ Ag magkun sa kangku ti anghil sabihun niku inda pag manga sinabi Panginuun Makamaskihan: “Magkaawa gid aku sa Hirusalim pag-ingarnan diman Siun,

¹⁵ dapat galit gid aku sa manga nasyun masalimpayaan lang. Kaybi balaw masyadu kang pangagalit sa kanda, dapat dinugangan waya gid nida kang pangagalit sa kanda.

¹⁶ Nakan mamalik aku may pangaawa sa Hirusalim, ag ipatindug maan niku ti Hirusalim hanggan kang Balay Diyus. Aku, ti Panginuun Makamaskihan, ti magsabi inda.”

¹⁷ Magkun ti anghil sabihun waya niku inda ti pagsabihun Makamaskihan Panginuun: “Umunlad maan kang manga banwa sa Huda. Ag bayaun maan niku ti Siun, ti banwa Hirusalim. Ag baliwun maan niku inda kang pinili pag banwa.”

Ti Ipinakakit tungkul sa Upat ka Sungay ag sa Upat ka Manugpanday

¹⁸ Pagkatapus, nakitan niku ti upat ka sungay.

¹⁹ Nagpaingana aku sa anghil maghampang sa kangku, “Unu kay ibug sabihun inda pag manga sungay?” Sinmagut siya, “Inda pag manga sungay imaw ti manga nasyun nagpawayak sa manga taga Israil ag taga Huda, hanggan sa manga taga Hirusalim.”

²⁰ Bag-u ipinakakit sa kangku Panginuun ti upat ka manugpanday.

²¹ Nagpaingana aku, “Unu ti buwatun nida?” Nagsagut siya, “Padalaun nida ag dautun ti manga sungay. Inda pag manga sungay imaw ti manga nasyun nagpadamhak lubus sa Huda ag nagwayak sa kay manga nasakupan.”